[b] "İmişli Rayon Ağsaqqallar Şurasının sədri Saleh Səmədovun 2025-ci il mayın 9-da rayonun bir sıra digər nümayəndələri ilə birlikdə İmişlinin Sarıxanlı kəndində faşizm üzərində qələbə günü münasibətilə təşkil olunan tədbirdə SSRİ bayrağı altında, sinəsində rus imperiyasının rəmzi olan "Georgi" lenti ilə çıxış etməsinə necə yanaşırsız? Sizcə, həmin şəxs bu, demək olar ki, xəyanətkar davranışı şəxsi təşəbbüsü ilə edib, yoxsa onun bu addımı Rusiya xüsusi xidmət orqanlarının təhriki ilə etməsi ehtimalı da var? Bunu Rusiyanın növbəti təxribatı kimi dəyərləndirmək olarmı?" Bu suallarla müraciət etdiyimiz siyasi təhlükəsizlik məsələləri üzrə ekspert Ərəstun Oruclu [color=#FF0000]Moderator.az[/color]-a açıqlamasında bunları söyləyib: “İmişlidə keçmiş SSRİ bayrağı və “Georgi” lentləri ilə müşayiət olunan məlum hadisə, hesab edirəm ki, Azərbaycan dövlətinə bir xəyanət kimi qiymətləndirilməlidir. Və həmin tədbiri təşkil edən o ağsaqqal sayılan şəxsin davranışı, hərəkətləri, onun sonrakı reaksiyaları özü də göstərir ki, adam bunu çox arxayın şəkildə edibdir. Belə görünür ki, o nəyəsə güvənir, nəyəsə arxayındır. Və şəkinmədən hətta işğalçı Rusiyanın, işğalçı SSRİ-nin dövlət rəmzlərini Türkliyənin dövlət rəmzləri ilə müqayisə edir... Burada sual olunur ki, həyatı boyu Azərbaycanda məmur vəzifələrində çalışmış bir adam, hansısa naməlum yollarla böyük sərvətə malik olmuş bir şəxs bu cəsarəti haradan, kimdən alır ki, etdiyi bu xəyanətkar davranışa görə, heç olmasa, nəyinsə yanlış olduğunu demək əvəzinə, əksinə, özünün haqlı olduğunu sübut etməyə çalışır və ölkədə müzakirə üçün sanki bir mövzu ortaya atır ki, niyə Azərbaycanda SSRİ-nin, işğalçı Rusiyanın dövlət rəmzləri nümayiş etdirilə bilməz, amma Türkiyə bayraqları hər yerdə ola bilər. Adam bunu anlamırmı? Hesab edirəm ki, anlayır, amma bilərəkdən açıq, etinasız, cəmiyyətə hörmətsiz şəkildə belə bir reaksiya verir. O bunları bilərəkdən edir. Səbəb də nədir? Təbii ki, arxasında duranlar var”, - bunları söyləyən ekspert hesab edir ki, sözügedən təxribatın təşkil edilməsində Rusiyanın Azərbaycandakı “5-ci kalon”u da böyük rol oynayıb... Biz illərdir, deyirik ki, Azərbaycanda Rusiyanın “5-ci kalon”u mövcuddur. Və həmin “5-ci kalon” Azərbaycan xalqına, dövlətinə qarşı saysız-hesabsız cinayətlərin arxasında dayanır. O cümlədən məlum Tərtər qətliamının da... Mən çox-çox misallar gətirə bilərəm. Eləcə də II Qarabağ savaşının başlanğıcında törədilmiş təxribatları... Hansılarınkı nəticəsində Azərbaycan ordusu buna heç bir əsas olmadan yüzlərlə şəhid verdi. Bu birmənalı şəkildə xəyanətin nəticəsi idi. Amma arxasında ciddi faktlar dayanan bu bəyanatlara, bu çağırışlara, bu araşdırmalara baxmayaraq, təəssüf ki, belə təxribatlar müvafiq qurumların diqqətini çəkmir ki, bəlkə doğrudan da, ölkədəki Rusiya “5-ci kalonu”yla mübarizə aparmaq lazımdır... Eyni zamanda, Azərbaycanın sərnişin təyyarəsini vuran, onlarla Azərbaycan vətəndaşının qətlinə səbəb olan, dövlətimizin müstəqilliyini açıq şəkildə təhdid edən, SSRİ-nin bərpasını özünün hədəfi kimi göstərən Rusiya dövlətinin Azərbaycandakı fəaliyyəti heç bir zaman məhz ölkəyə təhlükə yaratmaq kontekstində gündəmə gətirilmir. Gəlin görək, İmişlidəki məlum olayı bir nəfər, yaxud 3-5 nəfər özbaşına təşkil edə bilərdimi? Ölkədə müvafiq qurumlarla razılaşdırmadan kimlərsə toplaşıb aksiya keçirə bilərmi? Xeyr, bu, qeyri-mümkündür. Amma bu adam görün necə rahat şəkildə bu dövlətə, dövlətçiliyə qarşı təxribatla dolu bu tədbiri keçirib, buna hazırlıq görüb... Digər adi bir sual meydana çıxır: Azərbaycanda kimsə o “Georgi” lentlərini asanlıqla və çəkinmədən əldə edə və tədbir iştirakçılarına paylaya bilərmi? Xeyr, bu da mümkün deyil. Bax, bütün bu dediklərim göstərir ki, İmişlidəki 9 may təxribatı Rusiya xüsusi xidmət orqanlarının hazırladığı əməliyyat olub. Bu, təxribat əməliyyatı olub. Məqsəd mesaj verməkdir. Hansı mesajları verməkdir? Zənnimcə, xüsusi aydınlıq gətirməyə ehtiyac yoxdur. Moskvada keçirilmiş son 9 may “qələbə” paradıyla bağlı Azərbaycandan nümayiş olunan münasibəti unutmayaq. Biz unutsaq da, Rusiya bunu unutmayacaq. Bu mənada hesab edirəm ki, məsələyə cavabdeh qurumların heç bir münasibət bildirməməsi özü də çox simptomatikdir və hətta simvolikdir. Ona görə ki, hakimiyyətə yaxın bir sıra media qurumlarının da ortaya qoyduğu kimi, Rusiyanın “5-ci kalon” nümayəndələri yuxarılara da doluşublar. Və İmişlidə SSRİ imperiyasının bayrağını qaldıranlar yalnız mərkəzdən himayə olunduqlarına arxayın olduqları halda belə bir anti-Azərbaycan davranışını özlərinə rəva görə və sonradan da ona çox açıq, etinasız və cəsarətli şəkildə bəraət qazandıra bilərlər. Onlar yaxşı bilirlər ki, tapşırıq Rusiyadan verilibsə belə, Azərbaycan dövləti tədbir görəcəyi halda Kreml onları müdafiə edə bilməz. Deməli, onları Azərbaycanın özündən müdafiə edənlər var. Odur ki, məsələ məhz o tərəfdən araşdırılmalıdır ki, işğalçı imperiyanın, dövlətin rəmzləriylə o boyda aksiya hazırlananda cavabdeh qurumlar hara baxırdı... Bu məsələdə çox-çox belə suallar meydana çıxır. Və təəssüf ki, belə suallara cavab axtarmaq əvəzinə, bir sıra media resurslarında bu 9 may təxribatını İmişlinin həbsdə olan keçmiş icra başçısı Vilyam Hacıyevlə əlaqələndirməyə çalışırlar. Bu, əlbəttə, gülüncdür. Amma bunun məqsədi də aydındır... Və belə çıxır ki, məsələnin bundan o yana araşdırması getməyəcək...” “Bəs Azərbaycan dövlətçiliyinə qarşı bu 9 may təxribatı niyə məhz İmişli rayonunda baş tutub” sualını isə analitik belə cavablandırıb: “Bəli, o da maraqlıdır ki, Azərbaycanda bu 9 may təxribatı üçün nədən məhz İmişli rayonu seçilib. Səbəblərdən birinin çar Rusiyası və sovet dövründən bəri İmişlinin sərhəd zonalarından biri olmasıdır. Bilirsiz ki, sovet dövründə sərhədyanı rayonlar rəsmən qapalı olurdu. Hətta başqa ərazilərdən İmişli, indiki Biləsuvar, Cəlilabad, Astara və s. rayonlara getmək üçün xüsusi buraxılış vərəqələri tələb olunurdu. Bu səbəbdən Rusiya kəşfiyyatı, xüsusən də “KQB” sərhədyanı rayonlarda birə on fəal işləyibdir. Bilirsiz, həmin rayonlarda nə qədər agentura mövcuddur? Məsələn, deyək ki, Azərbaycanın mərkəzi rayonlarında Ağdamda, Ağcabədidə, Tərtərdə, Goranboyda, Kürdəmirdə və s. hər 1000 nəfərə tutaq ki, 100 Moskva agenti olubsa, İmişlidə, Astarada, Cəlilabadda və s. bu rəqəm 200-300 olub, bəlkə də 500 olub. Bunu tam əminliklə deyirəm. Onu da xatırladım ki, 1989-cu il dekabrın sonunda cənub rayonlarında keçmiş SSRİ-İran sərhədlərinin sökülməsi də məhz sovet-rus “KQB”-sinin həmin bölgələrdəki agentura şəbəkəsi vasitəsilə törətdiyi təxribat idi...” [/b]