Ermənistanda ən nüfuzlu qurum ölkənin silahlı qüvvələridir.
Respondentlərin 72 faizi silahlı qüvvələrin fəaliyyətindən tam və ya qismən razıdır. İkinci yerdə 58 faiz reytinq göstəricisi ilə Erməni Apostol Kilsəsi qərarlaşıb. Əvvəlki sorğu ilə müqayisədə kilsənin reytinqi 10 faiz artıb.
“Cebheinfo.az”-ın məlumatına görə, Amerika Beynəlxalq Respublikaçılar İnstitutunun iyunun 16-dan 25-dək keçirdiyi sorğunun nəticələri bunu göstərir.
Erməni Apostol Kilsəsi 18-35 yaş arası ermənilər arasında ən yüksək reytinqə malikdir. Bu göstərici 70 faizdən çox təşkil edir. Baş nazirlik ofisinə əhalinin 38 faizi, məhkəmələrə 31 faizi, Milli Assambleyaya isə cəmi 24 faizi tam və ya qismən etibar edir. Yeri gəlmişkən, sorğuda iştirak edən vətəndaşlar ən çox 72 faiz Milli Məclisin, 52 faizi isə məhkəmələrin işindən narazıdır.
Qeyd edilən sorğunun kifayət qədər reallığı əks etdirdiyini söyləmək olmaz. Çünki son 5 ildə Ermənistan ordusu Azərbaycanla müharibədə iki dəfə ağır məğlubiyyətə uğrayıb. Ermənistan Silahlı Qüvvələrinin strukturu dağılıb və Nikol Paşinyan hakimiyyəti hərbi sistemi yenidən qurmağa məcburdur. Belə olan təqdirdə, Ermənistan SQ-nin fəaliyyətindən xalqın böyük əksəriyyətinin razı olması inandırcı görünmür.
Kilsənin reytinqinin yüksək olmasına gəlincə, bu, Ermənistan cəmiyyətində kilsənin siyasi-ideoloji mövqeyinin güclü olduğunu göstərir. Bu göstəricinin ən azı 70 faiz təşkil etməsi barədə məlumatlar Ermənistan mediasında əvvəllər də səslənib. Bu barədə deyilənlər Ermənistan cəmiyyətində kilsənin siyasi-ideoloji mövqeyinin güclü olduğunu təsdiq edir.
Ermənistan hakimiyyətinin son vaxtlar Eçmiədzin kilsəsi ilə qarşıdurmada qalib gələ bilməməsinin səbəbi də bununla izah oluna bilər. Baş nazir aparatının reytinqi son illər xeyli aşağı düşüb. Yəni hökumətə etimad göstərənlərin sayı xeyli azalıb. Lakin Paşinyan elektoratının böyük hissəsini qoruyub saxlaya bilib. Ümumilikdə, hökumət kilsəyə qalib gələ bilməsə, 2026-cı il iyunun 7-də keçiriləcək parlament seçkilərində qələbə qazanmaq şansı az olacaq.
“Cebheinfo.az”
