“Azərbaycan prezidenti milli və dövlətçilik maraqlarımızı müdafiə edir. Mənim fikrimcə, belə hallarda dövlət başçısının təklənməsi halı olmamalıdır. Prezident bir bəyanat verirsə, hakimiyyətin digər qolları, eləcə də müxalif qüvvələr mövqelərini ifadə etməlidirlər. Həqiqətən də 1920-ci ilin aprelində Azərbaycan işğal edilib, minlərlə insanın həyatına son qoyulub. Hesab edirəm ki, Azərbaycan Milli Məclisi 1920-ci ilin aprel işğalına siyasi qiymət verməlidir”.

Bunu “Reytinq” qəzetinə açıqlamasında Azərbaycan Demokrat Partiyasının (ADP) sədri Sərdar Cəlaloğlu Azərbaycan prezidentinin tarixi faktları dilə gətirməsindən sonra Rusiyanın bəzi şovinist dairələri tərəfindən hücuma məruz qalmasından danışarkən deyib.

S. Cəlaloğlunun fikrincə, əgər Azərbaycanın dövlət başçısı öz çıxışında 1920-ci ilin 28 aprelini Azərbaycanın bolşevik Rusiyası tərəfindən işğal edilməsi kimi qiymətləndirirsə, parlament bu məsələləri müzakirə etməli, o hadisələri sovet Rusiyası tərəfindən müstəqil Azərbaycan Respublikasının işğalı kimi dəyərləndirməlidir. “Eyni zamanda iqtidarda və müxalifətdə olmasından asılı olmayaraq, bütün qüvvələr bu məsələdə prezidentin yanında durmalıdırlar. Çünki prezidentin bu fikirləri obyektivlik, gerçəklik və milli dövlətçiliyimizin ən böyük həqiqətlərindən biridir”,- deyə ADP sədri əlavə edib.

Müsahibimiz bildirib ki, dövlət başçısının tarixi baxımından çıxışı Azərbaycanın rus və sovet imperiyası tərəfindən əsarətini aydınlaşdıran, bizim SSRİ və Rusiyanın tərkibində olmağımızın səbəblərini ortaya qoyan ən ciddi arqumentdir: “Belə hallarda prezidentin çıxışı ölkə daxilində ciddi müzakirə edilməli, onun ətrafında böyük siyasi dəstək formalaşdırılmalıdır. Dövlət orqanlarının müxtəlif strukturları bu məsələlərə münasibət bildirməlidirlər. Çünki, bu kimi hallarda prezidentin çıxışı Rusiyanın şovinist dairələrinin hücumlarına məruz qalır. Buna imkan vermək olmaz! Odur ki, prezidentin çıxışı ölkəmizdə ciddi müzakirə edilməli, fikir və mövqelər ifadə olunmalıdır”.

S. Cəlaloğlu bu məsələni tamamilə obyektiv, Azərbaycanın həm çar, həm də sovet Rusiyası tərəfindən işğal edilməsinin növbəti təsdiqi və buna etirazı kimi qiymətləndirir: “Prezidentin bu fikirləri tarixi və hüquqi baxımdan tam doğrudur, faktı deyib. Rusiyada bunun necə qarşılanmasından asılı olmayaraq, Azərbaycan cəmiyyəti bu məsələdə prezidentin yanındadır və yanında da olmalıdır. Prezidentin dövlət və milli maraqlarımızla bağlı səsləndirdiyi istənilən fikir ictimaiyyət tərəfindən ciddi şəkildə dəstəklənməlidir. Hətta prezidentə qarşı olan hücumlara görə, Rusiya səfirliyinin önündə aksiya da keçirilə bilər. Əgər bunu hakim partiya təşkil edərsə və biz dəvət olunarıqsa, şübhəsiz, iştirak edərik. Dövlətimizin müstəqilliyi və suverenliyi məsələsində prezidenti xarici qüvvələr qarşısında tək qoymaq bizim ən böyük yanlışlığımız olardı. Mümkündür ki, bəzi qüvvələr bunda maraqlı ola bilər. Amma mən hesab edirəm ki, belə hallarda prezidentin ətrafında geniş xalq kütlələsinin dəstəyi formalaşdırılmalıdır”.