Əlixan Musayev rəsmi dövlət saytında “nüfuzlu din alimi” kimi təqdim olunub
Əlixan Musayev adı Azərbaycan oxucusuna daha çox terror hadisələri ilə hallanan şəxs kimi tanışdır. Mədinədə təhsil alan bu şəxsin bir zamanlar rəhbərlərindən biri olduğu sələfi camaatı tərəfindən qəbul edilməməsi, tələbə yoldaşlarının onunla əlaqələri kəsməsi haqqında deyilənlərə inamı gücləndirir. Bir müddət öncə Türkiyədə İran lobbisinin əsas adamlarından biri, Hizbullahı dəstəkləyən Mustafa İslamoğlu ilə görüşərək, sələfilərlə İranın münasibətlərini normallaşdırmaq planının icraçılarından olan Əlixan Musayevin daha sonra təkfirçi və cihadçıların sevimlisinə çevrildi.
Qamət Süleymanov və digər Mədinə tələbələrinə “tağuta sitayiş edən” yarlığını vurub, “qətli vacib, malı halal” prinsipi ilə yanaşan radikallar hər nədənsə Əlixan Musayevi onlardan ayırdılar. Ə.Musayevin vəəzlərini dinləyənlərin onun haqqında dedikləri bu şəxs haqqında müxtəlif fikirlərin ortaya çıxmasına səbəb oldu.
Bəzilərinə görə, cihadçıların ideoloji lideri olan bu şəxs digər bir qrupa görə, Azərbaycanın “dar ül sülh” olmadığını iddia edənlərin başında gəlir. Bir qism isə onun siyasətə qarışmadığını iddia edir. Buna səbəb isə Əlixan Musayevin siyasətçi kimi davranaraq, hər məclisdə “nəbzə görə, şərbət verməsidir”.
Məsələn, Mustafa İslamoğlunun “Hilal” telekanalına müsahibə verərkən, uşaqbazlıq üstündə həbs olunmuş şəxsin şəninə təriflər yağdırarkən, bu işin üstü açılanda, “mən onu tanıyanda elə məsələlər yox idi” deyərək, “köçünü sudan çıxarmağı bacarandır.
Və ya sosial şəbəkələrdə yayılan xəbərlərdə Əlixan Musayevin artıq Azərbaycanın cahil olmadığını dediyi bildirilir. Bu “cahil” məsələsi hansı anlama gəlir? Azərbaycan müstəqillik qazandıqdan sonra 70 illik əsarət nəzərə alınaraq, bu ölkədə İslami şərtlərin tam yerinə yetirilməməsi İslam alimləri tərəfindən “müsəlman ölkə” olmağımıza əngəl olmamışdı. Əsarətdən çıxan müsəlman ölkəsi olaraq, “darül sülh” olmağımıza qənaət gətirilmişdi. Yəni, “sülh evi” anlamına gələn ərazilərdə hər hansı bir terror əməliyyatının keçirilməsi qadağan edilir və ölkə başçısının müsəlman olması vurğulanırdı. Bu hökm əslində Azərbaycanda baş verə biləcək bir çox fəsadların önünü qapadırdı.
Əlixan Musayevin “cahillik” söhbəti isə o anlama gəlir ki, artıq Azərbaycanda islamı bilən bir nəsil var və hər hansı bir islami məsələlərlə bağlı xəta qəbuledilməzdir. Bu isə əslində ölkədəki cihadçı və təkfirçilərin mövqeyi ilə üst-üstə düşür. Əlixan Musayevin bu mövqeyi ilə həyat yoldaşı Suriyada şəhid olan qadının suçlamaları arasında ciddi paralellik mövcuddur.
Həyat yoldaşının Əlixan Musayevin söhbətlərinə getdikdən sonra Suriyaya getdiyini deyən qadının sözləri Sosial şəbəkələrdə yazılanları da təsdiqləyir. Əlixan Musayevin xəvaric və cihadçıların arasında ciddi nüfuz sahibi olması, hətta Suriya ilə bağlı ikibaşlı açıqlama verməsinə rəğmən görülməkdədir.
Onlarla ailənin həm Qaraçuxurda, həm Müşfiqabadda övladlarının Suriyaya getməsində suçladıqları Əiixan Musayevin “toxunulmazlığı” isə başqa iddiaların ortaya çıxmasına səbəb olmaqdadır.
Bir çoxları hesab edir ki, Əlixan Musayevin bir missiyası var və bu səbəbdən də, ona “gözün üstə qaşın var” deyilmir.
Ölkədə birmənalı qarşılanmayan bir cərəyanın lideri olan, keçmişdə radikalların şeyxi Səlimin yaxın tərəfdaşı, Mustafa İslamoğlunun təbliğatçısı və Suriyaya “cihadist” ixrac edən məscidlərin kilid ismi olan Ə.Musayevin rahat fəaliyyəti öz növbəsində şübhələri ortaya qoyur.
Mədəniyyət və Turizm Nazirliyinin rəsmi saytında “Azərbaycanda İslam” başlıqlı bölməsində Azərbaycanın tanınmış İslam alimləri Şeyxülislam Əhməd Hüseynzadə, Axund Ağa Əlizadə, Vasim Məmmədəliyevlə yanaşı Əlixan Musayevin tanınmış İslam alimi kimi təqdim edilməsi bu şübhələrə bir az aydınlıq gətirir. Azərbaycanla bağlı yaradılmış rəsmi səhifələrdən götürülmüş məlumata Əlixan Musayev və Hacı Şahin Həsənlinin adının əlavə edilməsi Azərbaycanda İslamı yenidən dizayn etmək istəyənlərin sonrada etdikləri görünməkdədir.
Bu həm də Əlixan Musayevin Dini Qurumlarla İş Üzrə Dövlət Komitəsi sədri Elşad İskəndərovun oyunlarının icraçısı olması ilə bağlı iddiaları gücləndirir. Digər Mədinə tələbələrindən fərqli olaraq, Əlixan Musayevə dövlətin qapılarını taybatay açan və ekspert kimi qəbul edən komitə sədrinin ondan “Troya atı” kimi istifadə etdiyi vurğulanır.
Ancaq o da vurğulanır ki, aldatma məharəti yüksək olan Musayevin komitə sədrinə də kələk gəlib. Belə ki, komitə sədrinin “Qarabağ azanı” proyektinə dəstəyini ifa etdikdən sonra onu qınayanlara “mənim dinlədiyim azanda əlavələr yox idi” deyərək, köçünü sudan quru çıxaran Əlixan Musayevin bu yaxınlıqdan daha çox rəqiblərini zərərsizləşdirib, qovulduğu məscidləri təkrar geri almağı hesabladığı bildirilir.
Lakin geri aldığı məscidlərdə radikallığın nəzərə çarpacaq səviyyədə artması Ə.Musayevin komitə sədrinə bir o qədər də faydalı olmadığını ortaya qoyur. Yəni, komitə sədri Əlixan Musayevdən dövlət naminə yararlanmaq yerinə, bu şəxs dövlət “bronjlet”i ilə xaricdəki dostlarının ideyalarını rahat şəkildə yaymaqdadır. Yəni, Əlixan Musayev başqalarının planlarını həyata keçirsə də, kənardan bu elə təsir bağışlayır ki, liberal sələfiləri radikallığa sürükləmək cəhdinin sifarişini komitə sədrindən alıb.
Özünü Dini Qurumlarla İş Üzrə Dövlət Komitəsinin sələfiləri üzrə təqdim edərək, bu cərəyandan olanların üzərində “domokl” qılıncı kimi əsən Əlixan Musayevin adının dövlətin rəsmi saytlarında nüfuzlu islam alimlərimizlə yanaşı çəkilməsinin də bundan qaynaqlandığı vurğulanır.
Tələbələri Suriyada, Əfqanıstanda “cihad”da iştirak edən şəxsin komitə tərəfindən bu qədər müdafiə olunması anlaşılan hal deyil.
Sosial şəbəkələrdə yayılan xəbərlərdə iddia olunan kimi dövlət komitəsi bu yolla sələfilərdən dövlətə düşmən düzəltmək istəyirsə ki, buna inanmaq istəməzdik, artıq plan çökmüşdür. Artıq sələf camaatı Əlixan Musayev barədə məlumatlı olduqlarından onun tərəfdarlarının da qızışdırmaq cəhdi də fiaskoya uğramışdır.
Mövzuya qayıdacağıq… \\ azerinfo.org \\
