Xətai rayonu, Fəzail Bayramov küçəsi 1156 ünvanında (Bakı Əyləncə Mərkəzinin yanı) yerləşən 24 mərtəbəli 4 binanın sakinləri təhlükə ilə üz-üzə olduqlarını deyir. Onlar bildirir ki, təhlükə mənbəyi isə binalardan ikisinin altında yerləşən avtoyuma məntəqəsidir.

Bizimyol.info xəbər verir ki, II və III binanın zirzəmisini əhatə edən avtoyuma məntəqəsinin fəaliyyətinin dayandırılması üçün sakinlər illərdir müxtəlif dövlət orqanlarına şikayət edirlər. Hətta hüquqi müstəvidə də mübarizə aparırlar. Bu məsələ bir dəfə Ali Məhkəməyə qədər gedib çıxıb. Oradan bir daha yenidən araşdırılması üçün apellyasiya məhkəməsinə geri qaytarılıb. Lakin Bakı Apellyasiya Məhkəməsi şikayətçi sakinlərin əleyhinə qərar verib. Onlar yenidən Ali Məhkəməyə kassasiya şikayəti veriblər.

Məlumat üçün qeyd edək ki, həmin binaları zaman-zaman adı müxtəlif qalmaqallarda hallanan “Sahil-D Kompany” inşa edib. Şirkət binaların inşasına 2006-cı ildən başlasa da, ora mülkiyyətçilər 2016-cı ildən köçüb yaşayıblar.

Binalardakı 450-dən artıq mənzilin, eləcə də binların altındakı xeyli qeyri-yaşayış sahəsinin idarəçiliyi əvvəllər Mənzil-Tikinti Kooperativinin idarəçiliyində olub. Lakin sonradan “Xətai-33” Mənzil Mülkiyyətçilərinin Müştərək Cəmiyyəti yaradılıb. Bu qurum Ədliyyə Nazirliyində qeydiyyatdan keçib. 2022-ci ilin əvvəlindən binaların idarəçiliyi də ona verilib.

Cəmiyyət avtoyumanın fəaliyyəti ilə bağlı da iclas keçirib, onun bağlanması ilə bağlı qərar qəbul ediblər. Lakin obyektin sahibləri bununla razılaşmayıb. Onlar iddia edir ki, başqa mülkiyyətçilər kimi, o da 12 il əvvəl “Sahil-D Kompany” ilə müqavilə bağlayıb, 226 kvadrat metrlik qeyri-yaşayış sahəsini alıb.

Şikayətçi sakinlər isə bildirir ki, ona satılmış 226 kvadrat metrlik ərazinin 87 kvadrat metrlik hissəsi ümumi istifadədə olan avtomobil yollarına və insanların liftlərə yaxınlaşmaq üçün gedib-gəldiyi yola düşür.

Onlar qeyd edir ki, həmin ərazinin satılması haqda 2013-cü il tarixli müqavilə üzrə verilən cizgi-plan müqavilədən 10 il sonra - “Sahil-D Kompani” şirkətinin hüquqi sədri olmayan Adilağa Hüseynov tərəfindən verilib. O, MMC-nin sədri olmadığı üçün belə bir plan-cizgi vermək hüququ yoxdur: “Etibarsız cizgi-plan üzrə hüquqlardan sui-istifadə olunur. Ümumi istifadədə olan avtomobil yoluna və sakinlərin istifadə etdiyi liftə yaxınlaşmaq üçün yolda avtoyuma fəaliyyəti göstərir, bununla da bina sakinlərinin hüquqları pozulur. Həmin hissə eyni zamanda liftlərin giriş-çıxışını da zəbt etməkdədir”.

Sakinlər əlavə edib ki, avtoyuma məntəqəsi zirzəmidə yerləşdiyinə və həmin məntəqənin havalandırma şəraiti olmadığına görə avtomaşınların üzərinə və təkərlərinə vurulan kimyəvi maddələr buxarlanaraq insan sağlamlığına ciddi təhlükə yaradır. Bu da “Avtomobil yolları haqqında” qanunna qadağan edilib. Bu qanunun 34-1-ci maddəsinə əsasən, avtomobil yollarına kanalizasiya, sənaye və çirkli suları, yolların hərəkət hissəsinə yanacaq-sürtkü materialları, kimyəvi maddələr, bitum və beton axıtmaq, habelə daş, çınqıl, qum və ot tökmək, yol hərəkətinin təhlükəsizliyinə mane olan şərait yaratmaq qadağandır.

Bina sakinləri onu da qeyd edir ki, avtoyuma məntəqəsi zirzəmidə yerləşir. Mənzil Məcəlləsinin 35.1 və 37.1 maddəsinə əsasən, zirzəmi sakinlərin ümumi paylı əmlakıdır. Ümumi paylı əmlak konkret kiməsə aid ola bilməz.

“Ali Məhkəmə işi apellyasiya instansiyasına qaytaranda iki sual qoymuşdu: Bu avtoyuma məntəqəsi binaların özəl təməlinə və onların dayanıqlılığına ziyan vururmu? Bina sakinlərinin həyatı üçün təhlükə törədirmi? Lakin təəssüf ki, apellyasiya məhkəməsində hakim bu suallara cavab tapmadan, layihə sənədlərinə diqqət yetirmədən, zirzəmiyə baxış keçirmədən avtoyuma məntəqəsinin fəaliyyətini qanuniləşdirən qərar qəbul etdi. 2000 nəfər Azərbaycan vətəndaşının təhlükəsiz yaşamaq hüququnu isə nəzərə almadı”, -.sakinlər gileylənir.

Onlar bildirir ki, ən qorxulu hadisə avqustun 8-də səhər saat 10.10-da avtomaşınların yuyulduğu ərazinin 2-3 metrliyində yerləşən elektrik şitindəki güclü partlayışla müşahidə edilən yanğın oldu. Bu zaman 110 mənzilin elektrik sayğacları və ona xidmət edən qurğular yanıb. Nəticədə binada yaşayanlar işıqsız qalıb: “Yanğın və partlayışa səbəb avtoyumanın yaratdığı nəmişlik və onun buxarıdır. Çünki bu avtoyumanın havalanma sistemi yoxdur. Hadisə gecə baş versəydi, 24 mərtəbəli binadan insanları təxliyə etmək mümkün olmayacaqdı. İşıq kəsilən kimi liftlər dayanacaqdı. Binanı bürüyən tüstü neçə insanın həyatına son qoya bilərdi. Biz istədik ki, Bakı Apellyasiya Məhkəməsinin hakimi Akif İsgəndərov əraziyə baxış keçirsin, olanları özü görsün. O isə imtina etdi. Bütün ədalətsizliklər arasında ən dözülməzi qanun adı altında törədilən ədalətsizlikdir. Bu, insanı da çox ağrıdır, dövləti də sarsıdır”.

Qeyd edək ki, daha bir məhkəmə prosesi isə avtoyuma məntəqəsinə çıxarış alınması üçün gedir. Obyektin sahibləri Daşınmaz Əmlakın Dövlət Kadastrı və Reyestri Publik hüquqi Şəxsinin 1 saylı Bakı Ərazi İdarəsinin üzərinə ona çıxarış verilməsi öhdəliyinin qoyulması tələbi ilə məhkəmədə iddia qaldırıb. “Sahil-D Kompany” şirkəti və “Xətai-33” Mənzil Mülkiyyətçilərinin Müştərək Cəmiyyəti üçüncü şəxslər qismində məhkəmə prosesinə cəlb olunub.

Avtoyuma məntəqəsinin rəhbərləri iddia ərizəsində göstərib ki, F.Bayramov küçəsi 1156 ünvanında 2013-cü ildə 140 min manat ödəyərək, “Sahil-D Kompany” şirkətinin tikdiyi binadan 226 kvadrat metrlik qeyri-yaşayış sahəsi alıb. Əlində maliyyə arayışı, müqavilə arayışı var. Həmin ünvanda başqa qeyri-yaşayış sahəsi alanlara çıxarış verilsə də, ona verilməyib.

Bakı İnzibati Məhkəməsi avqustun 5-də iddianı təmin edib və çıxarış verilməsi barədə qərar çıxarıb. Prosesə üçüncü şəxs qismində qoşulan sakinlər bu qərardan apellyasiya şikayəti veriblər. Onlar hesab edir ki, bu qərar qanunsuzdur və ləğv olunmalıdır.