Ali məktəblərə qəbul imtahanları başa çatıb.

Bu il ali məktəblərə qəbul üçün 130 mindən çox abituriyent qeydiyyatdan keçib. Həmin göstərici ötən illə müqayisədə təqribən 12 min artım deməkdir. Buraxılış imtahanlarında 119 mindən çox şagird iştirak edib.

2025/2026-cı tədris ili üçün ali təhsil müəssisələrinə tələbə qəbulu ilə bağlı ümumilikdə 60489 plan yeri ayrılıb. Ötən illə müqayisədə plan yerləri 2.21% (1309 yer) artırılıb. Plan yerlərinin 28401-i dövlət sifarişlidir. Dövlət sifarişli yerlərin sayı ötən illə müqayisədə 2.04% və ya 568 yer artıb.

Qeyd edək ki, qəbul imtahanları başa çatdıqdan sonra toplanan ballar əsasında ali məktəblərə seçim başlayır. İxtisas seçimi, kodlaşdırma zamanı adətən valideynlər müxtəlif təhsil ekspertlərinə, bu sahə ilə məşğul olan şəxslərə müraciət edirlər ki, bu da müəyyən məbləğdə ödəniş müqabilində həyata keçirilir.

Bu il valideynlər kodlaşdırma üçün nə qədər məbləğ ödəməli olacaqlar?

Təhsil ekspertləri “Cebheinfo.az”-a bildiriblər ki, hazırda kodlaşdırma qiymətləri fərqlidir.

Belə ki, bu seçimi 100, 200, 250 manata həyata keçirənlər var. Peşə məktəbləri, magistraturaya seçim əsasən 100 manatdır. I-V qruplar, subbakalavrlar üçün 150 manat, əlavə təhsil qeydiyyatı 200 manat təşkil edir.

Təhsil üzrə ekspert Kamran Əsədov isə “Cebheinfo.az”-a bildirib ki, hər bir abituriyentin ali məktəbə ixtisas seçimini özü etmək hüququ var:

“Bu il ali məktəblərə 110 mindən çox abituriyent elektron ərizə verib. Bu xidməti müəyyən şəxslərin ödənişli əsaslarla həyata keçirməsində pozuntu yoxdur. İxtisas seçimi ilə bağlı konsultasiya xidməti göstərən şəxs məcburi kimisə çağırmır və yaxud da həmin şəxslərin kiməsə maddi, mənəvi borcu yoxdur ki, bu prosesdə ona ödənişsiz xidmət göstərsin.

Ödənişsiz xidmət göstərməklə bağlı Dövlət İmtahan Mərkəzinin Abituriyent Məlumat Mərkəzi var. Abituriyentlər və onların valideynləri istəsələr bu xidmət üçün həmin mərkəzlərə müraciət edə bilərlər.

Heç kimin cəmiyyətdə ödənişli əsaslarla xidmət göstərənləri tənqid etmək, qınamaq imkanı yoxdur. Kim istəsə, bu qiyməti 500, yaxud 50 manat edə bilər. Yəni burada bir pozuntu yoxdur. Sadəcə bu xidməti göstərən şəxslər qeyd olunan sahə üzrə təcrübəlidirlər”.

K.Əsədov bildirib ki, burada söhəbt ixtisas seçimi prosesinin çətinliyindən gedir:

“Hər il görürük ki, yüksək bal toplayan abituriyentlər prosesdən kənarda qalırlar. Çünki onlar əlinə “Abituriyent” jurnalını alır, öz ballarını görür və fikirləşirlər ki, keçənilki bal bu il də təkararlanacaq. Ancaq bu xidməti göstərən şəxslər plan yerləri, abituriyentlərin sayı üzərində müəyyən təhlillər aparırlar. Bu vaxt, resurs itkisidir.

Ona görə də bu xidmətin ödənişli olmasında problem yoxdur və normaldır. Bütün dünyada bu konsultasiya xidməti var. Ödənişli əsaslarla təhsil xidməti göstərmək hər bir şəxsin öz işidir.

Düşünürəm ki, ödənişli xidmət göstərməkdə bir problem yoxdur. Ən azından həmin şəxs valideynlərə məlumat verə bilsin ki, bu ixtisaslara əmək bazarında nə qədər ehtiyac var, hansı sahələrdə işləmək olar.

Bu informasiyaları vermək adi hal deyil, kimsə vaxtını, enerjisini ayırır, Kimisə məcburən gətirmirlər ki, gəl, ixtisas seçimini mənumlə et. Pulsuz kimsə istəyirsə, DİM-ə müraciət edə bilər”.