DAHA KİMLƏR İTTİHAM OLUNUR
Bir neçə il əvvəl ayrı - ayrı əmanətçilərin 38 milyon manatını dələduzluq yolu ilə mənimsəmiş “Texnikabank” ASC-nin (Bu bankın Müşahidə Şurasının sədri və pay sahibi olan Etibar Əliyein həbsindən sonra adı dəyişdirilib) Bakı Filialının sabiq rəhbəri Zal Yusifov və oğlu İslam Yusifov da daxil olmaqla, 14 nəfərin cinayət işi üzrə Ali Məhkəmənin ötən ay çıxardığı hökm zərərçəkənləri ayağa qaldırıb. Artıq zərərçəkənlər həbsdə olan bankir və yaxınlarının hərəkətləri səbəbindən vurulan zərərin ödənilməsi məqsədi ilə Ali Məhkəmənin qərarı ilə bağlı hüquqi müstəvidə yenidən mübarizəyə başlayıblar. Beləliklə, qarşıdakı həftədən Bakı Apellyasyia Məhkəməsində ölkənin silkələyə biləcək yeni məhkəmə prosesinə start verilir.
DİA.AZ «Reytinq» qəzetinin son sayında dərc olunmuş məlumata istinadın xəbər verir ki, ötən ay Ali Məhkəmə Bakı Ağır Cinayətlər Məhkəməsinin bir neçə il əvvəl verdiyi hökmdə dəyişiklik edərək, iş üzrə gözlənilməz qərar verib: «Ali Məhkəmə Cinayət Məcəlləsinin 178.3.1, 178.3.2, 313, 320.2, 179.3.1 və179.3.2-ci maddələri əmlakı müsadirə olunmaqla 15 il müddətinə həbs olunmuş Zal Zakir oğlu Yusifov, CM-nin 178.3.1 və 178.3.2-ci maddələri ilə 8 il həbsə məhkum olunmuş oğlu İslam Yusifov və CM-nin 32.5, 178.3.2 və 32.5, 179.3.2-ci maddələri cəzalandırılan qardaşı Camal Zakir oğlu Yusifov və digər yaxın qohumlarından (Behbudov Vüqar Nüsrət oğlu, Məmmədova Səmayə Hacan qızı, Əhmədov Rauf Vaqif oğlu, Hüseynov Ülvi Sərdar oğlu, Hüseynov Fəxri Müseyib oğlu, Sultanov İntiqam Bahəddin oğlu, Mürsəlov Məhəmməd Təmraz oğlu, Həsənov Elşən Həsən oğlu, Nəsirov Dağıstan Aslan oğlu, Həsənov Akif Mayıl oğlu, Zeynalov Mübariz İlyas oğlu və Qasımov Saleh Həmid oğlu) ibarət olan dəstənin işi üzrə verilmiş hökmdə dəyişiklik edib. Ali Məhkəmənin qərarı ilə adıçəkilənlər zərərçəkənlərə vurduqları zərəri ödəməkdən azad olunublar. Bundan əlavə, onların əmlaklarının müsadirəsi ilə bağlı hissə də hökmdən çıxarılıb. Bu isə illərdir dələduzluq yolu ilə vəsaitləri mənimsənilmiş zərərçəkənləri təbii ki, narazı salmalı idi. Artıq onlar Ali Məhkəmə tərəfindən ləğv olunmuş Bakı Ağır Cinayətlər Məhkəməsinin hökmündən apellyasiya şikayəti vermək üçün hüquqi yollara baş vurublar. Bakı Ağır Cinayətlər Məhkəməsi iş üzrə zərərçəkənlərin müraciətinə 31 yanar 2013-cü ildə baxıb. Lakin bu məhkəmənin həmin tarixdə verdiyi qərar məsələni bir qədər də qəlizləşdirib. İndi zərərçəkənlər Bakı Apellyasiya Məhkəməsinə müraciət edərək, Ali Məhkəmənin hökmündən şikayət vermək üçün ötürülmüş müddətin bərpa edilməsini xahiş edirlər».
Aldığımız məlumata görə, ümumilikdə 38 milyon manatları batmış zərərçəkənlərin Bakı Ağır Cinayətlər Məhkəməsinin 31 yanar 2013-cü ildə çıxardığı qərardan verdiyi şikayət artıq Bakı Apellyasiya Məhkəməsi tərəfindən icraata qəbul olunub: «Zərərçəkənlərin şikayəti Bakı Apellyasiya Məhkəməsinin hakimi Rizvan Səfərovun icraatına verilib. Adıçəkilən hakim şikayət üzrə ilkin baxış günü və saatı da təyin eləyib. Zərərçəkənlər apellyasiya şikayəti vermə müddətinin bərpa edilməsini məhkəmədən ahiş edirlər. İş üzrə prosesı fevralın 20-də, saat 14.30-da srart veriləcək».
Məlumatlı şəxs onu da deyir ki, iş üzrə zərərçəkənlər arasında ölkənin tanınmış simaları da var. Onların arasında Bakı Baş Polis İdarəsinin sabiq rəisi, hazırda Prezident Administrasiyasında işləyən general Məhərrəm Əliyevin oğlu Polad Əliyevdən tutmuş, Yasamalın keçmiş polis rəisi Zakir Babayev, həmçinin Nərimanov yol polisinin Ənvər adlı əməkdaşı və digər tanınmış şəxslərin adları da var: «Məhərrəm Əliyevin oğlunun 300 min avrosu da mənimsənib. Elə adamlar var ki, onun 1,5 milyon manatı ələ keçirilib. Həmin məbləğin müəyyən bir hissəsi geri ödənilsə də, borc tam bağlanılmayıb».
Məlumatlı şəxs sonda onu da bildirib ki, Zal Yusifovun cinayət işində hazırda adı Azərbaycan mətbuatının gündəmindən düşməyən və ötən ilin noyabr ayında ABU rektoru Elşad Abdullayevin şikayətləri əsasına həbs olunmuş Arzu Kazımovun qayının da adı hallanır: «Arzu Kazımovun qayını «Kapitalbank»ın «Tərəqqi» filialının müdiri işləmiş Hüseyn Səfərovun da adı Zal Yusifovun dələduzluq əməliyyatında hallanır. Bu, o Hüseyn Səfərovdur ki, hazırda həbsdədir. Onu da dələduzluq yolu ilə «Kapitalbank»dan 50 milyon mənimsəməkdə ittiham ediblər. Onun ittiham aktında isə fövqəladə hallar naziri Kəmaləddin Heydərovun müavini Etibar Mirzəyevlə bərabər, Arzu Kazımovun doğma qardaşının da adı çəkilirdi. Lakin sonradan onların adları istintaqdan yayındırıldı. İndisə zərərçəkənlər məhkəmə ilə bərabər, ictimai yöndə də fəaliyyətlərini mərkəzləşdirmək istəyirlər. Onların bəziləri mətbuat konfransı keçirərək, bu və ya digər məsələləri geniş şəkildə ictimaiyyətin diqqətinə çatdırmağı da planlaşdırıblar».
Yazıda adı hallananların münsaibətlərinin öyrənmək mümkün olmayıb. Onların hər birinin mövqeyini dərc etməyə hazırıq.
