“Azadlıq” qəzetinin xeyli vaxtdır dəyişməz mövqe sərgilədiyi bir neçə mövzu var ki, onlardan biri də “Yeni Müsavat” və onun rəhbərliyinə olan münasibətdir. Faktiki olaraq, bu qəzet qarşı cəbhədən saydığı müsavatçıları yıxıb sürüməklə məşğuldur və hər vəchlə onları gözdən salmağa, faş etməyə çalışır. Məlumdur ki, bu günlərdə, milli mətbuatın 140 illik yubileyi münasibətilə ölkə başçısı tərəfindən bir qrup jurnalist fəxri adlarla mükafatlandırıldı və həmin şəxslərdən biri də “Yeni Müsavat”ın baş redaktoru Rauf Arifoğlu oldu. Təbii ki, “Azadlıq”, daha doğrusu, cəhbəçilər bunu susqunluqla və adi hal kimi qarşılaya bilməzdilər. Belə də oldu və gözlənilənlərin əksi baş vermədi - fəxri adın təqdim olunması ilə AXCP cameəsinin hücuma keçməsi bir oldu. Əvvəlcə sosial şəbəkələr cəbhəçilərin ironik və təhqiramiz paylaşımları ilə “partladıldı”. Daha sonra isə onların ruporu olan “Azadlıq” vəzifəsini yerinə yetirməyə və silsilə yazılar çıxarmağa başladı.
İlk olaraq Milli Şuranın Koordinasiya Mərkəzinin üzvü Gültəkin Hacıbəylinin Facebook-da bölüşdüyü fikirlər xəbərə çevrildi. O, elə təqdim etməyə çalışdı ki, guya bu mükafat R.Arifoğluna AXCP ilə düşmən olduğuna görə verilib: “Halal haqqıdır, elə son bir-iki ayda adam Milli Şura və AXCP-yə qarşı Fərhad kimi külüng vurub, nə böhtanlar uydurub, nə təhqirlər icad edib”.
“Rauf Arifoğlu ifşanın finişində” adlı yazıda isə ironiya ilə indi onun təkcə “həci” deyil, həm də əməkdar jurnalist olduğu yazılıb: “İndi o, vüsala çatmış aşiq kimidir. Fotolardan da görünür ki, çox təsirlənib. Biz də Rauf Arifoğlunu təbrik edirik. Amma heç kimə belə təltif arzulamırıq. Rauf Arifoğlu mətbuata açıqlamasında deyib ki, bu mükafat mənim üçün önəmlidir və 26 illik xidmətimə verilən qiymətdir. Bugündən sonra o, daha da şövqlə çalışacaq. Zaman həqiqətən də böyük və ədalətli hakimdir. Rauf Arifoğlu öz dili ilə “mən kiməm” sualına cavab verdi. Bundan sonra o, çox selfilər çəkdirəcək. Çünki bu adamın yalnız özünə baxmağa üzü qalıb. İnanırıq ki, “Yeni Müsavat” bundan sonra AXCP-ni, Milli Şuranı daha tez-tez “yad” edəcək və yeni mükafatlara imza atacaq. Allah heç bir istədiyi bəndəyə belə yüksəliş nəsib etməsin. Çünki bu yüksəklik hər tərəfdən təpə kimi görünür”.
Belə gedişat və R.Arifoğlunun fəxri adla təltif olunmasına İsa Qəmbərin də münasibət bildirdiyi haqda məlumat vermişdik. Bu söz-söhbətin bir qədər uzandığı, qarşı tərəfin də ittihamlara cavab verdiyi məlumdur. “Azadlıq” qəzeti R.Arifoğlu və İsa Qəmbər arasındakı narazılığa və deyişməyə də geniş yer verib, xüsusi səhifə ayırıb. Yazıda əvvəlcə İ.Qəmbərin fikirləri qeyd olunub: “Rauf Arifoğlunun partiyadan istefası və prezidentdən mükafat alması günün əsas müzakirə olunan mövzusudur. Hesab edirəm ki, bu, barışmaq deməkdir. Belə şəraitdə Rauf Arifoğlunun Müsavatdan çıxması məntiqli addımdır”.
Yazıda “Yeni Müsavat” cəbhəsinin İ.Qəmbərə gecikməyən cavabı, baş redaktorun müavini və kiçik qardaşı Azər Ayxanın da fikirləri yer alıb: “Siz bizim dövlətin 1-ci şəxsi ilə normal, şəffaf münasibətimizə kölgə salmaq istəyirsiniz. “Bu, rejimlə barışmaqdır” deyib Dədə Qorqudluq iddiasına düşürsünüz. P.S. "Yeni Müsavat" və Rauf Arifoğlu olmasaydı, Azərbaycan müxalifəti neynərdi görəsən”.
Günün müsavatçılarla bağlı son xəbəri isə Azər Ayxanın da partiyadan istefa verməsi haqda oldu: “Müsavat Partiyasından çoxdan istefa vermək istəyirdim. Rauf bəyin tövsiyəsi və xahişi sayəsində bu addımı atmadım. Təkcə mən yox, qəzetimizdə çalışan Müsavat Partiyası üzvləri də bu addımı atmır ki, bunun bir kampaniyaya çevrildiyi görüntüsü yaranmasın. Partiyadan hələ qurultay zamanı getmək istəyirdim. O zamanlar Rauf Arifoğlunu, “Yeni Müsavat” qəzetini günahlandırmağa bir bəhanə axtarırdılar. Bu baxımdan partiya rəhbərliyinə bir bəhanə verilməsin deyə, istefanı müəyyən vaxta qədər təxirə saldıq. Açıq deyək, partiyada təmsil olunan müavinlər, istərsə də divan üzvləri və digər funksionerlər tərəfindən “Yeni Müsavat” rəhbərliyi ilə bağlı tutulan ədalətsiz mövqe bizə kifayət qədər əsas verir ki, partiya fəaliyyətimizi dayandıraq. Əvvəlki Müsavat partiyası ilə indiki Müsavat partiyası arasında fərqi görməmək, sezməmək, duymamaq mümkün deyil. Bu baxımdan Müsavat partiyasında qalmağın heç bir mənası yoxdur. Mənim Müsavat partiyasında heç bir fəaliyyətim yoxdur. Partiyadan de-fakto ayrılmaq üçün nə zaman ərizə ilə müraciət edəcəyimi hələ bilmirəm”.
Göründüyü kimi, “Azadlıq” qəzeti yenə də öz ampluasındadır və iqtidarla münasibətləri normallaşan istənilən adamı qaralayır, onu “xalq düşməni” kimi təqdim etməkdən yorulmur. İndiki hədəf isə R.Arifoğlu və onun dəstəsidir. Onsuz da bu qəzetin xisləti, əsil mahiyyəti hamıya çoxdan bəlli idi. Son davranışlarla isə məlum faktı bir daha təsdiqlədilər. Maraq üçün qeyd edək ki, R.Arifoğlu özü də AXCP-nin hücumuna məruz qalacağını əvvəlcədən bilirdi. Ona görə də Prezident tərəfindən mükafat aldığı yerdə çəkilən şəklini paylaşarkən fotonun altında bunu qeyd etmişdi və “bu da günün fotosu. Prezident xidmətimizi şəxsən qiymətləndirdi. Sağ olsun, təşəkkürlər” kəlmələrindən sonra “Kərimovçu zombilər, hadi, görəyim sizi!!!!” sözlərini yazmışdı. Xatırladaq ki, R.Arifoğlu AXCP sədri Əli Kərimlinin bir zamanlar onu öz yanına müavin vəzifəsinə dəvət etdiyini də açıqlayıb. Ə.Kərimli xəbər göndərib ki, daha İsa Qəmbərə deyil, ona yardımçı olsun. Baş redaktor isə bu təklifi rədd edib və əsas kimi Ə.Kərimlinin onu uzun müddət söydürməsini göstərib.
Bu faktlar bir daha təsdiq edir ki, “Azadlıq”, daha doğrusu, qəzetin rəhbərliyi hələ də öz xislətindən əl çəkməyib və faktiki olaraq, qəzet yetənə yetir, yetməyənə bir daş atır. Necə deyərlər, qozbeli qəbir düzəldər.
