Məlumdur ki, bu gün ölkəmizdə turizmin əksər növlərinin inkişafı üçün geniş imkanlar mövcuddur. Son illər əldə olunmuş sürətli sosial-iqtisadi tərəqqi bu sahənin hərtərəfli inkişafına yeni imkanlar açıb. Hazırda dövlət tərəfindən turizm sektorunu ölkə iqtisadiyyatının aparıcı sahələrindən birinə çevirmək üçün əhatəli tədbirlər planı həyata keçirilməkdədir. Qeyd etmək lazımdır ki, bu tədbirlər planı çərçivəsində respublikanın digər bölgələri ilə yanaşı Lerik rayonunda da bu sahədə ötən illər ərzində nəzərə çarpacaq dərəcədə əməli işlər görülmüşdür. Lakin təəssüflər olsun ki, bu gün rayon mədəniyyət və turizm şöbələrnə rəhbərlik edən kadrların heç də hamısı öhdələrinə düşən vəzifələrin vacibliyini və məsuliyyətini tam ciddiliyi ilə dərk etmirlər. Bu xüsusda bizimdovr.az-a daxil olan məlumatlarda Lerik rayonu Mədəniyyət və Turizm İdarəsinin müdiri Adil Sucayevin də fəaliyyətində yer almış ciddi nöqsanlara dair faktlar öz əksini tapmışdır. Məlumdur ki, füsunkar təbiətə, bənzərsiz dağ havasına malik olan Lerikdə turizmin inkişafı üçün böyük imkanlar mövcuddur. Amma reallıqda bu gün Lerikdə həyata keçirilən mədəniyyət və turizm tədbirlərinin səviyyəsi olduqca aşağıdır və bu sahənin mövcud imkanlarını da qətiyyən əks etdirmir. Daxil olan məlumatlarda isə vurğulanır ki, vəziyyətin bu şəkil almasına görə bütün məsuliyyət məhz Adil Sucayevin üzərinə düşür. Bildirilir ki, idarənin yarıtmaz işi bu qurumun tabeliyində fəaliyyət göstərən bütün digər müəssisələrdə də çoxsaylı neqativ halların yer almasına səbəb olur. İlk növbədə mənbələr iddia edirlər ki, rayonda fəaliyyət göstərən bütün mədəniyyət ocaqları və eləcə də turizm müəssisələri istisnasız olaraq hər ay Adil Sucayevə müəyyən olunmuş məbləğdə “haqq” ödəyirlər. Əks halda isə, idarə müdiri tərəfindən ödənişdən boyun qaçıran müəssisənin rəhbəri üçün ciddi problemlər yaradıla bilər.
Məlum olduğu kimi, Adil Sucayev Lerik rayonundan Milli Məclisin deputatı Hüseynbala Mirələmovun bacısı oğludur. Mənbələrin deməyinə görə, Adil Sucayevin hazırda tutduğu vəzifəyə də təyinatı məhz millət vəkilinin səyləri nəticəsində baş tutub. Halbuki, bu məmurun nə ali təhsili var, nə də bitirdiyi Politexnik texnikumunda aldığı mühəndis ixtisası tutduğu vəzifəyə uyğun deyil. Amma bütün bunlara baxmayaraq, Adil Sucayev artıq uzun illərdir ki, Lerik RİH-nin başçısı Rövşən Bağırovun qardaşı Fərhad Bağırovla əl-ələ verərək, rayonda mədəniyyət və turizm sahələrinin inkişafına ayrılan dövlət vəsaitlərini talamaqla məşğuldur. Belə ki, bölgədə turizmin və mədəniyyətin inkişafı məqsədilə Mədəniyyət və Turizm Nazirliyi tərəfinən ayrılmış büdcə vəsaitləri təyinatı üzrə istifadə olunmur. Bu vəsaitlərin böyük bir hissəsi qeyri-qanuni maxinasiyalar, şişirdilmiş smetalar, müxtəlif silinmələr yolu ilə Fərhad Bağırov və Adil Sucayev tərəfindən mənimsənilir. Xatırlayırsınızsa bir müddət əvvəl də qəzetimizin səhifələrində Fərhad Bağırovun bu yönümdə fəaliyyətindən bəhs edən materiallar dərc olunmuşdu. Həmin yazılarda Lerik rayonunda bəzi binaların əsaslı təmiri zəminində yaranmış müəyyən problemlər müzakirəyə çıxarılmışdı. Materiallarda qeyd olunmuşdu ki, Lerik rayon Mədəniyyət evinin, musiqi məktəbinin və bir çox digər obyektlərin təmir işlərində çeşidli maxinasiyalara yol verilib. Həmin vgaxt təkcə rayon mədəniyyət evində görülən işlərin smeta dəyəri 485000 (dörd yüz səksən beş min) manat qiymətləndirilmişdi. Fərhad Bağırovun icraçı kimi fəaliyyəti nəticəsində əldə etdiyi gəlir isə, 160000 (yüz altmış min) manat məbləğində qiymətləndirilirdi. Göründüyü kimi Lerikin ucqar rayon olmasını şərtləndirən coğrafi mövqeyi, burada əliəyri məmurların at oynatmaları üçün kifayət qədər əlverişli şərait yaradır. Bu arada bir məqamı xüsusi olaraq qeyd etmək lazımdır ki, deyilənlər heç də rayonda ümumiyyətlə iş görülmədiyi anlamına gəlməməlidir. Əksinə, bizimdovr.az-a daxil olan məlumatlarda da dəfələrlə vurğulanıb ki, Lerikdə mütəmadi olaraq müxtəlif xarakterli əyləncə mərkəzlərinin açılması işini rayonun İcra Hakimiyyətinin başçısı Rövşən Bağırov şəxsən xüsusi diqqət mərkəzində saxlayır. Lakin problem bundadır ki, bu mərkəzlər bölgədə turizmin inkişafı, əhalinin rifahının yüksəldilməsi məqsədlərinə deyil, bəzi imkanlı şəxslərin şübhəli əyləncələrinin təmin olunmasına və əlbəttə ki, rayon rəhbərliyinin varlanmasına xidmət edir...
Materialda adı keçə bütün tərəflərin məsələyə münasibətini öyrənmək istərdik.
