“Anam rəhmətə gedəndən özümə ad günü etmirəm. O xəstələnəndə qol-qanadım qırıldı. 2 il o müddətdə ad günümü qeyd etmədim. Sonra da rəhmətə getdi, depressiyaya düşdüm, artıq 11 ildir anam rəhmətə gedib. 12 il olacaq birazdan. Ad günümü keçirmirəm. Anama çox bağlı olmuşam. Allah heç bir övladı atasız, anasız etməsin. Onlarsız çox çətindir. Çox şükür ailəm, övladlarım var, amma mən toparlana bilmirəm. Bu gün yoldaşım bir süfrə arxasında əyləşdirdi bizi. Bu şəkildə ad günüm oldu. Bir də televiziyadakı dostlarım, tanışlarım hər zaman dəvət edir, sürprizlər hazırlayırlar. Sağ olsunlar”

Bunu Moderator.az-a açıqlamasında tanınmış müğənni Xuraman Şuşalı bildirib. O daha sonra əlavə edib:

“Məncə istəsən və taleyində də o yazı varsa, istədiyin yerə gedə bilərsən. Mahnı, yaxşı komanda, yaxşı pulun olmalıdı ki, həmin pulu xərləyib piarını apara biləsən. Bir də Allah ol desə olar. Çoxu düşünür ki, hicaba keçəndən səhnə kariyeramın sonuna gəldim. Bu əsla belə deyil. O qədər soyunan müğənni var ki, heç məndə olan ruzinin biri onda yoxdur. Ruzini verən Allahdır, bəndə vasitəçidir. Mən bütün arzularımı yaradandan istəyirəm, insanlardan yox. Mən həm ailəmi, həm biznesimi, həm də sənətimi qoruyub yürüdürəm. Bu çox güc tələb edir. Və gedişatımdan da razıyam. Düzdür, indi bir az da çox sənətimə, yeni mahnılara güc vermişəm. İnanıram ki, yeni mahnılarım da mənə uğur gətirəcək” deyə müğənni bildirib.

Xuraman Şuşalı musiqimizin bu günündən də danışıb:

“Sənətdə nələrin təbliğ olunduğu göz önündədir. Əlbəttə ki, bütün bunlardan çıxış yolu da var. Sadəcə olaraq hər bir insan vicdanla çalışmalıdır. Burada əlbəttə ki, efirlərimiz də sənətçilərə dəstək verməlidir. Yaxşı olan hər bir şey təbliğ olunmalıdır. Çünki istedadlı gənclərimiz çoxdur” deyə müğənni bildirib.