44 günlük Vətən müharibəsində iştirakına görə müxtəlif mesallarla təltif olunmuş Ramil İbadov indi də dələduzluğa görə məhkum edilib. O, ev sənədləşdirmək adı ilə aldadıb, pul ələ keçirməkdə ittiham olunur.
Bizimyol.info xəbər verir ki, 1984-cü il təvəllüdlü Ramil İbadov ailəvi dostları olan Seyranə xanıma məxsus, Sabunçu rayonu, Bakıxanov qəsəbəsi, Ə.Ağayev küçəsində yerləşən evin sənədləşməsi üçün ondan 6100 manat pul alıb. Zərərçəkmiş əvvəl ona 4100 manat, daha sonra 2000 manat pul verib. Lakin verilən vədə əməl olunmayıb.
Keçmiş hərbçi olan təqsirləndirilən şəxs ittihamı qəbul edib. O, bildirib ki, 2024-cü ildə ordudan tərxis olunub. Onun sözlərinə görə, zərərçəkmiş Seyranə xanımı uzun illərdir tanıyır. Günlərin birində eşidib ki, Seyranə xanım yaşadığı evin sənədlərini düzəltmək istəyir, bu işdə ona köməklik göstərməyə çalışıb. İfadəsindən o da məlum olub ki, zərərçəkmiş qızıllarını girov qoyaraq, 4100 manatı düzəldib ona verib. 2000 manatı isə “iPhone” markalı mobil telefon kreditlə götürüb, sonra onu nağd qiymətə satmaqla düzəldib: “Sənədlərin düzəldilməsi 4-5 aya həll olunmalı idi. Özünün bunu düzəltməyə səlahiyyətim yox idi. Adam tapıb düzəltmək istəyirdim. Pul xərcləndiyi üçün alınmadı”.
Zərərçəkmiş bildirib ki, yaşlı qadındır və Ramilə inanıb, lakin aldadılıb. Ona dəymiş ziyan tam ödənilsə də, təqsirləndirilən şəxslə barışmaq fikri yoxdur, ondan şikayətçidir. Gələcəkdə də ona qarşı dəymiş mənəvi zərərin ödənilməsi tələbi ilə iddia qaldırmaq niyyətindədir.
Ramil İbadov Vətən müharibəsindən sonra “Hərbi xidmətlərə görə”, “Kəlbəcərin azad olunmasına görə” və “Vətən müharibəsi iştirakçısı” medalları ilə təltif olunub.
Hakim hökm çıxararkən bunu, həmçinin onun himayəsində 3 azyaşlı uşağın olmasını, zərərçəkmişə dəymiş ziyanın tam ödənilməsini və s. halları nəzərə alıb. Ramil İbadova Cinayət Məcəlləsinin 178.2.4-cü (xeyli miqdarda ziyan vurmaqla dələduzluq) maddəsi ilə 1 il 3 ay azadlığın məhdudlaşdırılması cəzası verilib. Onun istintaq və məhkəmə dövründə ev dustaqlığında olduğu müddət də çıxılıb və üzərində 7 ay 8 gün cəza saxlanılıb. Bu müddətdə o, gecə saat 23.00-dan səhər saat 6-ya qədər yaşadığı evdən çıxmamalı, elektron qolbaqla gəzməli, Bakı ərazisini tərk etməməlidir.
