Ermənistan baş nazirinin müavini Mqer Qriqoryan və Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaar Arazdəyən-Culfa-Mehri-Horadiz dəmir yolunun bərpası və bu hissədə hərəkətin təşkilini müzakirə ediblər. Xatırladaq ki, 3 iyunda Azərbaycan, Rusiya və Ermənistan baş nazir müavinlərinin iştirakı ilə görüş keçirilib. Görüş zamanı hər 3 ölkənin baş nazir müavinlərinin həmsədrliyi ilə üçtərəfli işçi qrupunun növbəti iclası konstruktiv şəraitdə keçib. Arazdəyən-Culfa-Mehri-Horadiz marşrutu üzrə dəmir yolu əlaqəsinin bərpası və təşkili istiqamətində konkret addımların atılması ilə bağlı ümumi anlaşma əldə olunub.
DİA.AZ-ın məlumatına görə, Azərbaycan Demokratik Partiyasının sədr müavini Həsrət Rüstəmov "Şərq"ə açıqlamasında bildirib ki, Azərbaycan və Ermənistandan keçən kommunikasiyaların açılması və bu istiqamət üzrə nəqliyyat dəhlizinin işləməsi ilk növbədə Ermənistana lazımdır. Analitikin sözlərinə görə, bu, Ermənistan üçün bir dövlət kimi mövcudluq imkanı deməkdir: "Azərbaycanın alternativ beynəlxalq nəqliyyat imkanları var, qonşu ölkədə isə bu yoxdur. Görünür, Ermənistan hakimiyyəti tədricən reallığın fərqinə varmağa başlayıb. Əlbəttə, regional nəqliyyat dəhlizi bütün bölgənin xeyrinədir və bu baxımdan mümkün olan ən qısa vaxtda tikintisinə başlamaq lazımdır. Moskva görüşünə gəldikdə isə bu, aydın məsələdir ki, Rusiya Cənub-Qərb kommunikasiyalarında o qədər də maraqlı deyil. Sadəcə, prosesi öz nəzarətində saxlamaq və mümkün qədər gecikdirmək taktikasını həyata keçirir. Avropa İttifaqının nümayəndəsinin prosesdə iştirakı, şübhəsiz, mühüm əhəmiyyətə malikdir və bu həm də qarşı tərəfin proyektdə ciddi maraqlarının olmasını göstərir. Hazırda Rusiya ilə kommunikasiyaları bağlamağa məcbur olan Aİ ölkələri üçün bu marşrut olduqca önəmlidir. Həmçinin Avropanın nəqliyyat təhlükəsizliyi alternativ yolların olmasını tələb etdiyindən Aİ-nin İrəvanı bu məsələyə maneə olmamağa, əksinə, fəal iştirak etməyə həvəsləndirməsi də yaxşı anlaşılandır".