В«Xəbər tutanda ki, ev məndən başqa daha bir nəfərə satılıb, Xətai Rayon Məhkəməsinə müraciət etdim. Onda bəlli oldu ki, sən demə, В«Əzizbəy K.MВ» MMC özü məndən əvvəl və məndən xəbərsiz həmin məhkəmədə iddia qaldıraraq mənimlə bağladığı müqaviləni ləğv etdirib. Məhkəmə qətnaməsi qüvvəyə minməmiş evi təzədən başqasına satıbВ». Füzuli köçkünü Rahib Məmmədov 8 il öncə 61 min dollar ödəyərək, В«Etalon-İnşaatВ» MTK ilə müqavilə bağlayaraq şirkətin Xətai rayonu, Xocalı küçəsi 2347-48 məhəllədə inşa etdiyi hazır binadan üçotaqlı mənzil alıb. Təmir işləri aparmaq üçün müəyyən tikinti materialları alaraq mənzilə yığıb. 2011-ci ildə təmirə başlamaq istəyəndə ona bildirilib ki, В«Etalon - İnşaat MTKВ» ləğv olunub, hazırda bina В«Əzizbəy K.MВ» MMC-nin balansındadır, bu şirkətlə ikinci müqavilə bağlanmalıdır. Rahib Məmmədov şirkətlə növbəti müqaviləni bağlayıb və mənzildə bəzi təmir işləri aparıb.
2013-cü ildə xəbər tutub ki, В«Əzizbəy K.MВ» MMC Xətai Rayon Məhkəməsində iddia qaldıraraq 2011-ci ildə bağlanmış müqaviləni ləğv etdirib. Ancaq Rahib Məmmədova bu barədə nə məhkəmə bildirişi, nə də qətnamə göndərilib: В«2013-cü ildə Xətai Rayon Məhkəməsi şirkətin iddiasına mənim iştirakım və xəbərim olmadan baxaraq qərar verib. Şirkət həmin qətnamənin qanuni qüvvəyə minməsini gözləmədən mənzili Mövsüm Məmmədov adlı şəxsə satıb. Mən qətnamədən apellyasiya şikayəti verdim, şikayətim təmin olundu, Xətai məhkəməsinin qətnaməsi ləğv olundu. Şirkət qərardan Ali Məhkəməyə kassasiya şikayəti versə də, təmin olunmadı. Şirkətin Ali Məhkəmənin Plenumuna şikayəti də təmin olunmadı. Bundan sonra iş icraya yönəldi, mənzil boşaldılaraq mənə qaytarılmalı idi. Qərar iki il icra olunmadı, məlum oldu ki, qərar ona görə icra olunmur ki, evimi məndən sonra alan şəxs milli qəhrəmandır və icraçılar da onu evdən çıxara bilmir. Mən icranın təmin olunmasını tələb edəndə Mövsüm Məmmədov Konstitusiya Məhkəməsinə müraciət etdiВ».
Mövsüm Məmmədov Konstitusiya Məhkəməsinə müraciətində yazıb ki, evin birinci sahibinin apellyasiya və digər yuxarı instansiya məhkəməsində şikayətinə baxılarkən onun iştirakı təmin olunmayıb. Konstitusiya Məhkəməsi də onun iştirakının təmin olunması üçün işə yenidən Bakı Apellyasiya Məhkəməsində baxılması ilə bağlı qərar çıxarıb.
Bakı Apellyasiya Məhkəməsində bu il fevralın 6-da hakim Etibar Nəbiyev Rahib Məmmədovun əvvəl təmin olunmuş apellyasiya şikayətinə dair qətnamə elan edib. Həmin vaxt Mövsüm Məmmədov da qarşılıqlı apellyasiya şikayəti verib. Hakim Rahib Məmmədovun müqaviləsini ləğv etməyib. Lakin mənzilin Mövsüm Məmmədova verilməsi, Rahib Məmmədova isə eyni binadan eyni ölçüdə başqa mənzilin verilməsi barədə hələ 2013-cü ildə fəaliyyəti dayandırılmış və rəhbərliyi həbs olunmuş В«Etalon-İnşaatВ» MTK-nın üzərinə öhdəlik qoyub.
Rahib Məmmədov deyir ki, nə ona mənzil verməli olan MTK mövcuddur, nə də binada mənzil var: В«İş orasındadır ki, MTK rəhbərliyi binadakı eyni mənzilləri təkrar-təkrar satdığına görə həbsdədir, MTK dağılıb, binadakı mənzillərin hamısında yaşayış var. Hakim yaxşı bilirdi ki, MTK dörd il əvvəl darmadağın olub və bunu bilə-bilə rəhbərliyi həbsdə olan şirkətin üzərinə məni mənzillə təmin etməklə bağlı öhdəlik qoyub. Yəni, hakim icrası mümkün olmayan qətnamə çıxarıbВ».
Rahib Məmmədov Bakı Apellyasiya Məhkəməsinin bu qərarından Ali Məhkəməyə kassasiya şikayəti verib. Avqustun 14-də Ali Məhkəmədə hakim Ənvər Şadıyevin sədrliyi ilə baxılacaq: В«Mən öz mənzilimi tələb edirəm, məhkəmədən də istədiyim odur ki, 2009-cu ildən pulunu tam ödədiyim və müqaviləylə mənə məxsus olan mənzilim boşaldılıb özümə qaytarılsın. Kimsə milli qəhrəman titulundan istifadə edib məhkəmələrə təzyiq göstərir, məhkəmə də başqasının mənzilinə göz dikmiş beləsindən çəkinir. Ədalətli məhkəmə araşdırması hüququndan məhrum olacağamsa, yeganə çıxış yolum bu ölkənin vətəndaşlığından imtina etməkdirВ».
İndi isə Mövsüm Məmmədovun Bakı Apellyasiya Məhkəməsində qaldırdığı iddianı təqdim edək. Vətəndaş iddia edib ki, o, mübahisəli mənzili 2013-cü ildə В«Əzizbəy K.MВ» MMC ilə müqavilə bağlayaraq alıb. Mənzildə təmir işlərini başa çatdırdıqdan sonra orada yaşamağa başlayıb. Rahib Məmmədovun 2009-cu ildə В«Etalon-İnşaatВ» MTK ilə bağladığı müqavilə etibarsızdır, çünki şirkətin fəaliyyəti həmin müqavilədən bir il əvvəl - 2008-ci ildə dayandırılıb. İlk müqavilə saxta olduğuna görə həmin saxta müqavilə əsasında 2011-ci ildə В«Əzizbəy M.KВ» MMC ilə bağlanmış müqavilə də etibarsız hesab edilməlidir.
Qeyd edək ki, məhkəmələr nə birinci, nə də ikinci müqaviləni ləğv edib.
Hələ dörd il əvvəl В«Etalon İnşaatВ» MTK-nın vəzifəli şəxsləri Xətai rayonu ərazisində tikdiyi yaşayış binasındakı mənzillərin aldatma yolu ilə təkrar ayrı-ayrı şəxslərə satması ittihamı ilə həbs olunub və müxtəlif müddətlərə azadlıqdan məhrum ediliblər. Buna baxmayaraq, 2017-ci ildə Bakı Apellyasiya Məhkəməsinin hakimi Etibar Nəbiyev vətəndaş Rahib Məmmədovun mənzillə təmin olunmasını hazırda həbsdə olan keçmiş şirkət rəhbərliyinin üzərinə qoyub.
