QUBADA KÜTLƏVİ HƏBSLƏR BAŞLADI
Qubalılar keçmiş icra başçısı Rauf Həbibovun Qələduzdakı villasının hasarı sökmək üçün daxili qoşunlara saat 11-ə qədər vaxt vermişdilər. Hasar sökülməsə, villanı yandıracaqları ilə hədələmişdilər.
2 mart günü saat 10:30-da həmin yerə gəldik. Ərazidə polis maşını dayanıb və gələn hər maşını saxlayır. Bizi gətirən taksi sürücüsü xəbər verir ki, gecə saatlarında da polislər iş başında olublar. O, evinə getmək üçün sənədlərini göstərməli olub. Polis biz gəldiyimiz maşını da saxladıb, hara getdiyimizi soruşur. Sürücü yaxınlıqdakı kəndlərdən birinin adını çəkir, polis icazə verir. Keçmiş icra başçısı Rauf Həbibovun dünənə qədər yaşadığı villaya yaxınlaşırıq. Villanın şüşələri sındırılıb, hasarları isə yavaş-yavaş sökülür. Villanı çəkdiyimizi görən polis bizə yaxınlaşaraq çəkilişə icazə verilmədiyini deyir. Onun dediyinə görə bu ərazidə çəkiliş aparmamağı millət vəkili Vahid Əhmədov tapşırıb.
İcra başçısısın villasını tikən usta nələr dedi?
Qələduz kəndinin sakinləri ilə söhbətləşirik. Keçmiş İcra başçısı əhalinin mal-qarasını suvarmaq üçün apardığı yeganə yolu bağlayıb. “Örüş sahəsinin yolunu kəsib. Suyu da onun kimi... İki-üç kilometrlik yola su gedib çıxmır. Bircə işıqdan problemimiz yoxdur. İcra başçısı Qudyalçayın içində ayaqyolu tikib. Hansı otağına girisən hamamı, tualeti var. O niyə çayın üstündə tualet düzəldir? Onun evində mən işləmişəm, bilirəm”.
İcra başçısının villasında fəhlə işləyən sakin deyir ki, Rauf Həbibov onların məvaciblərin 3 aydan bir verib. “Özü də üç aydan sonra bir ayın pulun verirdi. Qalan ayların pulun yenə də saxlayırdı. Harada pullu işlər var idi, talışlara ötürürdü”.
Sakin dağın ətəyində gedən tikinti işlərini göstərib, Qubaya su xətti çəkdiklərini çatdırır. Bu iş də türklərə tapşırılıb.
Polis icra başçısının villasını yandıranı axtarır
Qubanın mərkəzində həbslərin başlanıldığı xəbərini alırıq. Polis idarəsinin qarşısına gələndə burada şikayətçi ilə polisin mübahisəsinə şahidlik edirik. Vətəndaş oğlunun polis idarəsində olduğunu, polis isə onlara səhv məlumat verildiyini təkid edir. Valideyn şikayətini bizə danışır. “Zahidov İntiqam əmim nəvəsidir. Dünən tutmuşdular, hələ də azad etməyiblər. (qardaşı söhbətə qoşulur) Dünən günorta ikidə qardaşımı gördüm, ondan sonra ona zəng çatmadı. Dünən uşaq bura gətirilib, ondan sonra məlumat yoxdur. Dünən axşamdan buradayıq, bizə bir kəlmə demirlər. Deputat Vahid Əhmədov deyir, uşaq buradadır, polislər deyir, yoxdur. İndi bizim deputatımız yalan deyir? Ziya müəllimlə (Nəqliyyat naziri Ziya Məmmədov) görüşmüşük. Deyib, “polisə gedin, ərizə yazın. Oğlan Quba rayonunun daxili işlər şöbəsindədir. Müəyyən işlər araşdırılıb, buraxılacaq”. Biz də uşağın itməsi haqqında ərizə gətirmişik. Polislər deyir, burada yoxdur, qəbul eləmirlər”. Bir müddət sonra polislər qəbul edirlər ki, İntiqam Zahidov idarədədir, amma tezliklə buraxılacaq.
Polis idarəsindən Azər adlı şəxs çıxır. O da mitinqdə iştirakına görə saxlanılıb. Bizə yaxınlaşaraq məlumat verir ki, səhər 10-dan idarəyə çağırılıb. Üç saat sorğu-sual edilib. İçəridə ondan keçmiş icra başçısının evini yandırıb, yandırmadığı və mitinqin təşkilatçıları haqqında nə bildiyi soruşulub. “Sual verdilər ki, evi sən yandırmısan? Dedim, yox. Təşkilatçıların kim olduğunu bilirsən? Dedim, yox. Üç saat bu sualları təkrar-təkrar verdilər”. O, polis idarəsində başqa mitinqçilərə rast gəlmədiyini deyir.
Mitinqə gəlməyə yol pulu tapa bilməyənlər…
Polis idarəsinin ətrafında işdən çıxarılan xadimə də dayanmışdı. Sima Cəfərova bu idarədə 10 il işləyib. Əsassız yerə işdən çıxarıldığını və onu polis idarəsində heç kimin qəbul etmədiyini deyir. “Otaqda zibil qalıb, qapı bağlı olub deyə aça bilməmişəm. Ona görə işdən çıxarıblar. Prezident Aparatına şikayət etmişəm. Bu idarədə də məni eşidən yoxdur. Neçə saatdır bura gözləyirəm, heç kim qəbul eləmir. 120 manat maaş alırdım, indi dolana bilmirəm”.
Çay evində və küçədə sakinlər arasında hər kəs tutulanların sayın fərqli rəqəmlərlə deyir. Bu məlumatların doğru və ya yanlış olduğu haqda heç bir rəsmi qurum açıqlama vermir. Qubanın Mədəniyyət Evinin qarşısında gödəkcələrində Baş Şəhər Baş Prokurorluğu yazılmış işçilərə yaxınlaşırıq. Onlar ərazini kameralarla çəkirlər. Maşınların dövlət nömrə nişanlarını və əhalini kameralara qeyd edirlər. Onlara yaxınlaşıb, gəliş səbəblərini soruşuruq. Qubaya mitinq məsələsinə görə gəlmədiklərini iddia edirlər. “Başqa işə görə buradayıq. Xahiş edirik mane olmayın”.
Qubanın mərkəzində və kəndlərində olarkən əhalinin çox kasıb yaşadığının şahidi oluruq. 1 mart mitinqində iştirak etməyə yol pulu tapmayanlar, elə mitinqdə iştirakına görə küçədə gecələyən gənclər də olub. Amma 2 mart günü rayonun küçələrində gəncləri görmədik. Onlar evlərinə çəkilib, hər an polis məntəqəsinə çağırılacaqlarını gözləyirlər.
