Ermənistanın Baş naziri Nikol Paşinyan yeni hazırlanan konstitusiya ilə bağlı bir sıra detalları açıqladı. O bildirdi ki, yeni konstitusiyada 1990-cı il Müstəqillik Bəyannaməsinə istinad olmamalıdır: "Ermənistanın Müstəqillik Bəyannaməsi müstəqil, suveren Ermənistan Respublikasının mövcud ola bilməyəcəyini ehtiva edir. Əgər mən bunu deyirəmsə, deməli, yeni Konstitusiya mətnində həmin Bəyannaməyə istinad olmalı olduğunu iddia edə bilmərəm. Əksinə, deyə bilərəm ki, mənim fikrimcə, yeni Konstitusiyada bu sənədə istinad olmamalıdır. Amma qərarı Ermənistan xalqı verəcək". Paşinyan bildirib ki, bu məsələyə yalnız Azərbaycanın tələbi prizmasından deyil, Ermənistanın daxili ictimai-siyasi reallıqları kontekstində yanaşır: “Biz iki məsələni ayırmalıyıq: Azərbaycanın sülh prosesinə və Ermənistan Konstitusiyasının mətninə münasibəti. Bu, bizdə 2018-ci il inqilabından dərhal sonra gündəmdə olan məsələdir. Hələ 2020-ci ilin fevralında bir müsahibəmdə də bu barədə danışmışdım”. Yeni Konstitusiyanın nə vaxt qəbul ediləcəyi ilə bağlı suala cavab olaraq Paşinyan konkret tarix verməyib: "Referendumun nə vaxt keçiriləcəyinə dair dəqiq söz deyə bilmərəm. Fərqli fikirlər var, müzakirələrdən sonra ortaq nəticəyə gələcəyik".
Qeyd edək ki, Azərbaycan və Ermənistan arasında sülh sazişi üzrə danışıqlar başa çatıb. Saziş preambula və 17 maddədən ibarətdir. Bir müddət əvvəl sazişin preambula və 15 maddəsinin razılaşdırıldığı, yerdə qalan 2 maddə üzrə danışıqların davam etdiyi açıqlanmışdı. Sözügedən maddələr sərhəddən üçüncü ölkələrə məxsus qüvvələrin çıxarılması və beynəlxalq məhkəmələrdə iddiaların qarşılıqlı şəkildə geri götürülməsi ilə bağlıdır. Artıq hər iki tərəf maddələri razılaşdırıb. Ancaq sülh sazişi hələ də imzalanmağa hazır deyil. Çünki sülh sazişinin daha dayanıqlı olması üçün Ermənistan bir sıra şərtləri yerinə yetirməli, öhdəlik götürməlidir. Prezident İlham Əliyev bəyan edib ki, sülh sazişinin imzalanması üçün iki şərt yerinə yetirilməlidir. Bunlar Minsk qrupunun buraxılması və Ermənistan Konstitusiyasının dəyişdirilməsidir. Bakı hesab edir ki, Ermənistanın hüquqi sənədlərində Azərbaycana qarşı ərazi iddialarının qalması, iki ölkə arasında normallaşma prosesinə ciddi maneə törədir. Ermənistanın 1995-ci ildə qəbul edilmiş Konstitusiyasının preambulasında Azərbaycana qarşı ərazi iddiaları var.
Türkiyənin Ərciyəs Universitetinin professoru, ermənişünas-alim Qafar Çaxmaqlı "Sherg.az"a deyib ki, sülh sazişinin mətni 17 bənddən ibarət olsa da, Azərbaycanın iki önəmli tələbi var. Professor vurğulayıb ki, Ermənistan Konstitusiyasında Azərbaycana qarşı ərazi iddiaları ortadan qalxmadan, ATƏT-in Minsk qrupu ləğv edilmədən yekun sülhdən danışmaq olmaz:
"Ermənistanın indiki Konstitusiyası Azərbaycanın ərazi bütövlüyünə təhdiddir. Həm preambula hissəsində, həm də içərisindəki maddələrdə Azərbaycanın Qarabağ bölgəsi "Ermənistan ərazisi" sayılır. Ona görə bu dəyişiklik mütləq olmalıdır və referendum yolu ilə edilməlidir. Yəni Paşinyanın "Müstəqillik Aktına istinad olmayacaq" sözləri yetərli deyil. Paşinyandan sonrakı hakimiyyət ərazi iddialarını özündə əks etdirən sənədlərə rahatlıqla əsaslana bilər. Bunu Konstitusiya Məhkəməsi də elə bilməz. O cümlədən Minsk qrupunun qalmasında qətiyyən ehtiyac yoxdur və kimsə qalmasını istəyirsə, deməli, xoş niyyət güdmür. Ermənistan iddia edir ki, sülh sazişi imzalanarsa, Azərbaycanın ərazi bütövlüyü tanınarsa, Minsk qrupu qüvvədən düşmüş olacaq. Amma Minsk qrupu kağız üzərində də olsa, beynəlxalq rəsmi strukturdur və onun formal ləğvi şərtdir. Bu mövcudiyyəti aradan qaldırmağın yolu iki ölkənin ATƏT-ə birgə müraciətidir. Ermənistan buna getmək istəmir".
Q.Çaxmaqlı vurğulayıb ki, son günlərdə keçmiş qondarma rejimin qalıqları, revanşist qüvvələr də fəallaşıblar, mitinqlər keçirirlər, tələblər irəli sürürlər, beynəlxalq təşkilatlara müraciətlər edirlər:
"Bu absurd tələbləri də ancaq Minsk qrupu vasitəsilə gündəmə daşımaq, beynəlxalq müstəviyə çıxarmaq mümkündür. Azərbaycan işini sağlama almaq istəyir və İrəvan təzyiq göstərir. Şübhə etmirəm ki, təzyiqlər nəticə verəcək və Minsk qrupu ləğv olunacaq. Ancaq İrəvan hökumətinin Konstitusiyada dəyişiklik tələbini yubatması sülh sazişinin imzalanmasını da uzada bilər. Görünən odur ki, Ermənistan konstruktiv mövqe tutmur. Sadəcə, sülhü imitasiya edərək "sülhsevər" görüntü yaratmağa çalışır. Hər halda danışıqlar davam edir və müzakirələr aparılır. Ümid edirik, bütün problemləri çözmək mümkün olacaq".
