Milli Məclisin Xarici müdaxilələrə və hibrid təhdidlərə qarşı komissiyası Rusiya Federasiyası ərazisindən ölkəmizə qarşı kütləvi surətdə informasiya kampaniyasına start verilməsi ilə bağlı bəyanat yayıb.
Bəyanatda bildirilib ki, avqustun 27-də Azərbaycan Respublikasının Prezidenti İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsi yayılandan dərhal sonra, Rusiya Federasiyası ərazisindən ölkəmizə qarşı kütləvi surətdə informasiya kampaniyasına start verilib.
"Monitorinq zamanı müəyyən edilib ki, aparıcının Zəngəzur dəhlizi ilə bağlı sualına Azərbaycan Prezidentinin tarixi faktlara əsaslanan cavabı kontekstdən çıxarılaraq saxtalaşdırılmış və ya təhrif olunmuş formada rus oxucusuna təqdim edilir.
Rusiya cəmiyyətində anti-Azərbaycan təbliğatını alovlandırmaq məqsədi ilə təşkil edilən kampaniya televiziya kanalları və xəbər saytları, sosial media platformaları və müəyyən təsiretmə roluna malik radikal mövqeli şəxslər vasitəsilə aparılır.
Kampaniyada Rusiya ərazisində fəaliyyəti qadağan edilmiş və məhdudlaşdırılmış “Facebook”, “Instagram” və “X” kimi platformalardan, habelə digər ölkə vətəndaşlarının adından yaradılan sosial media profillərindən və botlardan da geniş istifadə olunduğu müşahidə edilib.
Kampaniyada diqqət çəkən digər bir element isə Azərbaycanın sosial media seqmentinin hədəfli reklamlar vasitəsi ilə seçilməsi və orada ölkəmizin suverenliyi və ərazi bütövlüyünə qarşı təhdidedici fikirlərin yer almasıdır.
Onu da qeyd etməliyik ki, bu cür ikrah doğuran kampaniyaların Azərbaycanda ictimai rəyə heç bir təsiri yoxdur. Bu cür fəaliyyətlər yalnız Rusiya cəmiyyətini yalan faktlara söykənərək qızışdırmağa, qonşu dövlətlərlə əsassız düşmənçiliyə sürükləyir. Rusiyanı narahat edən “rusofobiya” sindromunun köklərini “Z” blogerlərin fəaliyyətində axtarmaq lazımdır.
Xarici müdaxilələrə və hibrid təhdidlərə qarşı komissiya aidiyyəti dövlət qurumları ilə birgə dövlətimizə qarşı aparılan bu qeyri-dost hərəkətləri yaxından izləyir və müvafiq qabaqlayıcı tədbirləri davam etdirir", - bəyanatda deyilir.
Tanınmış jurnalist, Azərbaycan Mətbuat Şurasının Etika Komissiyasının sədri, media eksperti Qulu Məhərrəmli "Sherg.az"a bildirib ki, hazırda Rusiya təkcə Azərbaycana deyil, digər qonşularına, Avropa dövlətlərinə qarşı da müxtəlif, ən iyrənc və çirkin formalarda dezinformasiya yaymaqla, informasiya müharibəsi aparmaqla rəvac verməklə məşğuldur:
"Bu nəyə xidmət edir? Birinci növbədə, artıq Rusiya anlayır ki, bölgədə əvvəlki gücü və təsiri yoxdur. İkincisi, Kremlin Cənubi Qafqaz ölkələrini əvvəlki kimi idarə etmək, onların daxili işlərinə qarışmaq və xarici siyasətlərinə müdaxilə imkanları tükənməkdədir. Çünki Putinin “Rusiyanı qüvvətləndirmək” adı altında Ukraynaya qarşı apardığı işğalçılıq siyasəti, dağıdıcı və qanlı müharibə bütün dünya xalqlarının, o cümlədən qonşu dövlətlərin Rusiyadan üz çevirməsinə səbəb olub. Bununla yanaşı, Rusiya hələ də müəyyən gücə malikdir, xüsusilə ənənəvi olaraq dezinformasiya fabriki çox sürətlə və güclü şəkildə işləyir. Bu kontekstdə də Azərbaycana qarşı informasiya müharibəsi aparılır. Azərbaycan qonşuluq siyasətini balanslı şəkildə davam etdirir – həm Rusiyaya, həm İrana, həm də digər qonşu dövlətlərə hörmətlə yanaşır. Ermənistanla sülhə can atması, Vaşinqtonda və digər platformalarda bağlanan barış bəyannamələri Azərbaycanın nə qədər sülhpərvər dövlət olduğunu göstərir. Rusiya isə bunu həzm edə bilmir".
Ekspert əlavə edib ki, Kreml mövcud konfliktlərdə özünü hegemon kimi aparır:
"Eyni zamanda rəsmi Moskva Azərbaycanın milli dövlət statusu və müstəqilliyi ilə qəbullanmır. Həmçinin "AZAL"a məxsus təyyarənin vurulduğu üçün üzr istəmir. Nəticədə, Rusiya sərhədlərdən kənarda və ölkə daxilində, diasporaya qarşı geniş informasiya hücumları təşkil edir, kütləvi informasiya vasitələrində və sosial şəbəkələrdə təzyiq göstərir.
Prezident İlham Əliyevin Zəngəzur dəhlizi ilə bağlı dedikləri Rusiyanın özünün də bildiyi və dəfələrlə etiraf edilmiş məsələdir. Bu reallığı nəzərə almaq lazımdır. Tarixi faktdır ki, 1920-ci ildə Bolşevik Rusiyası Azərbaycanı işğal edib və bunun üstündən keçmək mümkün deyil. Azərbaycan isə Rusiyadan münasibətlərini qaydaya salmasını və siyasətini dəyişməsini gözləyir".
