Xaçmaz rayon sakini, İkinci Qarabağ müharibəsi qazisi Rəvan Cavadov deyir ki, 2022-ci ilin sentyabr döyüşlərində ağır yaralanıb. "DİA-AZ" xəbər verir ki, aldığı güllə yarası nəticəsində ayağında ciddi zədə alıb və bud nahiyəsinə implant qoyulmalıdır.
Qazinin sözlərinə görə, ötən ilin dekabrında ona bildirilib ki, Müdafiə Nazirliyinin Baş Klinik Hospitalında əməliyyat olunacaq, lakin bu günə qədər əməliyyat icra edilməyib. Qazi deyir ki, bununla bağlı rəsmi şəkildə Yaşat Fonduna müraciət edib, fond isə onun müraciətini İcbari Tibbi Sığorta üzrə Dövlət Agentliyinə yönləndirib. Agentlik bir neçə ay araşdırma apardıqdan sonra işi TƏBİB-ə yönləndirib.
Şikayətçi deyir ki, TƏBİB gözləməli olduğunu deyir. Rəvan Cavadov deyir ki, bununla bağlı dəfələrlə Prezident Adminstrasiyasına və digər qurumlara müraciət edib, amma nəticəsi olmayıb. Ayağındakı ağrılar getdikcə şiddətləndiyini deyən qazi onun təcili əməliyyata ehtiyacı olduğunu bildirir.
Şikayətçi deyir ki, özəl xəstəxanalarda əməliyyatı olunması üçün 7080 manat lazımdır. Maddi durumu aşağı olduğu üçün əməliyyat oluna bilmir, dövlət qurumları da bu xərcləri qarşlıamır.
