Məlum olduğu kimi, son aylarda heyvanlar arasında dabaq xəstəliyinin yayılması səbəbilə ölkə üzrə heyvan bazarlarının fəaliyyətinin məhdudlaşdırılması həm alıcıları, həm də satıcıları çətin vəziyyətdə qoymuşdu.

İndi isə İmişli, Beyləqan, Şamaxı, Göyçay, Salyan, Göygöl və Bərdə rayonlarında heyvan bazarlarının mərhələli şəkildə fəaliyyətə başlaması ölkədə bu sahədə vəziyyətin tədricən normallaşdığını göstərir.

Heyvan bazarlarının açılması bazara çıxarılan yerli diri heyvanların sayını artıraraq, Monqolustan və digər ölkələrdən idxal olunan ətə olan tələbatı azalda bilər. Həmçinin, bazarlarda yenidən alqı-satqı prossesinin bərpa olunması vətəndaşlarda ət qiymətlərinin ucuzlaşacağına dair ümidləri artırıb.

Bazarların açılması ətin qiymətinə təsir göstərəcəkmi?

Mövzu ilə bağlı "Cebheinfo.az" - a açıqlamasında Liberal İqtisadçılar Mərkəzinin sədri Akif Nəsirli bildirib ki, heyvan bazarlarının aylarla bağlanması ölkədə ətin qiymətinə və heyvandarlığa ciddi zərər vurdu:

“Fermerlərin çoxu bazarların bağlanması səbəbindən fəaliyyət istiqamətini dəyişdi. Bu isə gələcəkdə heyvanların ölkədə baş sayını sürətlə azaldacaq. Maraqlıdır ki, hökumət bu zərbənin izahını da vermir. Məqsəd nə idi, heyvandarlığı bir qədər də çökdürməkmi? Elə isə buna nail oldular... Məqsəd bazarlarda qayda-qanun yaratmaq idisə, bunu bazar fəaliyət göstərdiyi halda da etmək olardı. Elə bil ki, alma dərmək üçün alma ağacını kəsdilər.

Bu ideya kimindirs,ə o, bu xalqın və hökumətin dostu deyil. Bazarların mərhələli şəkildə açılması qərarı bir tərəfdən bazarın işləmə mexanizmini pozdu, digər tərəfdən fermerlər və alıcılar üçün itkilərə səbəb oldu”.

Onun sözlərinə görə, ət çatışmazlığı olan bir ölkədə bazarların uzun müddət bağlanması, yerli istehsalın satış imkanlarını məhdudlaşdırdı, fermerləri itkiyə məruz qoydu və qiymətlərin yüksəlməsinə səbəb oldu:

“Əgər bazarlar normal şəkildə işləməyə davam etsəydi, fermerlər canlı heyvanlarını bazara çıxara, alıcılar da ətə daha rahat çıxış əldə edə bilərdilər. Bazarların açılması bu vəziyyətə müəyyən təsir göstərəcək. Əvvəla, yerli diri heyvanlar kütləvi şəkildə bazarlara çıxacaq və bazarda ətin təklifi artacaq. Bu isə ət qiymətlərinə təzyiq yaradaraq onları bir qədər ucuzlaşdıra bilər.

Eyni zamanda, yerli istehsal artdıqca, idxal ətinə olan tələbat azalacaq və ölkə iqtisadiyyatı üçün müəyyən qədər asılılığı azaldacaq. Lakin bazarların açılması təkbaşına bütün problemləri həll etmir, logistika, qiymətlərin sabitliyi və istehsalın davamlılığı da vacibdir”.

Ekspert qeyd edib ki, bu gün heyvandarlıqla məşğul olan fermerlərə əsaslı dövlət dəstəyi yoxdur, ona görə də "bazar oyunu"ndan sonra bu seqmentin tənəzzülü sürətləndirəcək:

“Bazarların bağlanması zərərli oldu, açılması isə vəziyyəti tədricən normallaşdıra və qiymətlərin stabilizasiyasına bir qədər kömək edə biləcək.

Amma bu prosesin daha sürətli və koordinasiyalı şəkildə həyata keçirilməsi fermerlər üçün daha əlverişli olardı. Əvvəlki şərtlər dəyişmədiyindən, uzunmüddətli mərhələdə heyvandarlığın tənəzzülü davam edəcək, idxaldan asılılıq və yerli ətin bahalaşması şiddətlənəcək”.