"Azərbaycanla Rusiya arasında münasibətlərin belə gərgin olması hər iki tərəf üçün müəyyən problemlər yaradır. Ancaq bunun günahkarı yalnız və yalnız Rusiya tərəfidir. Rusiyanın neoimperialist mövqeyi, sərhəd qonşuları olan dövlətlərlə bərabərhüquqlu, qarşılıqlı hörmət çərçivəsində münasibətlərin qurulmasına əngəl törədir".
Bu fikirləri Redaktor.az-a politoloq Elçin Xalidbəyli Azərbaycan-Rusiya arasında olan vəziyyətdən danışarkən bildirdi. Onun sözlərinə görə, Rusiya strateji tərəfdaşlığı da, strateji müttəfiqliyi də yalnız və yalnız Rusiyanın maraqlarına uyğun davranılması kimi qəbul edir:
"Yəni qarşı tərəfin maraqlarını və mövqeyini qətiyyən nəzərə almaq istəmir. Azərbaycan isə güclü dövlətdir və Rusiyanın maraqlarının ifadəçisi rolunda çıxış eləmək niyyətində deyil. Bərabərhüquqlu, qarşılıqlı faydalı münasibətlər Azərbaycan üçün əsas prioritetdir. Rusiya nə vaxt bu reallığı, beynəlxalq hüquq normaları çərçivəsində Azərbaycanın xarici siyasətini qəbul edərsə, o zaman da Azərbaycan və Rusiya arasında münasibətlərin normallaşa biləcəyinə ümid bəsləmək ola bilər. Ancaq hələlik Rusiya müəyyən siqnallar ötürsə belə, Azərbaycanla münasibətlərin normallaşdırılmasına hazır görünmür. Çünki Kreml öz davranışları ilə, Rusiya siyasi dairələri öz təhdidləri ilə Azərbaycanla düşmənçilik münasibətlərinə daha yaxın olduqlarını göstərirlər".
Elçin Xalidbəyli hesab edir ki, yaxın vaxtlarda bu gərginliyin aradan qaldırıla biləcəyi o qədər də inandırıcı təsir bağışlamır:
"Bu gərginliyin aradan qaldırılması üçün ilk növbədə Rusiyanın neoimperialist mövqedən geri çəkilməsi lazımdır. Azərbaycanla beynəlxalq hüquq normaları çərçivəsində bərabərhüquqlu münasibətlər qurması lazımdır və ən əsası isə Azərbaycana qarşı təhdidkar mövqedən imtina etməsi lazımdır. Azərbaycanın vurulmuş sərnişin təyyarəsinə görə Azərbaycandan üzr istəməsi lazımdır. Ən əsası isə, Rusiya ərazisində azərbaycanlılara qarşı zorakılıq kampaniyasının dayandırılması lazımdır. Yəni hələlik isə bütün bunların heç birisi müşahidə olunmur. Müşahidə olunmadığına görə də, yaxın vaxtlarda iki ölkə arasında münasibətlərin normal məcraya dönə biləcəyinə ümidlər o qədər də yüksək deyil".
