Samux rayon Məhkəməsində sifarişə və maddi maraqlara söykənən hüquqi rəzalət yaşanmaqdadır. Adıkeçən məhkəmə sabiq korpus komandiri, hazırda həbsə alınan general-mayor Xəqani Cəbrayılovun adından kütləvi dələduzluq edən Məmmədova Şəhrizad Fəxrəddin qızının cinayət tərkibli əməlini yüngülləşdirməyə, hətta mülki işə çevirməyə çalışır.
"Demokratik.Az"-a daxil olan iddialara görə, məhkəmənin sədri Nizami Hümbətov başda olmaqla, xanım hakim Zeynalova Səadət Nazim qızı icraatında olan iş üzrə Azərbaycan Respublikası CM-nin 178.2.2-ci, 178.2.4-cü maddələri üzrə təqsirləndirilən şəxsin müdafiəsinə çalışırlar.
"Demokratik.Az" saytına bu barədə zərərçəkmişlər özləri məlumat veriblər.
Şəmkir sakini, iş üzrə zərərçəkmişlərdən biri olan Hüseynov Rafayıl Sayad oğlu bildirir ki, Xəqani Cəbrayılov Şəmkir korpusunun komandiri olan vaxtlarda Şəhrizad Məmmədova müxtəlif adlar altında insanlardan pullar yığaraq mənimsəyib. Şəhrizad R.Hüseynovu aldadaraq 2018-ci ildə guya oğlunu Fövqaladə Hallar Nazirliyində işə düzəldəcəyi vədilə onun 13300 (on üç min üç yüz) manat pulunu mənimsəyib.
Bundan başqa, dələduz xanım özünü korpus komandirinin ən yaxın adamı kimi təqdim etməklə 2019-cu ildə Göygöl sakini Elnur Qurbanovdan 1500 (bir min beş yüz) manat vəsaiti ələ keçirib. Guya general Xəqani Cəbrayılovun tabeliyindəki "N" saylı hərbi hissəyə Elnurun yaxın qohumunu işə düzəldəcəyi iddiası ilə sonuncudan aldığı pulu da mənimsəyib.
Zərərçəkmiş Elnur Qurbanov qeyd edir ki, Şəhrizadın həqiqətən də hazırda həbsdə olan General-mayor Xəqani Cəbrayılovla və korpus komandirinin yaxın ətrafı ilə sıx əlaqələri olub. Dəfələrlə korpusda yüksək rütbəlilərlə telefonda danışması, hərbi hissələrdə müxtəlif "işlər həll edə bilməsi, korpusda generalla istədiyi vaxt görüşə bilməsi onun şirin vədlərlə Elnuru da aldatmasına səbəb olub.
Eləcə də, Şəhrizad Məmmədova aldatdığı digər zərərçəkmiş şəxslərdən işə düzəldəcəyi adı ilə;
- Şəmkir rayonu Kür qəsəbəsində yaşayan Abdullayeva İlhamə Novruzəli qızından 5000 (beş min) manat,
- Şəmkir rayonu Çaparlı kənd sakini Əliyeva Ulduz Səftər qızından 5000 (beş min) manat,
- Ucar rayonu Bağman kənd sakini Heydərov Vüsal İntizam oğlundan 4500 (dörd min beş yüz) manat təkrarən aldatma yolu ilə özgələrin xeyli miqdarda əmlaklarını ələ keçirərək dələduzluq cinayət əməlini törətmişdir.
Zərərçəkmişlərdən əldə etdiyimiz məlumata görə, sadalananlar təqsirləndirilənin dələduzluq əməllərinin çox cüzi hissəsidir. Şəhrizad Məmmədova əslində son illərdə xeyli sayda insanı aldadaraq küllü miqdarda mənimsəmə faktına imza atıb. Lakin o hələ də azadlıqda gəzir, nə məhkəmələr, nə də ittihamçı prokuror onun həbsini reallaşdırmır.
Məlumata görə, Şəhrizad uzun illər Şəmkir korpusunun nəzdindəki hərbi hissələrdə əsgərləri "perevod" etdirən, rüşvət müqabilində komandir heyəti ilə nöqsanlı "MAXE"lərin arasını "düzəldən, “Hərbi Xidmətkeçmə Haqqında” Əsasnamənin 156-ci maddəsinin “e” bəndi ilə tərxis olunan, yəni xidmətə uyğunsuzluğa görə işdən qovulmuş "xidməti uyğunsuz"ları yenidən öz işinə qaytara bilən ən aktiv şəxslərdən olub. Bu səbəbdən də, özü həbsdə olan general Xəqani Cəbrayılov xanım "kassir"inin uzun zamandır həbs olunmaması üçün əlindən gələni edir.
Görünür, Gəncə Apellyasiya Məhkəməsinin sədrinin 26 oktyabr 2020-ci il tarixli qərarı ilə cinayət işi üzrə materialların Şəmkir Məhkəməsindən alınaraq baxılması üçün Samux rayon Məhkəməsinə göndərilməsi də eyni məqsədə hesablanıb. Bu arada, sabiq korpus komandiri ilə Samux rayon Məhkəməsinin sədri Nizami Hümbətovun yaxın dostluq əlaqələrinin olmasına dair ortada dolaşan iddialara inansaq, tutulmazdan əvvəl bu kombinasiyanın general Xəqani Cəbrayılov tərəfindən oynanlılması ağlabatandır.
Zərərçəkmişlərin sözlərinə görə, Samux Məhkəməsi prosessual hüquq normalarını xeyli dərəcədə pozmaqla, işə laqeyid yanaşmaqla da təqsirləndiriləni məsuliyyətdən azad etmək niyyətini ortaya qoyur.
Fakt və cinayət əməli ortada olsa da, işin icrasını həyata keçirən hakim Səadət Zeynalova açıq formada prosesin nəticəsini malalamaqla, tərəfləri tamamilə məlumatsız qoymaqla məşğuldur. Zərərçəkmişlər iddia edirlər ki, onlara adicə məhkəmənin nə zaman keçirilməsi barədə yazılı bildirişlər belə verilmir, göndərilmir. Son bir aydır ki, dələduzluqda təqsirləndirilən şəxs ümumiyyətlə məhkəməyə çağırılmır, zərərçəkmişlərdən fərqli olaraq prosesə gətirilməsi təmin edilmir.
İnanırıq ki, Samux Məhkəməsi sözügedən işə münasibətdə 44 günlük VƏTƏN SAVAŞIMIZDA yarıtmazlığı ilə seçilmiş bir generalı və onun dələduz "pulyığanı"nı deyil, ədaləti və qanunun aliliyini üstün tutacaq...
