Ötən əsrin 80-ci ilərində Zaqatalanın Muxax kənd sakinləri üçün çəkilən su xətləri istismar müddətini başa vurub, filtirlər yararsız vəziyyətə düşüb.

Bizim.Media-nın yerli bürosu xəbər verir ki, mənbəyini Böyük Qafqazdan götürən Muxaxçay ilin bütün fəsillərində gur sulu əsasən də lilli olur.

Yaz və payız aylarında yağıntılar müddətində isə çayın suyu günlərlə bulanıq gəlir. Rayonun ən iri yaşayış məntəqələrindən olan və əhali sayı 10 minə çatan Muxax və qonşu Zəyəm kəndlərinin içməli su təminatı bu çaydan götürülür. Sakinlərin sözlərinə görə hələ ötən əsrin 80-ci illərində 7-8 km-dən çox su xətti çəkib, böyük həcmli su hovuzları inşa ediblər.

Son bir neçə ilə kimi kənddə içməli su problemi olmayıb. Lakin sön dövrlər əsasən də yaz və payız aylarında, daşqınlar nəticəsində sel-suları suyu bulandırır, içilməz hala gətirir, çör-çöp, müxtəlif tullantılar suya qarışaraq həyətlərə qədər gəlib çatır. Bu səbəbdən sakinlər təklif edirlər ki, su xətti nəzarətə götürülsün, dövlət yeni xətlər çəksin və onlar bütün tələblərə cavab verən su ilə təmin olunsunlar.

Kənd sakini Məmmədəmin Əliyev bildirir ki, hələ kolxoz dövründə Muxaxın qarşıdakı 10 illər üçün su problemi həll olunub. Lakin sonrakı dövrdə yerli əhali xəttdəki problemləri maddi baxımdan aradan qaldıra, əsasən su filtirlərini dəyişə, dağılan yerləri bərpa edə bilmədikləri üçün məsələni “Azərsu” ya həvalə ediblər. Beləcə, “Azərsu” nun yerli qurumları bir neçə il kəndi içməli su ilə təmin edib.

Sakinlər qeyd edir ki, kəndə suyun verilməsinə nə qədər ki, “Azərsu” nəzarət edirdi elə də ciddi problemlər yaşanmırdı. Lakin əhalinin su pulunu ödəməkdən yayınması xətlərin dolmasına, filtirlərin sıradan çıxmasına səbəb olub.

Sakinlərin xahişi budur ki, müvafiq təşkilatların iştirakı ilə yeni layihə hazırlansın, suyun mənbəyində müasir filtirlər qurulsun.

Yeri gəlmişkən ötən əsrin 80-ci illərində kənd üçün iki böyük su anbarı da inşa edilib. Biz sakinlərlə əraziyə baxış keçirən zaman kənd icra nümayəndəsi Səlahəddin Adamov da buraya təşrif buyurur. Bir neçə ay əvvəl bu vəzifəyə təyin olunmasına baxmayaraq kəndin sosial qayğıları ilə yaxından tanış olan gənc icra nümayəndəsi sakinlərin narahatlığından xəbərdar olduqlarını və bu istiqamətdə ciddi iş aparıldığını bildirir.

“Gördüyünüz bu su xətləri və hovuzlar ötən əsrin 80-ci illərində tikilib. Su mənbələri isə buradan 7-8 km dağlara doğru uzanır. Orada vaxtı ilə filtirlər qoyulmuşdu. Elə bu yaxınlarda yağan yağışlar nəticəsində filtirlərin dolması işimizi xeyli çətinləşdirsə də rayon Su Melorasiya Sistemlərinin İstismarı İdarəsi əməkdaşlarının köməyi ilə məsələni tez bir zamanda həll etdik” deyən icra nümayəndəsi sözlərinə onu da əlavə edir ki, kənd ağsaqqalları, ziyalılarla ilkin fikir mübadiləsi aparıblar.

Qarşıdakı günlərdə kənd camaatı ilə geniş tərkibdə görüş keçirməyi, əvvəlki illəridən qalan borcların mərhələli yığılması üçün çalışacaqların bildirən Səlahəddin Adamov işə başlamaları üçün müvafiq idarələrlə ilkin razılığa gəlindiyini də vurğuladı.

Məsələ ilə əlaqədar Zaqatala Su Melorasiya Sistemlərinin İstismarı idarəsi ilə də əlaqə saxladıq. Bildirildi ki, Muxax kəndinin su mənbələrində və xətlərində bir müddət əvvəl baş verən problem yerli icra orqanları ilə birlikdə qısa müddətdə aradan qaldırılıb.

Hazırda kənd icra nümayəndəliyi ilə birlikdə əvvəlki illərdən qalan borcların mərhələli şəkildə yığılması istiqamətində maarifləndirmə tədbirləri görülür. Müəyyən vəsait yığılan kimi işlərə başlanması nəzərdə tutulur.