Tanınmış teleaparıcı və radio dj Yusif Ağayev Moderator.az-ın suallarını cavablandırıb. dia-az.life həmin müsahibəni təqdim edir:
- Yusif bəy, öncə sizi Novruz bayramı münasibəti ilə ürəkdən təbrik edirəm. İnstaqram sosial şəbəkəsindəki paylaşımlarınızdan da görürəm ki, əlamətdar günləri, xüsusilə də bayramları ailə üzvlərinizlə, qızlarınız, onların ailə üzvləri, ələxsus da nəvələrinizlə birlikdə qeyd edirsiniz. Bu dəfə bayramı necə qeyd etdiniz?
- Təşəkkür edirəm, mən də sizi Novruz bayramı münasibəti ilə ürəkdən təbrik edirəm. Bəli, əlamətdar günlərimi hər zaman doğmalarımla birlikdə qeyd edirəm. Bu artıq mənim üçün bir ən-ənədir. Öncə qızımın ailəsi ilə, nəvələrimlə. Hər dəfə də nəvəmlə maraqlı bayram təbrikləri paylaşıram. Nəvəm Bayram belə təbrik paylaşımlarını sevir. Hətta bu dəfə onunla Polad Bülbüloğlunun “Şən Azərbaycan” adlı mahnısını da birlikdə oxuduq. Hərçənd izləyicilərim bir az mənə irad tutur, çünki nəvəm məktəbdə rus bölməsinə getdiyi üçün, Azərbaycan dilində mahnı oxumaq onun üçün bir az çətindir. Novruzun səhəri günü sevdiyim, anamın vətəni olan Şəkiyə gələrək, bacımın ailəsi ilə bayramı qeyd etməyə davam etdim. Hal-hazırda da Şəkidəyəm.
- Sosial şəbəkələrdə tez-tez valideynlərinizin, ələxsus da sənət insanlarının məzarını ziyarət edərkən, daha sonra isə arxivinizdən görüntülər paylaşırsınız. Bu yəqin ki, Yusif Ağayevin sadiqliyinin göstəricisidir.
-Tamamilə doğrudur. Haradasa bundan bir təsəlli tapıram. Bəziləri hətta məni qınayır ki, niyə bunu edirsən?! Mən həqiqətən də bundan təsəlli tapıram. Həm atamın, həm anamın, həm də həyat yoldaşımın məzarını ziyarət edirəm. Sənət adamlarının dünyalarını dəyişdiyi gün onlarla olan fotolarımı paylaşıram. Çünki korifey sənətkarların böyük əksəriyyəti verilişlərimə gəlib. Böyük sənətkarımız İlhamə Quliyevanın bir neçə il öncə məzarını ziyarət etmişdim, bu il pandemiyaya görə ziyarət etmək nəsib olmadı. Bu da mənim sadiqliyimdən irəli gəlir. Təkəbbürlü çıxmasın, bəlkə də dünyada sadiqlikdə, vəfalı olmaqda digər insanlardan fərqliyəm. Həm də bu bir növ yaşla əlaqədardır. İnsan yaşa dolduqca həyatın hər anını anlayır, həyatın hər dəqiqəsinin qədrini bilməyə çalışır. Bu dediklərimi bəlkə də indi yetərli qədər anlaya bilməzsiniz, amma mənim yaşıma çatanda başa düşərsiniz ki, 64 yaşlı Yusif Ağayev həyatda nəinki hər gününü, hə saatını, hər dəqiqəsini doğmalarının yanında olmağı, onlarla bərabər olmaq üçün əlindən gələni edir. Bu sadiqlik, vəfa göstəricisidir ki, bunu mən insanlardan başqa, ətrafımda olan digər canlılarda da görürəm.
- Yusif Ağayevin adı çəkiləndə insanın ağlına öncə radio, daha sonra isə sağlamlıq gəlir. Hamı deyir ki, ağaran təkcə saçlardır, Yusif Ağayev heç qocalmayıb.
- Bu sualın cavabını bir neçə hissəyə bölmək olar. Mənim adım çəkiləndə əlbəttə ki, öncə radio ağıllara gəlməlidir. Özü də 106 fm radiosu, başqa cür mümkün deyil! 24-cü ildir ki, mən 106 fm radiosunda çalışıram. Radio mənim üçün hər şeydir, problemim olanda belə mən radioya gələndə unuduram. Özümü bütün var qüvvəmlə verilişimə həsr edirəm. 106 fm radiosunu qurmuşam, yaratmışam, 106 fm radiosunda dj-lər yetişdirmişəm, verilişlər etmişəm. Bilən bilib, bilməyən də bilməyib. Ən çox da axşam verilişlərini aparmışam, amma səhər verilişlərim də olub. O ki, qaldı sağlamlığa... Bu insanın yaşı ilə əlaqədardır. Son illər sağlamlığım sözümə baxmır. Çalışıram ki, özümü, sağlamlığımı qoruyum. Bir sözlə, ağaran təkcə saçlar deyil, ara-sıra canım da ağrıyır.
- Müasir televiziyanın ilk simalarındansınız. Savadlı, qüsursuz danışıq tərzinizlə hər zaman tamaşaçılara sanballı verilişlər təqdim etmisiniz. Ona görə də tamaşaçılar sizi hər zaman efirdə gözləyir. Atv telekanalında “106 House”, son illərdə isə “10-dan sonra” verilişlərinə aparıcılıq etmisiniz. Bu gün niyə efirlərdə yoxsunuz?
- Bəli, tamamilə haqlısınız. Tamaşaçılar məni “106 House”, “10-dan sonra” verilişlərindən daha çox tanıdılar. “106 House” verilişi o illərdə olduqca populyar idi. Ən əsası da bu verilişin sayəsində bir çox müğənniləri böyük hərflərlə, MÜĞƏNNİ etdim. İndi artıq hamısının əli çörəyə çatıb. Bir çoxları xalq artistidir, populyardır. Bu mənim 106 fm və “106 House” verilişimdə əməyimin, zəhmətimin nəticəsidir. Niyə efirlərdə yoxam? İndiki müasir televiziyada televiziyalar peşəkar aparıcıların üzünə açıq deyil, onların sponsorlarının üzünə açıqdır. Mənim sponsorum olmadığına görə bu gün mən efirdə yoxam. Acı da olsa gerçək belədir. Dediklərimdən də heç kim inciməsin, nə peşəkar aparıcılar, nə də ki, qeyri-peşəkarlar. Efirdə olmasam da mənim verilişlərimi bu gün sevə-sevə yutub üzərindən izləyən tamaşaçılarım var.
- Gəlin etiraf edək ki, bu gün “106 House” və “10-dan sonra” verilişlərinin efirdə kopyaları var.
- Adlarını çəkdiyiniz verilişlərimin bu gün efirdə kopyaları yox, karikaturaları var (gülür). Mən buna görə sevinirəm. Demək ki, mənim illərdir efirlərdəki əməyim boşa getməyib və hardasa onlar layihə hazırlayanda mənim təqdim etdiyim, layihə rəhbəri olduğum bu verilişlərdən istifadə edirlər. Bu da çox yaxşıdır! Demək ki, mən nəsə etmişəm ki, verilişimin kopyasını çıxarmağa çalışırlar. Təəssüf ki, ortada kopya əvəzinə karikatura görürəm.
- Efirlərdəki qalmaqallara, qarşıdurmalara necə baxırsınız?
- Bunlara çox pis baxıram! Mən bunları heç vaxt etməmişəm, çünki insanları bir-birinə qarşı qaldırmaq mənlik deyil.
- İllər öncə sizin aparıcılıq etdiyiniz “10-dan sonra” verilişində də belə bir hadisə baş vermişdi. İki tanınmış aşığın arasında baş verən qalmaqal böyük olaya çevrilmişdi.
- Bu bir olay idi və reklam fasiləsi zamanı baş vermişdi. Verilişə yeni təyin olunmuş, özünü peşəkar adlandıran “redaktor” öz “PEŞƏKARLIĞINI” sübut etmək üçün bunu efirə verdi. Hərçənd, mən bunun, orada olan söyüşün efirə getməsinin əleyhinə idim. Bununla da həmin redaktor mənim təqdim etdiyim, layihə rəhbəri olduğum “10-dan sonra” verilişinin, kanalın nüfuzuna böyük bir ləkə salmış oldu.
- Sizcə aparıcı mütləq şəkildə ali təhsilli olmalıdır?
- Ali təhsil aparıcı üçün mütləqdir, mütləqdir, mütləqdir! Əfsuslar olsun ki, bu dəqiqə efirlərimizdə nəinki ali təhsil, heç orta təhsili olmayan, sponsorları olan aparıcılar var. Özü də kifayət qədərdir! Bu da əlbəttə ki, məqbuledilməz haldır. Aparıcının ali savadı, dünyagörüşü olmalıdır. Bir dəfə mütaliə etməyən, klassiklərimizin əsərlərini oxumayan kimlərsə efirlərdə at oynadırlar. Bu ən azından televiziyaya, tamaşaçıya təhqirdir. Milli Teleradio və Radio Şurası tərəfindən aparıcıların ali təhsili araşdırılmalıdır. Efirlərdə yalnız və yalnız ali savadlı, dünyagörüşü olan aparıcılar olmalıdır. Bu mütləqdir və qaçılmazdır.
- Bəs Yusif Ağayev nə vaxt efirə qayıtmağı düşünür?
- Çox maraqlı sualdır. Bunu əlbəttə ki, zaman göstərəcək, məndən asılı deyil! Təbii ki, fakturama, səviyyəmə uyğun sanballı veriliş olarsa apararam. Nə vaxt efirə qayıdacağım isə bəlli deyil. İndi artıq sosial şəbəkələr var, izləyicilər bağlı, feyk səhifələrdən nələrsə yazırlar. Kimlərsə oxuyub bundan keçə bilirlər, mən isə bunu həzm edə bilmərəm. Mənim digər aparıcılardan fərqli olaraq nəinki övladlarım, hətta nəvələrim də var. Bu mənim üçün məqbuledilməzdir! Mən televiziyada etdiyimi etmişəm, indi ancaq çevir tatı, vur tatı olan verilişlərdir. Hansı kanalı açırsansa, hamısında müğənni, müğənni, müğənni! Azərbaycan televiziya məkanı təkcə müğənnidən ibarətdir?! Ekspert müğənni, hər şeyə cavabdeh müğənni, qonaq müğənni! Cəmiyyətimizdə müğənnidən başqa məsləyin sahibi yoxdurmu?! Özü də ki, sanballı yox, qalmaqallı müğənnilər! Hansılar ki, efir naminə istənilən qalmaqala gedirlər, verilişlərin xüsusi senari ilə hazırlanmış qalmaqallarına uymağa hazırdırlar. O müğənnilər ki, onların böyük reklama ehtiyacları var. Ona görə də efirlərdə özlərini ən axırıncı yola qoyurlar! Nəyin naminə?! Anlaya bilmirəm!
