Bu ilin yanvar-avqust aylarında ölkəyə gələn turistlərin sayı ötən ilin eyni dövrü ilə müqayisədə 1,6 % azalıb.

Bu rəqəm, faiz baxımından azalma kiçik görünə bilər, lakin müşahidələr göstərir ki, son illər turizm sahəsində azalan tendensiya davam edir.

Bəs bunun səbəbləri nələrdir?

Mövzu ilə bağlı "Cebheinfo.az"-a açıqlamasında turizm üzrə ekspert Cabir Dövlətzadə bildirib ki, Azərbaycanda turizm sahəsində rəqabət davamlı olmalıdır.

Onun sözlərinə görə, bunun üçün ilk növbədə quru sərhədlərinin açılması vacibdir:

“Rəqibimiz olan Gürcüstanda, eləcə də Ermənistanda quru sərhədləri açıq olduğu üçün həmin ölkələrdə turizmin inkişafı yüksələn xətlə davam edir. Bu da istər-istəməz onların bizdən öndə olmasına gətirib çıxarır. Diqqət edilməli digər mühüm məsələlərdən biri ölkədə tədbirlərin, xüsusən də konsert və konqreslərin sayının artırılmasıdır.

Əgər məşhur konsertlərin keçirilməsi mütəmadi xarakter alsa, bu, Azərbaycanda eyni zamanda konsert və əyləncə turizminin inkişafına şərait yarada bilər. Nəzərə alsaq ki, qonşu Ermənistanda artıq konsert turizmi müəyyən dərəcədə tətbiq olunur, eləcə də Gürcüstanda”.

Ekspert qeyd edib ki, turizmin inkişafı üçün onun şaxələndirilməsi də vacibdir:

“Düşünürəm ki, yaxın gələcəkdə yaxta turizminin inkişaf etdirilməsi önəmlidir. Çünki turistlər həm yaxta turlarından istifadə etməli, həm də dənizi kəşf etmə imkanına malik olmalıdırlar.

Bunun üçün gəmi turlarının təşkil olunması, rəqabətədavamlı və maraqlı xidmətlərin təklif edilməsi, eləcə də turistlərin gününü əyləncəli keçirməsi mühüm şərtdir.

Ümid edirik ki, gələn ildən etibarən Azərbaycanda daha geniş və şaxəli turizm sektoru formalaşacaq və ölkə bu sahədən böyük qazanc əldə edəcək”.