Rusiya Prezidenti Vladimir Putin diqqətçəkən bir açıqlama verib. 

O, ölkəsində tərəvəz qıtlığının yaşandığını etiraf edib: 

“Rusiya ərazisində yetişdirilən kartofun, şəkər çuğundurunun və bir sıra digər tərəvəzlərin çatışmazlığı yaşayır. Biz bu sahələrin, o cümlədən emal sahələrinin sabitliyini təmin etməliyik”. 

Maraqlıdır, Rusiyada nə üçün tərəvəz qıtlığı yaşanır? Azərbaycan Rusiyanın tərəvəz ehtiyacının bir hissəsini qarşılaya bilər? 

Mövzu ilə bağlı kənd təsərrüfatı üzrə ekspert Akif Nəsirli “Cebheinfo.az”-a açıqlamasında bildirib ki, Rusiyada tərəvəz qıtlığının əsas səbəbi hava şəraitinin kəskin soyumasıdır:

“Nəzərə almaq lazımdır ki, may ayında Rusiyanın tərəvəz yetişən bölgələrində qar yağmağa başladı və şaxta düşdü. Hansı ki, əvvəlki illərdə belə hal müşahidə edilməmişdi. Nəticədə, şaxtalı hava məhsulu sıradan çıxardı. Digər tərəfdən, Rusiyadakı iqtisadi böhranın da dərinləşdiyini nəzərə almaq lazımdır. Bu böhran səbəbindən də Rusiya hökuməti fermerlərin əldə etməli olduqları vəsaitlər vaxtında verə bilmədi. Yəni, maliyyə çatışmazlığı da tərəvəz qıtlığına ciddi təsir etdi”.

Ekspert qeyd edib ki, Rusiyanın meyvə və tərəvəzlərə tələbatı böyükdür: 

“Azərbaycan isə onun sadəcə bir hissəsini ödəyə bilər. Bunun da ölkəmizin menyusuna uyğun həcmdə olması mümkündür. Rusiya bazarı üçün Azərbaycanın meyvə və tərəvəzləri o qədər də böyük həcm deyil. 

Lakin hər halda, müəyyən qisimdə tələbatın ödənilməsinə yardım edilə bilər. Məsələn, hazırda Azərbaycanda faraş kartofu mövsümüdür. Bu məhsulun ixracından fermerlər yaxşı qazanc götürə bilərlər”. 

Akif Nəsirli diqqətə çatdırıb ki, havaların yaz aylarında sərt keçməsi bütün ölkələrdə meyvə-tərəvəzin məhsuldarlığını aşağı salıb:

“Hazırda Türkiyədə də eyni qıtlıq yaşanır. Bu, Azərbaycanın da şimal rayonlarına ciddi təsir göstərib. Lakin Mərkəzi Aran və cənub rayonlarımız isə bir qədər az zərər çəkib. Həmin bölgələrin meyvə-tərəvəzləri ilə bu il həm Rusiya, həm də Türkiyə bazarlarında yaxşı gəlir əldə etmək olar. Bunun üçün fermerlərimiz hərəkətə keçməlidir”.