“8 avqust tarixli Vaşinqton sazişində mən heç bir iqtisadi komponent görmürəm. Mən yalnız qonşunun (Azərbaycanın) öz ərazisinin başqa hissəsinə (Naxçıvan MR) çıxış əldə etmək istəyini görürəm”.

“Cebheinfo.az”-ın məlumatına görə, “UBS Maliyyə Bankı”nın vitse-prezidenti və Silikon Vadisində maliyyə məsləhətçisi olan Mark Çenian sentyabrın 30-da “Bir dam altında olan ölkələr” konfransında belə deyib. Onun sözlərinə görə, iqtisadi komponenti artırmaq üçün yolu Sevan (Göyçə) ərazisindən keçməklə, qərbə doğru da çəkmək olar. O qeyd edib ki, Ermənistanda davamlı iqtisadi artımı təmin etmək üçün kredit maliyyələşdirilməsinə deyil, kapitala diqqət yetirməklə bank investisiyalarının inkişaf etdirilməsi vacibdir.

Ekspert əlavə edib ki, insan resurslarının inkişafı, o cümlədən dünya şöhrətli universitetlərin yaradılması da mühüm şərtdir. “Ölkə özəl sektora kapital qoyuluşuna hazır olmalıdır. Əgər belə şərait yaradılarsa, davamlı inkişaf üçün möhkəm zəmin yaranar”, - Çenian yekunlaşdırıb.

Mark Çenian maliyyəçi olsa da, heç bir iqtisadi əsaslandırması olmayan fikirlər onun Cənubi Qafqazdan, ümumiyyətlə, xəbərsiz olduğunu göstərir. Eyni zamanda, amerikalı “ekspert”in Zəngəzur dəhliznin açılmasına qarşı çıxan erməni təbliğatının təsiri altında olduğu da açıq hiss olunur. Çenian “Tramp marşrutu”nda heç bir iqtisadi komponent görmədiyini iddia edir.

Halbuki Tramp adminstrasiyasını bu layihəyə cəlb edən edən başlıca səbəb Zəngəzurdan keçəcək nəqliyyat dəhlizinin idarə edilməsində iştirak etmək və tranzit daşımalarından əldə olunacaq gəlirin 40 faizinə sahib olmaqdır. Biznes maraqlarını geosiyasi maraqlardan üstün tutan Prezident Tramp “Orta dəhliz”in perspektivdə dünyanın ən gəlirli nəqliyyat-ticarət marşrutlarından biri olacağını görür. Bu baxımdan, Zəngəzur dəhlizi Çin, Mərkəzi Asiya və Avropa arasında ötürücülük funksiyasına görə mühüm strateji rola malikdir.

Lakin adıçəkilən marşruta Türkiyə, İran, Pakistan, Ukrayna, Yaxın Şərq ölkələri də maraq göstərir. Çünki Rusiya ilə Ukrayna arasında müharibənin daha da genişlənməsi, eyni zamanda Qırmızı dənizdəki hərbi toqquşmalar yük daşımalarına ciddi problemlər yaradır. Zəngəzur dəhlizi isə məsafə və təhlükəsizlik baxımından daha əlverişlidir.

Ona görə də bu tranzit gəlirlərindən əldə edilən vəsait zəif iqtisadiyyata malik Ermənistanın inkişafına səbəb ola bilər. Bütün bunlara nail olmaq üçün Ermənistanın blokadadan çıxması lazımdır. Lakin nəqliyyat marşrutları blokdan açılmadan qeyd edilən proses baş verə bilməz. Yəni Ermənistan Azərbaycanla nəqliyyat-kommunikasiya əlaqələrini bərpa etməli, ilk növbədə, Zəngəzurdan keçən dəmir yolu və avtomobil yollarını açmalıdır.

Çünki bu yollar regional və strateji əhəmiyyətə malikdir. Çenianın təklif etdiyi Göyçə ərazisindən keçən yollar isə regional yükdaşımalar üçün əlverişli sayılmır. Həmin ərazinin relyefi də buna imkan vermir. Sadəcə olaraq, Çenianın iddiaları vaxtilə Ermənistan hökumətinin irəli sürdüyü və iqtisadi potensialı olmayan “Sülh kəsişməsi” layihəsini yenidən gündəmə gətirməklə Zəngəzur dəhlizinə maneə yaratmaq məqsədi daşıyır.