“Müharibə olmayacaq, sülh olacaq”.

Musavat.com xəbər verir ki, bunu Ermənistanın Baş naziri Nikol Paşinyan iyunun 11-də keçirdiyi brifinqdə bildirib.

O, seçkiqabağı kampaniya dövründə ““Vətəndaş Müqaviləsi” partiyası konstitusion çoxluq əldə etməsə, sentyabrda müharibə baş verəcək” bəyanatı ilə bağlı suala cavabında deyib ki, müharibə olmayacaq. Baş nazir vurğulayıb ki, Ermənistan hakimiyyəti sülhü qorumaq üçün bütün imkanlardan istifadə edəcək.

Milli Məclisin üzvü Arzuxan Əlizadə Musavat.com-a Paşinyanın fikirlərini şərh edərkən xatırladıb ki, seçkiqabağı təşviqat prosesində Nikol Paşinyan “revanşist qüvvələrin hakimiyyətə gələcəyi təqdirdə Azərbaycanla yenidən mhüharibə olacaq” tezisindən istifadə edib.

Deputat qeyd edib ki, Nikol Paşinyan səs çoxluğu ilə qalib gələrək hökuməti təkbaşına formalaşdırmaq imkanı əldə edib: “Nikol Paşinyan konstitusiyon çoxluq əldə edə bilməsə də, istənilən halda seçkilərin qalibidir. Ermənistandakı revanşist qüvvələr təxminən 35-40 faizə qədər səs əldə ediblər. Deməli, Ermənistan cəmiyyətində hələ də revanşist qüvvələrə dəstək verən kütlə var. Paşinyan ölkə daxilindəki ab-havanı bilir. Revanşist qüvvələr Samvel Karapetyan və Robert Koçaryanın rəhbərliyi altında parlamentə daxil olublar. Deməli, onların elektoratı da revanşist fikirlərə səs veriblər. Gələcəkdə bu qüvvələr ilk növbədə Ermənistan daxilində revanş götürə, cəmiyyətdə yenidən müharibə ab-havası formalaşdıra bilərlər. Bununla da Paşinyan hakimiyyətinə ciddi təhdid yarada bilərlər ki, Paşinyan ilk növbədə öz hakimiyyətinin qorunub saxlanmasına çalışır.

Eyni zamanda, sözügedən qüvvələr Azərbaycanla münasibətlərin korlanmasına, sülh müqaviləsinin imzalanmasına maneə törətməyə çalışa bilər. Bu, ehtimal olunan versiyalardan biridir. Çünki konstitusiyon çoxluq əldə edə bilməyən Paşinyan Konstitusiya dəyişikliyi, xüsusilə Azərbaycana qarşı ərazi iddialarını ehtiva edən müddəanın çıxarılması ilə bağlı məsələdə problemlə üzləşə bilər. Revanşist qüvvələr referendumda da erməni cəmiyyətinə təsir göstərə bilərlər. Bu isə arzuolunmaz nəticə deməkdir”.

A.Əlizadə əlavə edib ki, Azərbaycan erməni cəmiyyətində revanş əhval-ruhiyyə ilə yaşayan kifayət qədər böyük kütlənin olduğunun fərqində olmalıdır.

“Azərbaycan güclü olduqca onlar heç bir addım ata bilməzlər. Ancaq istənilən halda Ermənistanla sülh müqaviləsi imzalanacaqsa, bu amil mütləq diqqət mərkəzində olmalıdır”.