Ağcabədi rayon sakini Yusifov Seyriman Əhliman oğlu tərəfindən "Hürriyyət" saytının redaksiyasına şikayət məktubu daxil olub. Şikayətçi bildirir ki, deputat Razı Nurullayevin qardaşı Hacı Hasil işlətdiyi işçilərin əmək haqlarını vermir:

“Mən, Yusifov Seyriman Əhliman oğlu, yazaraq xahiş edirəm ki, problemimi işıqlandırasınız.

Qeyd edim ki, 2023-cü il, avqust ayının 23-də Laçın rayonunun Zerti kəndində “Azstroy” şirkətində fəhlə kimi işləmişəm. Şirkətin rəhbəri deputat Razı Nurullayevin qardaşı Hasil müəllimdir. Müavini isə Nəbiyev Səddam İntizam oğludur.

2 ildən çoxdur bu şirkətdən əmək haqlarımızı ala bilmirik. Bizi əmək müqaviləsi bağlamadan işlədiblər.

Az yaşım yoxdur. Amma aldanacağıma heç vaxt inanmazdım.

Şikayətimlə bağlı demək olar ki, bütün rəsmi qurumlara müraciət etmişəm. Şəxsən mənim özümə 1 050 manat pul verməlidirlər, amma indiyədək ala bilmirəm.

Hasil müəllim deputat Razı Nurullayevin qardaşı olduğu üçün heç bir qurum onun xətrinə dəymir. Məsələ ilə bağlı Əmək Müfəttişliyinə də məlumat vermişəm. Portal açıb, bizi işə çağırmışdılar. "Bakı Abadlıq Xidməti"nin də məlumatı var ki, biz bu şirkətdə işləmişik.

Kimsə hansısa deputatın qardaşıdır deyə, biz kasıb insanları aldatmalıdır?! Nəyə görə bu məsələyə göz yumurlar? Razi Nurullayevin 1 050 manatı yoxdur ki, qardaşına desin, mənim pulumu versin?!
Bu adam qardaşına söz keçirə bilmirsə, xalqla necə həmsöhbət olacaq?!

Sizin sayt vasitəsilə rəsmi qurumlardan xahiş edirəm, o, deputat qardaşıdırsa, mən əliqabarlı fəhləyəm, biz fəhlələri "həyat döyüb", sizlər də haqsızlıq etməyin.

P.S. Təəssüflə qeyd edirik ki, bu, deputat Razi Nurullayevin ailə üzləri - qardaşı, xanımı və s. ilə bağlı redaksiyamıza artıq üçüncü müraciətdir. Hər bir şikayətçi zəhmət haqqını ala bilmədiyi üçün "Hürriyyət"ə üz tutur.

Maraqlıdır ki, R.Nurullayev qeyd olunan problemlərin həllinə çalışmaq əvəzinə, "Hürriyyət"i qərəzli olmaqda ittiham edir, aidiyyəti qurumlara şikayətlər ünvanlayır. Halbuki, biz hərə dəfə redaksiyamıza daxil olan şikayətlərlə bağlı deputatın mövqeyini dərc etməyə çalışmışıq. Amma o, bu haqda danışmaq istəməyib və telefonu üzümüzə qapadıb. Hətta ona yazdığımız mesajları da cavabsız buraxıb.