Prezident İlham Əliyev əvvəlcə 20 avqust 2013-cü ildə, daha sonra isə 3 iyul 2014-cü il tarixdə Şəki şəhərinin Aşağı Göynük-Baş Göynük - Baş Şabalıd avtomobil yolunun tikintisi ilə bağlı əlavə tədbirlər haqqında sərəncamlar imzalamışdır. Həmin sərəncamlara əsasən on səkkiz min nəfər əhalinin yaşadığı 3 yaşayış məntəqəsini birləşdirən Aşağı Göynük-Baş Göynük-Baş Şabalıd avtomobil yolununtikintisinin davam etdirilməsi məqsədilə Şəki Şəhər İcra Hakimiyyətinə əvvəlcə 2,5 milyon, sonar isə 3,3 milyon manat vəsait ayrılıb. Dövlət başçısının bu qayğısı sakinlər tərəfindən böyük razılıq və minnətdarlıq hissi ilə qarşılanıb. Bu xalqa dövlət qayğısıdır. Bəs dövlət qayğısının icrası necə yerinə yetirildi? Yerli sakinlər qeyd edirlər ki, hər dəfə yolumuzun bərpa olunacağı ilə bağlı vəsaitlərin ayrılmasını eşidəndə kəndlərdə hamı sevinirdi.Amma nə baş verdi. Sonuncu dəfə 3 iyul 2014-cü ildə 3.3 milyon manat ayrıldıqdan 40 gün sonra yolun çəkilişi birdəfəlik dayandı. Səbəb də bu olduki, pul qurtardı. Yəni, dövlət başçısı tərəfindən ayrılan 3,3 milyon pul 40 gün ərzində 3 km asfalt örtüyünün çəkilməsi ilə qutrardı. Sakinlər qeyd edirlər ki, biz əvvəlcə icraçı təşkilat olan “Azəryolservis”in 15 nömrəli Şəki Yol İstismar İdarəsinin bu bəyənatının bir zarafat olduğunu zənn etdik. Amma aylar illər keçdikdən sonra bunun həqiqət olduğunu qəbul etdik. Düz iki ildir ki, yol tikintisi yarımçıq qalmışdır. Əslində plan üzrə idarə rəisi Şahin İbadov yolun yenidən qurulması işinin 2015-ci ildə tam başa vurulacağını qeyd etmişdir. İdarənin baş mühəndisi Vahid Əyyubovun bildirdiyinə görə, Şəki-Baş Göynük-Baş Şabalıd avtomobil yolunun 11 km-i III, 4 km-i V, 2, 1 km-i isə IV dərəcəlidir. Yolda süni qurğuların tikintisi də davam edir. Ümumilikdə keçid üçün 32 ədəd metal boru quraşdırılıb. 1 ədəd 12 metr uzunluğunda diametri 1 metr olan dəmir-beton boru, 3 ədəd 36 metr uzunluğunda 1,25 metr diametrli borular da yağış və sel sularının "zərərsizləşdirilməsinə" xidmət edəcək. Tikinti işləri davam etdikcə 3 ədəd uzunluğu 4, hündürlüyü 2,5 metr olan dəmir-beton suötürücü borunun keçidi də nəzərdə tutulub. Kənd sakinlərinin prezidentə ikinci müraciəti: . Şəki rayonunun bir qrup sakininin prezident İlham Əliyevə ünvanladığı müraciətdə deyilir ki, yolun tikintisi 2014-cü ilin avqustundan yarımçıq dayanıb. "İş icraçısı hesab edilən "Azəryolservis”in Şəki rayonu üzrə yol idarəsi tenderin "qalibi” olaraq başladığı işi yarımçıq qoymasının səbəbini vəsaitin qurtarması ilə izah edir. Ümid edirdik ki, 2016-cı ilin yanvarında dövlət büdcəsindən yenə 5,8 milyon manat avtomobil yolunun tikintisinin başa çatması üçün ayrılacaq. Amma iqtisadi böhranlara görə belə bir vəsaitin bir daha olmayacağını anladıqda hamımızın qanı qaralıb. Əslində cənab prezident tərəfindən cəmi 15 km. uzunluğu olan bu yolun başa çatdırılması üçün ayrılmış 5,8 milyon manat ( məzənnəyə görə isə 7,5 milyon ABŞ dolları) pul əgər düzgün xərclənsəydi hesab edirik ki, yolumuz çoxdan hazır olardı”, - sakinlər belə hesab edirlər. Müraciətdə bildirlir ki, hazırda sözügedən yolun 5 km.-i daşlı-çınqıllıdır, 6 km.-i tam hazırdır, 4 kmş-nin isə astar hissəsi vurulub. "Yolun eni 5,5 metrdir. Yolun asfaltdan əvvəlki hissəsinə yoldan 50 metr aralıda olan daş və çınqıl material tökülüb. İşin icrası zamanı İdarənin texnikasından və işçi qüvvəsindən istifadə edilib. Həmin fəhlələrə idarə əvvəldən maaş verdiyindən onlara ayrılan əsas vəsaitdən əlavə pul ödənişləri edilməyib. Hesab edirik ki, bu yolun çəkilişi üçün icraçı təşkilat cəmi 400-450 000 manat pul xərcləyib. Burada dövlət vəsaitinin mənimsənilməsi faktı göz qabağındadır”, - sakinlər yazırlar. "Hesab edirik ki, bu böhranlı dövrdə öz varidatlarını artırmaq naminə xalqı dövlətdən narazı salanların tezliklə tapılaraq ifşa olunmasının zamanıdır. Bircə xahişimiz var ki tezliklə yolumuzu və körpümüzü pis günə qoyan dəstə üzvlərinin işlərinin qanunauyğun surətdə təftiş edilərək layiqli cəzalarının alınması barədə göstəriş verəsiniz”, - sakinlər qeyd edirlər. Yerli sakinlərin çoxsaylı müraciətlərini nəzərə alaraq faktların yerində araşdırlmasını qərara aldıq. Əvvəlcə idarənin baş mühəndisi Vahid Qəniyevin “Azərbaycan” qəzetinin 8 avqust 2014-cü il tarixli müsahibəsində qeyd edilən görülmüş işlərin heç üçdə bir hissəsini gözlərimizlə görmədik. Gördüyümüz bu oldu ki, həqiqətən də kənd sakinlərinin qeyd etdikləri kimi, yolun 5 km hissəsində ümumiyyətlə hər hansı iş görülməmiş, 4 km-i isə 3-4 sm qalınlığında və 5,5 m enində astar asfalt çəkilmiş, qalan 6-7 km isə tam asfaltlaşma işi görülmüşdür. Əgər buna keyfiyyətli asfalt yol demək mümkünsə. Niyə? Ona görə ki, tam hazır hesab edilən asfalt üzərində günbatandan sonra avtomobil idarə edərkən açıq-aşkar yolun üst örtüyünün dalğavari olması nəzərə çarpır. Yəni, hələ yol tam istifadəyə və istismara verilməmiş, yararsız hala düşmüşdür. Bu da yarımçıq görülən işin nəticəsi. Hələ bu harasıdır. Asfaltın çınqıllı hisssəsinin başlanğıcında qəribə mənzərənin şahidi olduq. Belə ki, üzü kəndə doğru baxdıqda yolun birbaşa solunda böyük bir çalanın qazıldığını gördük. Məlum oldu ki, sakinlərin də qeyd etdiyi kimi, yol kənarındakı daşlı-çınqıllı yerli materialdan gen-bol istifadə etməklə icraçı təşkilat birbaşa hesabında olan texnikanın köməyilə asanca onu yolun baş-ayaq planirovkası və asfalt örtüyün vurulması mərhələsi üçün istifadə etmişlər. Bəli, 15 nömrəli idarənin baş mühəndisinin də qeyd etdiyi kimi İdarənin balansında asfalt - beton zavodu, 4 avtoqreyder, 3 buldozer, 2 asfaltyayan maşın, 4 ekskavator, 2 yükləyici, 13 özyükünüboşaldan maşın və digər texnika var. O zaman hər şey gün kimi aydın olur. Aydın olur ki, Cənab prezident tərəfindən iki dəfə bu yolun yenidən qurulması üçün ayrılmış 5,8 milyon AZN (o vaxtkı kursa görə isə 7,4 milyon ABŞ dolları) pulla idarənin texnika və dövlətdən əməkhaqqı alan işçi qüvvənin hesabına hətta 30-35 km yola yüksək keyfiyyətli asfalt döşəmək mümkün olardı. Əgər digər özəl firmaların təklifləri nəzərə alınmasaydı. Sakinlər qeyd edirlər ki, yolun yarımçıq qalmış 5 km çınqıl hissəsini və qalan üzlük vurulmamış 3.5 km hissəsinin tam asfaltlaşması üçün 4 firma təklif etmişlər ki, əgər 200-250 min manat olarsa biz bu işi keyfiyyətlə başa vura bilərik. Yol tikintisi üzrə ixtisaslaşmış firmaların verdikləri rəylərdən belə aydın olur ki, 15 km uzunluğu olan Aşağı Göynük-Baş Şabalıd yolunun asfatlaşması üçün maksimum 750 min AZN pul kifayət edərdi. Baxmayaraq ki, dövlətin başçısı 7,5 milyon dollar civarında pul vəsaitini bu yolun yenidən qurulması üçün ayırmışdır. Yerində apardığımız araşdırmalardan, yerli sakinlərin məlumatlarından və ekspert rəylərindən məlum olur ki, dövlət büdcəsindən yol tikintisi üçün ayrılmış pulun 80 faizi mənimsənilmişdir. Amma sakinləri əsəbiləşdirən ayrılan pulun mənimsənilməsi deyil, gündəlik tozda-torpaqda iş sahəsinə gedib-gəlmələridir. Bu adamlar hətta yaxın zamanlarda yol təmirinin yekunlaşmayacağı təqdirdə etiraz əlaməti olaraq Şəki-Qax magistral yolunun 17-ci kilometrliyində yolu müvəqqəti bağlayacaqları niyyətlərində olduqlarını qeyd etdilər. Yerli sakinlər onu da qeyd etdilər ki, dəfələrlə kollektiv formada yuxarı orqanlara yol məsələsinin başa çatması barədə etdikləri rəsmi müraciətlərə reaksiya verilməməsi onları hövsələdən çıxarmaq üzrədir.
