Yeni tədris ilinin başlamasına baxmayaraq, yenə də məktəblərdə bir sıra sahələrdə eyni problemlər qalmaqdadır.

Onlardan biri də son illərdə formalaşmış, ibtidai sinif şagirdlərinin öz çəkilərindən də ağır çantaları daşımasıdır. Uşaqlar həmin çantalarda öz dərs vəsaitlərindən əlavə vəsiatləri götürmək məcburiyyətində qalırlar.

Əlavə dərs vəsaitlərinə nə dərəcədə ehtiyac var?

Məsələ ilə bağlı təhsil üzrə ekspert Əmrah Həsənli “Cebheinfo.az”-a bildirib ki, bu gün təhsildə ciddi bir problemlərdən biri də ibtidai siniflərlə bağlıdır:

“Belə ki, 6 yaşında məktəbə uşaqların çantası özlərindən ağırdır. Valideynin üzərinə düşən yük isə uşağın çantasından da ağırdır. Məktəbdə dövlətin təsdiqlədiyi dərsliklər var. Ancaq bununla kifayətlənmirik. Nəşriyyatlar bəzi müəllimlərə ödənişsiz şəkildə vəsait hazırlatdırır, müəllif hüququ verir və sonra da həmin vəsaitləri məcburi şəkildə uşaqlara satdırırlar. İbtidai sinif şagirdləri gündəlik dərslərlə kifayət qədər yüklənib.

Bu yaşda uşağın vəzifəsi oxumağı, yazmağı öyrənmək, sadə riyazi əməliyyatları mənimsəməkdir. Bunu bacarmamış uşağın üzərinə əlavə test kitabları, “İç dəftəri”, vəsaitlər yükləmək nə dərəcədə doğrudur? Mən bütün əlavə vəsaitlərin əleyhinə deyiləm. Faydalı vəsaitlər təbii ki, var. Ancaq məcburiyyət ən böyük problemdir. Valideyn bu kitabları almağa məcbur edilir. Əks halda “uşaq dərsdən geri qalacaq” qorxusu yaradılır. Bəzi nəşriyyatlar isə deyir ki, “Məktəb dərslikləri kifayət etmir”.

Sual edirəm, əgər kifayət etmirsə, bunu Elm və Təhsil Nazirliyi həll etməlidir, yoxsa özəl nəşriyyat? Məktəb dərsliyi kifayət edirsə, əlavə dərslik məcburi olmamalıdır. Uşaq motivasiya ilə dərsə getməlidir. Dərsdən əzilərək, yorularaq gəlməli deyil. Biz ibtidai sinifdə uşağı elmə sevdirməliyik. Çantanın ağırlığı ilə dərsdən soyutmamalıyıq. Burada dövlət qurumlarının ciddi şəkildə nəzarət mexanizmlərini qurmasına ehtiyac var. Təhsil biznes olmamalıdır. Uşaq dərs yükündən əzilməməli, valideyn də əlavə xərclərin altında qalmalı deyil”.