Milli Təhlükəsizlik naziri Eldar Mahmudov postundan kənarlaşdırılandan sonra bu qrumda bir çox qanun pzountuları aşkar olunub. Nazirliyin bir qrup vəzifəli şəxsi barəsində həbs qəti imkan tədbiri seçilib.
Bu şəxslər arasında nazirliyini yüksək rütbəli vəzfəli şəxsləri Akif Çovdarov, Elçin Qəmbərov, Vüsal Ələkbərov və digər şəxslər var. Bu şəxslər iş adamlarından hədə-qorxu yolu ilə pul tələb etmə, adam oğurluğu, rüvət almaq və digər ağır cinayətlərdə ittiham olunurlar.
Istintaqın gedişində maraqlı faktlar ortaya çıxır. Belə ki, ötən saylarımızda “Sevil” MTK-nın çökdürülməsinə səbəbkar Eldar Mahmudov və Akif Çovdarovun olması barədə məlumat vermişdik.
Qeyd etmişdik ki, bu cinayət işinin başlanmasına səbəbkar sabiq milli təhlükəsizlik naziri Eldar Mahmudov və onun “kassir”i kimi cəmiyyətə tanınan Akif Covdarov olub. İddia olunur ki, Eldar Mahmudov Akif Covdarovun vasitəsi ilə “Sevil Massivi”nin ərazilərini ələ keçirmək istəyib.
“Sevil Massivi” ilə bağlı cinayət işinin başlanması barədə sifarişin də Eldar Mahmudov tərəfindən gəlməsi iddia edilir. O da qeyd olunur ki, Eldar Mahmudov həmin ərazilərdə öz tikinti şirkəti vasitəsi ilə evlər tikmək istəyirmiş. “Sevil Massivi”nin vəzifəli şəxslərinin məhkəmədə susması, ifadə verməməsi onlara qarşı yüksək çinli məmurlar tərəfindən təzyiqlərin olmasını işarə etmişdilər.
“Sevil” MTK-dan başlayan cinayət
Qeyd edək ki, Bakı Ağır Cinayətlər Məhkəməsində “Sevil Massivi” MTK-nın vəzifəli şəxsləri barəsində olan cinayət işi üzrə məhkəmə prosesi davam edir. “Sevil Massivi” MTK-da külli miqdarda vergilərin dövlət büdcəsindən yayındırılması faktına əsasən Vergilər Nazirliyində
başlanmış cinayət işi üzrə istintaq aidiyyəti üzrə Baş prokuror yanında Korrupsiyaya qarşı Mübarizə Baş İdarəsində davam etdirilib. Kooperativin təsisçisi Aynur Zeynalovun kooperativin direktoru Elçin İsmayılov və digərləri ilə qabaqcadan əlbir olaraq 2013-2014-cü illərdə 172 min 507 manat məbləğində sadələşdirilmiş vergini dövlət büdcəsinə ödəməkdən yayınıblar. Onlar habelə xüsusi razılıq (lisenziya) tələb olunduğu halda, belə razılıq alınmadan qanunsuz sahibkarlıq fəaliyyəti ilə məşğul olaraq 99 min 597 manat məbləğində gəlir əldə ediblər.
Buna görə də Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən Aynur Zeynalova və Elçin İsmayılova Cinayət Məcəlləsinin 192.2.2 (qanunsuz sahibkarlıq) və 213.2.2-ci (vergi ödəməkdən yayınma) maddələri ilə ittiham elan edilməklə barələrində məhkəmənin qərarı ilə həbs-qətimkan tədbiri seçilib.
Bu günlərdə isə redaksiyamıza daha bir maraqlı fakt daxil olub. Mənbə bildirir ki, son vaxtlar paytaxtda tikinti şirkətlərinin çökdürülməsinə səbəbkar Akif Çovdarov olub.
“GEN” MMC-nin açılmayan düyünü
Bu tikinti şirkətlərindən biri də “GEN” MMC tikinti şirkəti olub. Şirkətin rəhbəri Elbrus Əliyev olub. Elbrus Əliyev minlərlə vətəndaşın milyonlarla pulunu mənimsəməkdə təqsirli bilinib. Hələ 2007-ci ildə Ağır Cinayətlər Məhkəməsində mühakimə olunan və 15 il müddətinə azadlıqdan məhrum edilən Elbrus Əliyev susmağa üstünlük verib. O, məhkəmə proseslərində susmaqla pulların hara xərcləndiyini bildirməyib.
Elbrus Əliyevdən fərqli olaraq onun şəriki Asif Ələmov məhkəmə prosesində maraqlı faktlar ortaya çıxarıb. O, bildirmişdi ki, şirkətə elə adamlar gəlib-gedirmiş, onların adlarını çəkməyə qorxub: “Mən onların adını burada sadalasam, tükləriniz biz-biz dayanar. Biz qorxuruq, ad çəkmirik”.
Asif Ələmovun 9 il əvvəl səsləndirdiyi qaranlıq fikirlərə bu gün aydınlıq gətirilir. Heç kimə sirr deyil ki, Elbrus Əliyev kimi əfəl, heç bir istedadı olmayan bir şəxs bu qədər insanı aldada bilsin. Yadaki, bunun arxasında qaranlıq işlərlə məşğul olan Akif Çovdarov kimi adamlar olub.
Əgər Elbrus Əliyev mindən çox vətəndaşın 15 milyon manatını mənimsəyibsə, onda o vaxtı Elbrusun yanına gələn qoca anası bir ayaqqıbsı da olmayıb ki, ayağına geyinsin. Bütün bunlar fakt kimi ortada olur ki, Elbrus Əliyev bu qədər pulu öz başına mənimsəyə bilməz.
“GEN” MMC-nin çoxmilyonluq fırıldağı
“GEN” MMC-nin rəhbəri Elbrus Əliyev əvvəllər iki dəfə dələduzluq ittihamı ilə mühakimə edilib. O, azadlığa çıxandan sonra Əliyar Abbasov, Həbib Ağayev, Nəbi Məmmədov, Asif Ələmov, İlkin Səfərov, Ramin Əliyev, Kamran Əhmədov, mərhum yazıçı Əzizə Cəfərzadənin nəvəsi Mehparə Cəfərzadəni başına toplayaraq, “GEN” MMC tikinti şirkəti qurub. Bu şəxslər Bakıda kiçik bir ev qaralamadan 300-dən çox vətəndaşın pulunu alaraq, mənimsəyib. Elbrus Əliyev məhkəmə ifadəsində özünü təqsirli (ümumiyyətlə dələduzluq ittihamı ilə mühakimə olunanlar özlərini təqsirli bilmirlər) bilməyib. Ona dələduz deyən zərərçəkmişləri isə ittiham edib və deyib ki, “məni təhqir etməyin”. Hazırda 300-dən çox vətəndaşın pulunu mənimsəyən bu şəxslər mühakimə olunublar.
Amma ortada bir fakt var. O da vətəndaşlara dəymiş milyonluq zərər. Dəymiş ziyan bu günə kimi də vətəndaşlara ödənilməyib. “GEN” MMC-dən başqa şirkətlərdə olub ki, bunlarda vətəndaşları aldadıblar. Amma pulu hara xərcləyiblər. Bax, bu məlum deyil.
“Şakir” MMC 125 nfərin 3,5 milyonunu yeyib
“Şakir” MMC tikinti şirkətinin rəhbəri Şakir Hüseynov, onun qardaşı Vidadi Hüseynov, şirkətin əməkdaşları - İlham Hüseynov, Əşrəf Orucov və Telman Səlimov da 2008-ci ildə həbs ediliblər.
Təqsirləndirilən şəxslər Binəqədi rayonu Rəsulzadə qəsəbəsində və Yasamal rayonu Tbilisi prospektində yaşayış binası tikiblər. Onlar
vətəndaşları aldadaraq qəzalı vəziyyətdə olan binalardakı mənzilləri onlara satıblar. İş üzrə ümumilikdə 125 nəfər zərərçəkmiş tanınıb və vətəndaşlara ümumilikdə 3 milyon 547 manat ziyan dəyib.
Ağır Cinayətlərə Dair İşlər üzrə Məhkəmənin hökmü ilə təqsirləndirilən şəxslərin hər birinə 5 il sınaq müddəti olmaqla 10 il 6 ay şərti cəza təyin edilib. Məhkəmə təqsirləndirilən şəxslərin zərərçəkmişləri evlə təmin edilməsi barədə qərar qəbul edib.
Lakin Şakir Hüseynov birinci məhkəmə instansiyasında zərərçəkmişlərin evlə təmin edilməsi barədə verdiyi sözə əməl etmədiyinə görə, Bakı Apellyasiya Məhkəməsi onu zərərçəkmişlərin şikayəti əsasında həbs edib. Məhkəmə şərti cəza almış Şakir Hüseynovun barəsində 10 il 6 ay müddətinə hökm elan edib. Məhkəmə digər təqsirləndirilən şəxslərin barəsində olan hökmün isə qüvvədə saxlanılması barədə qərar qəbul edilib.
Şakir Hüseynovun da arxası güclü adam kimi tanınırdı. Hələ o vaxtlar bildirilirdi ki, Şakir Hüseynov MTN generallarından biri ilə əlaqələdir. Onun Akif Çovdarovla yaxın olması bu gün heç kimə sirr deyil. Akif Çovdarovun dələduzluq əməlləri ilə çoxsaylı tikinti şirkətlərinin rəhbərlərini çokdurməsi bu gün aydın olur.
“Şərur” MTK-nın şəriki niyə azadlığa buraxıldı?
Ağır Cinayətlərə Dair İşlər üzrə Məhkəmədə hakim Ramella Allahverdiyevanın sədrliyi ilə “Şərur” MTK-nın sahibi, “Şərurlu İsfəndiyar” kimi tanınan İsfəndiyar Axundovun şəriki olan Nazim Hüseynov Cinayət Məcəlləsinin 178-ci (dələduzluq), 320-ci (rəsmi sənədləri saxtalaşdırma) və 313-cü (vəzifə saxtakarlığı) maddələri ilə ittiham olunub. İttihama görə o, vətəndaşları evlə təmin etmək adı ilə onlardan pullarını alıb. Əvəzində Xətai rayonu General Şıxlinski və Telnov küçələrində inşa etdiyi binalarda mənzillər verəcəyini vəd edərək, vətəndaşlarla saxta müqavilələr bağlayıb. Zərərçəlkmişlərin şikayətindən sonra Nazim Hacıyev Bakı Şəhər Baş Polis İdarəsinin əməkdaşları tərəfindən həbs edilib.
Məhkəmədə prokuror Nazim Hacıyevin 8 il müddətinə azadlıqdan məhrum edilməsini istəsə də, Məhkəmə ona 70-ci (şərti cəza) maddə tətbiq etməklə 3 il sınaq müddətinə məhkəmə zalından azadlığa buraxıb. Məhkəmə hökmündə qeyd edilib ki, təyin olunmuş 3 il sınaq müddətində Nazim Hacıyev cinayət törətdiyi halda 8 il cəzada hesablanacaq.
Onu da qeyd edək ki, Nazim Hacıyev də məhkəmədə özünü günühkar hesab etməyib. O, bildirib ki, həbs edilməsi sifarişlə həyata keçirilib. Bu sifarişin nədən ibarət olduğuna isə məhkəmə aydınlıq gətirmədi. Səbəbisə o vaxtlar Akif Çovdarovun yüksək səviyyədə sözünün keçməsi olub.
“Lalə-H” tikinti şirkətinin rəhbərini təzə tutublar
Bu günlərdə isə hüquq-mühafizə orqanlarının əməkdaşları Binəqədi rayonu ərazisində yerləşən “Lalə-H” Mənzil Tikinti Kooperativinin rəhbəri Hüseynbala Ziyəddin oğlu Quliyevin barəsində cinayət işi başlayıblar.
Araşdırma zamanı məlum olub ki, 2007-ci ilin noyabr ayında Hüseynbala Quliyev şirkətə məxsus mənzili Bakı şəhər sakini, 1956-cı il təvəllüdlü Tünzalə Təhməzbəyovaya 97 min dollara satıb və kassa mədaxil orderində alqı-satqının 55 min dolara aparılmasını göstərib. Zərərçəkən xanım bu barədə xəbər tutandan sonra hadisə ilə bağlı hüquq-mühafizə orqanlarına müraciət edib. Bu cinayət işi üzrə Binəqədi rayon Prokurorluğunda araşdırma aparılır.
Məşhur “Eyfel” MMC-nin rəhbəri də içəridədir
Bakının mərkəzində bina tikən “Eyfel” MMC-nin baş direktoru Yavər Qurbanov saxta sənədlərlə vətəndaşlara ev satmaqda təqsirləndirilir. Hazırda Yasamal rayon Polis İdarəsində istintaqı aparılan Yavər Qurbanov rəhbərlik etdiyi “Eyfel” MMC tikinti şirkətinin möhürlərindən istifadə etməklə vətəndaşlara saxta sənədlər əsasında ev satmaqda günahlandırılır.
İttihama görə Yavər Qurbanov saxta sənəd tərtib etməklə yeni inşa edilən binadan həmyerlisi Rasif Sultanova mənzil satıb. Faktla bağlı 18 avqust 2009-cu ildə Yasamal rayon Polis İdarəsinin 29-cu polis bölməsinə müraciət olunub, sentyabrın 1-də faktla bağlı cinayət işi başlanıb. Bu cinayət işinin ibtidai istintaqı davam etdirilir.
Başəbəlalı “Mütəfəkkir”
2007-ci ildə Bakının mərkəzində “Mütəfəkkir” tikinti şirkətinin imşa etdiyi binanın uçması nəticəsində başlanmış cinayət işində də həbs edilənlər olub. “Mütəfəkkir” MTK-nın baş direktoru Əli Muradov, baş mühəndis Əsgər Əliyev, iş icraçıları Fərhad Həsənov, Qədir Səlimov, Mürsəl Haqverdiyev 5 il, memar Eldar Rəhimov, Bakı Şəhər İcra Hakimiyyəti Mənzil Kooperativ İdarəsinin rəisi Akif Məhərrəmov həbs ediliblər. Binanın uçması zamanı 26 nəfərin ölməsi, 3 nəfərin xəsarət alması ilə bağlı başlanan istintaq zamanı “Mütəfəkkir” MTK-nın baş direktoru Əli Muradov ürək çatışmazılığndan Bakı İstintaq Təcridxanasında ölüb. Buna görə də onun barəsində olan cinayət işinə xitam verilib. Digər təqsirləndirilən şəxslər Ağır Cinayətlərə Dair İşlər üzrə Məhlkəmədə mühakimə olunublar. Məhkəmənin hökmü ilə Əsgər Əliyev 9 il, Fərhad Həsənov 7 il, Qədir Səlimov 5 il, Mürsəl Haqverdiyev 5 il, Eldar Rəhimov isə 4 il 6 ay müddətinə azadlıqdan məhrum ediliblər. Bakı Şəhər İcra Hakimiyyəti Mənzil Kooperativ İdarəsinin rəisi Akif Məhərrəmov məhkəmə zalından azad edilib. Bu cinayət işindən Bakı Apellyasiya Məhkəməsinə apellyasiya şikayəti, Ali Məhkəməyə kassasiya şikayəti verilsə də, təqsirləndirilən şəxslərin şikayətləri təmin edilməyib.
Xırda xırda “işləyənlər” də var
Bakıda Fərdi evlər tikib satmaqla məşğul olanlar da var. Belə tikinti işləri ilə məşğul olan şəxslərin dələduzluğu üzləşənlər də çoxdur. Belə şəxslərdən biri də Bakı şəhər sakini Ələkbər Cəfərovdur. Ələkbər Cəfərov Bakının Sabunçu rayonu Balaxanı qəsəbəsində a 50-dən çox şəxsin pulunu mənimsəyib. Cəfərov tərəfindən dələduzluqla üzləşən
şəxslər hüquq-mühafizə orqanlarına müracət etsələr də, bir nəticəsi olmayıb.
Özünü öldürən iş adamları
Tikinti şirkətlərinin rəhbər şəxslərinin həbs edilməsi ilə yanaşı onların intihar etməsi, öldürlməsi və digər ağır cinayətləri də məlumdur. Tikinti biznesi sahəsində uğur qazana bilməyən və yaxud böyük miqdarda borca düşən şəxslər isə intihar etməklə canlarını qurtarırlar. 2013-cü ilin oktyabrın 14-də saat 22.00 radələrində 1975-ci ildə Laçın rayonunda anadan olan, “Oray” MMC-tikinti şirkətinin rəhbəri Qaşqay Həsənov özünü asıb. Onun meyiti şirkətin Binəqədi rayonu, 6-cı mikrorayon, 1410-cu keçid, ev 15/2-də yerləşən ofisində aşkar edilib. Şirkət rəhbərinin özünü öldürməsinin səbəbləri haqqında məlumat verilməsə də, sonradan onun küllü miqdarda borca düşməsi məlum olub.
Qeyd edək ki, Qaşqay Həsənov tikinti biznesi ilə məşğul olmazdan əvvəl hərbçi olub. Qarabağ savaşında xidmətlərinə görə, “Azərbaycan Bayrağı” ordeni ilə təltif edilib.
Xanbəyi Zamanovu niyə yandırdılar?
Bu ilin oktyabrın 25-də Bakı şəhərində “Qayğı mənzil xidmət” kooperativinin təsisçisi Xanbəyi Zamanov qətlə yetirilib. Meyiti müayinə edən məhkəmə tibb ekspertizası əməkdaşlarının verdiyi ilkin rəyə görə, avtomaşında yanan şəxs əvvəlcə “Naqan” tipli tapança ilə atəş açılaraq bir dəfə başından vurulub. Qətlə yetirildikdən sonra isə avtomaşınla birlikdə yandırılıb.
Məlum olub ki, mərhum sahibkarlıq fəaliyyətilə məşğul olub və “Şakir” MTK-nın rəhbəri Şakir Hüseynovla uzun müddət məhkəmə çəkişməsində olub. Belə ki, X.Zamanovun “20 Yanvar” dairəsi yaxınlığında torpaq sahəsi olub. Ş.Hüseynov isə həmin yeri zəbt edərək mənimsəyib. Daha sonra onlar məhkəmədə üz-üzə gəliblər. X.Zamanov məhkəmədə qalib gəlib.
X.Zamanovu qətlə yetirən 1982-ci il təvəllüdlü Abdullayev Nemət Şəmil oğlu tutularaq məsuliyyətə cəlb olunub. Onun istintaqa verdiyi
ilkin ifadəyə görə, bu hadisəni qanunsuz nikahda yaşadığı 1983-cü il təvəllüdlü Əzimova Samirə Əvəz qızı ilə birlikdə törədib.
Qeyd edək ki, bu cinayətlərin bəzilərinin üstü açılsa da, bir çox qaranlıq məqamlar hələ də qalmaqdadır. İstintaq orqanı Akif Çovdarovun cinayətinin hərtərəfli və obtektib araşdırmalı olsa, bu cinayətlərin buraxdığı qaranlıq məqamlara da aydınlıq gətirilə bilər.
