Bakı şəhəri, Yasamal rayonu, Mirəli Seyidov küçəsi 18 ünvanında yaşayan sakinlərin böyük narazılıqları var.
Belə ki, onlar hazırda yaşadıqların binanın yarasız hala düşdüyünü bildirir və digər bir sıra problemləri də dilə gətirərək kömək istəyirlər.
Məsələ ilə bağlı bir sıra real addımlar atsalar da, hələlik razı qalacaqları bir hal yoxdur.
Bildirilir ki, Bakı şəhəri, Yasamal rayonu, Mirəli Seyidov küçəsi 18 ünvanında yerləşən çoxmənzilli kooperativ bina 2009-cu ildə universitet əməkdaşları üçün inşa edilmişdir.
Hazırda binada 400-ə yaxın yaşayış sahəsi ilə yanaşı, qeyri-yaşayış sahələri də mövcuddur. Binanın dövlət qurumları tərəfindən qəbul edilməsindən, mülkiyyət hüquqlarının payçılara keçməsindən sonra sakinlər iddia edirlər ki, bina qanunsuz və şəffaf olmayan şəkildə idarə olunur. Sakinlərin sözlərinə görə, mövcud idarəetmə nə qanunvericiliyin tələblərinə cavab verir, nə də real problemlərin həlli ilə məşğuldur.
Gununsesi.info redaksiyaya daxil olan şikayət əsasında xəbər verir ki, problemlərdən biri də son aylarda yağan yağışlara görədir:
“Son aylarda intensiv yağıntılar binanın vəziyyətini daha da ağırlaşdırıb. Qaraj sahəsi faktiki olaraq istifadəyə yararsızdır, yağış suları birbaşa qaraja axır, avtomobillər üçün ciddi risk yaradır. Belə ki, qarajda elektrik kabelləri açıq şəkildə görsənir və axan sular məhz kabel xətləri ilə təmasdadırlar. Bu məsələ ilə bağlı bina sakinləri dəfələrlə həm idarəetməyə, həm də kütləvi informasiya vasitələrinə müraciət etsələr də, binanın idarəçiliyini həyata keçirən “Bakı Universiteti” MMC-nin direktoru Hikmət Cəfərov binada hər hansı ciddi problemin mövcudluğunu qəbul etmir. Halbuki sakinlərin təqdim etdiyi foto və videogörüntülər vəziyyətin tam əksini sübut edir. Sakinlərin bildirdiyinə görə, Hikmət Cəfərov iddia edir ki, binanın sahibi məhs odur. Sakinlər KİV-lərə müraciət etdikləri zaman H.Cəfərov jurnalistlərə hücüm etmiş və bununla bağlı videogörüntülər də internet platformasında yayılmışdır”, – deyə bildirilib.
Hətta bu hal ilə bağlı gülməli vəziyyətin də yaradığı qeyd edilib, o cümlədən FHN-nə müraciət də edilib. Bildirilir ki, şikayətlərin artmasından sonra isə problemin köklü həlli əvəzinə, MMC rəhbərliyi tərəfindən su axan yerlərə vedrələrin qoyulması qərara alınıb. Sakinlər bu yanaşmanı məsuliyyətsizlik və vəziyyətə ironik münasibət kimi qiymətləndirirlər. Sakinlərin Azərbaycan Respublikasının Fövqəladə Hallar Nazirliyinə müraciətindən sonra 5 blokdan ibarət yaşayış kompleksinin 3 blokunda istifadəyə yararsız və təhlükəsizliyi təmin olunmayan 3 lift müəyyən edilərək istismarı məhdudlaşdırılmışdır. Lakin diqqət çəkən məqam ondan ibarətdir ki, FHN əməkdaşları binanı tərk etdikdən cəmi bir gün sonra həmin liftlərin istismarı yenidən bərpa olunmuşdur. Sakinlər bu qərarın təhlükəli olduğunu bildirdikdə, MMC direktoru Hikmət Cəfərov nasazlıqların aradan qaldırıldığını bəyan etmişdir. Buna baxmayaraq, bina sakinləri liftlərdə heç bir real təmir və ya texniki iş aparılmadığını iddia edir və bu vəziyyətin insanların həyatına birbaşa təhlükə yaratdığını bildirirlər.
Şikayətçilər bu istiqamətdə əlavə addımlar da atıblar. Belə ki, yaranmış vəziyyətdən narazı qalan sakinlər Azərbaycan Respublikasının Mənzil Məcəlləsinin 141.2-ci maddəsinə əsasən Mənzil Mülkiyyətçiləri Müştərək Cəmiyyətinin (MMMC) yaradılması istiqamətində addımlar atmaq niyyətlərini açıqlayıblar və bununla bağlı elanlar hazırlayıblar. Lakin sakinlərin sözlərinə görə, MMC rəhbərliyi bu elanların bina daxilində paylaşılmasına mane olur, fəal sakinlər barəsində isə əsassız şəkildə polisə və digər dövlət qurumlarına şikayətlər göndərilir. Bu addımlar sakinlər tərəfindən təzyiq və qorxu mühiti yaratmaq cəhdi kimi dəyərləndirilir.
Şikayətçi sakinlər məsələnin yağış tərəfinə daha çox diqqət çəkir, Hikmət Cəfərovdan narazılıqlarını isə bir daha dilə gətirirlər:
“Məsələnin ən narahatedici tərəfi isə yağış sularının birbaşa binanın bünövrəsinə axmasıdır. Mütəxəssislərin də qeyd etdiyi kimi, bu hal uzunmüddətli perspektivdə binanın dayanıqlığını zəiflədə, qarşısıalınmaz və həyati təhlükə yarada bilər. Buna baxmayaraq, sakinlər iddia edirlər ki, Hikmət Cəfərov bu təhlükə ilə bağlı indiyədək heç bir ciddi addım atmamış, problemin miqyasını isə görməzdən gəlməyə davam edir”.
