"AZERTEXNİKA-M" MMC HANSI MƏQSƏDƏ QULLUQ EDİB?
Vüqar Güləliyev vaxtilə "Parabank"da şöbə müdiri işləmiş, indi isə "Unileazing" şirkətinin müdiri olan Zəki Sadıqovla, vaxtilə "Unibank"da məsul işdə çalışmış və indi "BTB-bank"ın direktoru olan Elşad Məmmədovla və "Muğanbank"ın direktoru işləmiş Firuz Qurbanovla "Azertexnika-M" MMC və "Avtomat quraşdırma" MMC-ni nə məqsədlə yaratmışdılar?
Son vaxtlar bank sektorundan bir-birinin ardınca bəd xəbərlər gəlir. çünki yoxlamalar nəticəsində bir çox banklarda çox ciddi pozuntular aşkara çıxır. Məsələn, bu günlərdə "Texnikabank"ın rəhbərliyi həbs edilib, "Royalbank", "Bank of Azerbaycan", "Zaminbank" və başqaları isə bir çox qaranlıq əməliyyatlarda iştirak etdikləri üçün yoxlamalara məruz qalıblar. Mətbuatdan artıq məlumdur ki, hazırda bankların çoxunda yoxlamalar gedir, orta səviyyəli bank işçiləri ən müxtəlif müddətlərdə saxlanılır, istintaqa cəlb edilir. Yüzə qədər bank işçisinin hazırda həbsdə olduğu da gələn xəbərlər sırasındadır. Həm Baş Prokuror yanında Korrupsiyaya Qarşı Mübarizə İdarəsi, həm də Milli Təhlükəsizlik Nazirliyi banklarda müxtəlif istiqamətlər üzrə araşdırma aparır. MTN çirkli pulların yuyulması əməliyyatlarını, Korrupsiyaya Qarşı Mübarizə İdarəsi isə vətəndaşların şikayətləri əsasında kredit "maxinasiya"larını araşdırır.
***
Göründüyü kimi, bank sektorunda vəziyyət ürək açan deyil. Ancaq bir məsələ də faktdır ki, bütün bu nöqsanların başında insan amili dayanır. çünki həm banklara rəhbərlik edənlər, həm də bank işçiləri vətəndaşlara xidmət əvəzinə, onların pullarını mənimsəməyi və ya müxtəlif əməliyyatlarda özlərindən xəbərsiz, el dili ilə desək, fırlatmağı qarşılarına məqsəd qoyurlar. Bu yolla həm vətəndaşı, həm də dövləti aldadırlar. Elə bu kimi bank işçilərinin əməlləri barədə redaksiyamıza müraciət ünvanlayan Bəkir Qasımov da belə aldadılanlardan biridir.
Onu bağışlamaq olarmı?
Bank işçilərinin Badamdar qəsəbəsi 1-ci massiv-48 ünvanda məskunlaşmış Laçın köçkünü, 2-ci qrup Qarabağ müharibəsi əlili Qasımov Bəkir Fərhad oğlunun başına gətirdiyi müsibətləri üst-üstə toplasaq, böyük bir kitab yazmaq olar. Hər halda sonralar adını çəkəcəyimiz bank işçiləri hələlik bu işlərdə yeganə şübhəli şəxslərdir. Bəri başdan deyim ki, iş məhkəmə və istintaq orqanlarına da gedib çıxıb. Aldanan və aldadanlarla şəxsən telefonla danışıb nümayəndələri ilə görüşmüşəm. özləri üzə çıxmasa da, əməlləri üzdədir.
B.Qasımov Respublikanın Baş Prokuroru Z.Qaralova, Milli Təhlükəsizlik naziri E.Mahmudova, daxili işlər naziri R.Usubova, ədliyyə naziri F.Məmmədova, Ombudsman E.Süleymanovaya və surəti "Təzadlar" qəzetinə ünvanlanmış şikayət ərizəsində başına gələnlər barədə ətraflı məlumat verərək aidiyyəti qurum rəhbərlərindən kömək istəyir.
"Azertexnika-M" MMC və "Avtomat quraşdırma" MMC nə məqsədə qulluq edib?
Şikayət ərizəsindən aydın olur ki, B.Qasımov işsiz olduğu üçün qohumlarından, dost-tanışlarından bu məsələdə imkan düşdükdə kömək etmələrini tez-tez xahiş edirmiş. Bir gün (söhbət 2003-cü ilə təsadüf edir) həmyerliləri- Fəqan və Elnur adlı şəxslər onu işə düzəltmək üçün Elşad və Zəki adlı bank işçilərinin yanına aparırlar. Hələ heç nədən xəbəri olmayan B.Qasımovu Elşad və Zəki çox səmimi qarşılayır və bildirirlər ki, "Sənin işin çox asan olacaq, sadəcə, mal aparıb, mal gətirəcəksən. Biz kiminlə desək onlarla işləyəcəksən".
Elə söhbətin bu məqamında Firuz adlı şəxs əlində kağızlar içəri daxil olub bildirir ki, "Təcili bu kağızlara imza at və sabahdan işə başlayacaqsan. Əmək haqqın da hələlik 200 ABŞ dolları olacaq".
Söhbətdən belə məlum olur ki, çarəsiz B.Qasımov o qədər də savadlı adam olmadığı üçün həmin kağızların nə olduğuna və nəyə qol çəkdiyinə əhəmiyyət verməyib. Beləcə müxtəlif dəzgah alətləri, neft avadanlıqları və digər mal-materialları bir ünvandan başqa ünvana aparan sürücünün yanında ekspeditel kimi fəaliyyət göstərib. Ara-sıra da yenə müxtəlif kağızlara imza atıb. Beləcə, altı ay keçir və Elşadla Zəki Bəkirə bildirirlər ki, artıq iş yerimiz bağlandı, hələlik evdə otur, lazım olanda özümüz səni çağıracağıq.
Bir müddət keçir və günlərin birində B.Qasımova Vergilər Nazirliyinin İbtidai Araşdırmalar Departamentindən zəng vururlar və onun dövlətə 121 min manat vergi borcu olduğunu bildirirlər. özünü isə departamentə dəvət edirlər. Aldığı xəbərdən dəhşətə gələn Bəkir səhəri günü deyilən ünvana gedir. Bəli, burada necə deyərlər, bütün kartlar açılır və məlum olur ki, bankirlər ¸vabank"a gedir. Yəni B.Qasımovun adına "Azertexnika-M" MMC və "Avtomat quraşdırma" MMC adlı iki firma yaradıblar və bu firmaların adı ilə iri məbləğdə (söhbət milyonlardan gedir) pullarla alqı-satqı əməliyyatları aparıblar. Təbii ki, vergidən də yayınıblar və bu səbəbdən 121 min manat vergi borcu yığılıb.
"Parabank"ın dələduz şöbə müdiri?
Bunları eşidən B.Qasımov dəhşətə gəlir. Düşünür ki, mən hara, firma hara? Mən sadə qaçqın bir adamam, mənim belə şeylərdən nə başım çıxır?
Artıq hər şey aydın idi. Deməli, Elşad, Zəki və Firuz adlı bank işçiləri B.Qasımovun adına firma açırlar və bir müddət də həmin firmanı işlədərək babat pullar götürürlər. Bəs bank işçiləri Elşad, Zəki, Firuz kimlərdir?
Sadıqov Zəki Fərda oğlu - həmin dövrlərdə "Parabank"da şöbə müdiri işləyib, indi isə "Unileazing" şirkətinin müdiridir.
Məmmədov Elşad Pənah oğlu - həmin dövrdə "Unibank"da işləyib, indi isə "BTB-bank"ın direktorudur.
Qurbanov Firuz Nadir oğlu - həmin dövrdə "Muğanbank"ın direktoru işləyib, indi isə səhhəti ilə əlaqədar müalicədədir. Bütün bu işlərdə vasitəçilik edən Vüqar Güləliyev isə MTN-in polkovnikidir. Adları çəkilən bütün şəxslərlə, eyni zamanda Z.Sadıqovun, E.Məmmədovun və F.Qurbanovun özləri və hüquqi nümayəndələri olan Elmir Hüseynovla əlaqə saxlamışıq. Həmçinin Vüqar Güləliyev ilə də telefon bağlantısı yaratmışıq. Ortaya dəhşətli faktlar çıxıb.
Bütün bunlar və əlimizdə olan çox ciddi sənədlər əsasında növbəti sayımızda daha ətraflı məlumat veriləcək.
(Ardı var)
“Təzadlar”
