Paytaxtın ən böyük rayonlarından biri də Xəzərdir. Məlumat üçün deyək ki, 2010-cu il may ayının 4-də Azərbaycan Respublikası prezidentinin sərəncamı ilə və əhalinin çoxsaylı xahişləri nəzərə alınaraq Əzizbəyov rayonu Xəzər rayonu adlandırılıb. 2012-ci ilin dekabr ayının 12-də prezidentin sərəncamı ilə tərkibi Pirallahı, Çilov və Neft daşları olmaqla Pirallahı rayonu yaradılıb. Xəzər rayonunun ərazisi 375.5 kv km, əhalisinin sayı son statistik məlumata görə, 159 min 90 nəfərdir.
Xəzər rayonu Sabunçu, Suraxanı və Pirallahı rayonları ilə həmsərhəddir. Qeyd edək ki, rayonun bir neçə qəsəbəsini çıxmaq şərtilə bəzi qəsəbələrdə müxtəlif problemlər yaşanmaqdadır. Ki, bunun səbəbkarı kimi Xəzər Rayon İcra Hakimiyyətinin (RİH) başçısı Gülağa İslamov göstərilir. Mətləbə keçməzdən öncə bildirək ki, İslamov Gülağa Bayram oğlu 1948-ci il dekabr ayının 19-da Bakı şəhərində anadan olub. Poltava Kooperasiya İnstitutunun Əmtəəşünaslıq ixtisasını bitirib. Prezidentin 25 yanvar 1995-ci il tarixli fərmanı ilə Bakı şəhəri Əzizbəyov (indiki Xəzər rayonu) Rayon İcra Hakimiyyətinin başçısı vəzifəsinə təyin edilib. Başqa sözlə desək, Gülağa İslamov nə az-nə çox düz 19 ildir ki, Xəzər rayonuna rəhbərlik edir. Amma müxtəlif mətbuat vasitələrində onun barəsində dərc olunan yazılardan görünür ki, icra başçısı vəzifəsinin öhdəsindən uğurla gələ bilmir və yerli əhaliyə əlavə problemlər yaradır. Apardığımız araşdırmalar nəticəsində məlum oldu ki, Gülağa İslamov başçı vəzifəsinə təyin olunduğu gündən indiyədək rayonun Mərdəkan, Buzovna, Şüvəlan kimi qəsəbələrində boş torpaq sahələrini ucdantutma verib. Bildiyiniz kimi, adıçəkilən qəsəbələrdə torpaq çox bahadır və burda əsasən imkanlı, vəzifəli şəxslərin villaları yerləşir. Əldə etdiyimiz məlumatlara görə, boş torpaq sahələri varlı şəxslərə veriləndən sonra bu qəsəbələrin yerli sakinləri əməlli-başlı sıxışdırılmağa başlanıb. Belə ki, icra hakimiyyətinin bəzi yetkili şəxsləri illərdir bu qəsəbələrdə məskunlaşmış insanlara müxtəlif formada təzyiqlər göstərərək onları yaşadığı yerdən didərgin salmağa çalışırlar. İddialara əsasən bu, məqsədli şəkildə həyata keçirilir. Yəni Gülağa İslamov yerli sakinləri sanki sıxışdırıb burdan çıxarmaqla onların evlərinin yerini hansısa imkanlı şəxslərə vermək istəyir. Hətta buna görə dəfələrlə sakinlərlə Xəzər Rayon İcra Hakimiyyətinin rəhbərliyi arasında qalmaqal da yaşanıb. Xatırladaq ki, 2011-ci ilin mart ayında Xəzər rayonu, Türkan qəsəbəsinin sakinləri rayon rəhbərliyinin qanunsuz əməllərinə açıq şəkildə öz etirazlarını bildirmişdilər. Türkanlıların dediyinə görə, qəsəbə sakinləri martın 18-də etiraz keçirəndən sonra məmurlar bu etirazlara qatılanları sıxma-boğmaya salmaqda davam edir. Belə ki, Xəzər Rayon İcra Hakimiyyətinin başçısı Gülağa İslamov həmin ərəfədə qəsəbəyə gedərək sakinlərlə görüşüb və onlara yalandan vədlər verib. Qeyd edək ki, sakinlərin etirazına səbəb torpaq sahələrinin əllərindən alınması idi. Sakinlər torpaqlarının sənədlərinin qaydasında olduğunu desələr də, icra başçısı həmin torpaqların sənədlərinin saxta olduğunu bildirib. Vətəndaşların etirazına baxmayaraq, rayon rəhbərliyi torpaqların sənədlərini saxta elan edərək məhkəmə yolu ilə torpaqları sakinlərin əllərindən almağa müvəffəq olub.
Sakinlər həmçinin qəsəbədən dənizə gedən yeganə yolun bağlanmasına da etiraz edib. Onların bildirdiyinə görə, Dənizkənarı küçəsində dənizə gedən yolun ortasında çayxana tikilib. Sakinlər bu obyektin icra başçısının razılığı ilə tikildiyini bildiriblər. Etibarlı mənbələrdən aldığımız məlumatlarda bildirilir ki, rayonun Buzovna, Binə və Zirə qəsəbələrində də vəziyyət ürəkaçan deyil. Mənbəmiz vurğulayır ki, icra başçısı bəzi yüksək rütbəli məmurların adından istifadə edərək vətəndaşlara zülm verir: "Buzovna, Binə və Zirə qəsəbələrində əhalinin sosial durumu o qədər də yüksək səviyyədə deyil. Sakinlər özlərinə məxsus bağ sahələrində təsərrüfat işləri ilə məşğul olub ailələrini dolandırırlar. Amma icra başçısı onların rahat yaşamasına, eyni zamanda işləməsinə imkan vermir. Təsərrüfat işləri ilə məşğul olan şəxslər əsassız yerə incidilir.Deyilənə görə başçının niyyəti həmin insanların bağ sahələrini qeyri-qanuni şəkildə ələ keçirib biznesmenlərə verməkdir. Çünki Gülağa müəllim 19 illik fəaliyyəti dövründə bu üsuldan dəfələrlə istifadə edib. Təəssüf ki, heç yerdən köməyi olmayan vətəndaşlar onun törətdiyi qanun pozuntularının cavabını verə bilməyiblər. İcra hakimi sanki özünü rayonun sahibi kimi aparır. Lakin o bir şeyi unudur ki, onun əsas vəzifəsi vətəndaşlara yüksək səviyyədə xidmət göstərməkdir. Xəzər rayonunda məskunlaşan insanlar icra hakiminin özbaşına əməlləri haqda aidiyyəti dövlət qurumlarına saysız-hesabsız şikayət məktubları ünvanlayıblar. Buna baxmayaraq, həmin məktublar ünvanına çatmır. Gülağa İslamov hər yerdə deyir ki, mənim arxamda filankəs dayanıb, heç kim mənə bata bilməz. Bu, yanlış psixologiyadır. Ona görə ki, cənab prezident kimliyindən asılı olmayaraq vəzifəsinə məsuliyyət göstərməyən məmurları öz bildiyi formada cəzalandırır. Gülağa İslamovun vəzifədə əbədi qalacağını zənn etməsi doğru deyil". Başqa bir məlumatda isə rayonun Qala qəsəbəsində mövcud olan problemlərdən söhbət açılır. Məlumatlara əsasən, qəsəbə sakinləri yerli icra nümayəndəliyi və bələdiyyə rəhbərliyi tərəfindən yol verilən çeşidli qanun pozuntularından əziyyət çəkirlər. Qəsəbə camaatını incidən şəxslərdən biri kimi Xəzər RİH başçısının Qala qəsəbəsi üzrə nümayəndəsi Məzahir Hüseynov göstərilir. Məlumatlarda bildirilir ki, icra nümayəndəsi bu vəzifəyə bir neçə il əvvəl təyin olunub. Ən maraqlısı isə odur ki, sözügedən şəxs icra başçısı Gülağa İslamovun qudasıdır. Başçı qudasını vəzifəyə yerləşdirməklə rayondakı dayaqlarını daha da möhkəmləndirib. Mənbə deyir ki, Məzahir Hüseynov məhz qudasına güvənərək qəsəbədə rəsmən özbaşınalıq edir: "İcra nümayəndəsinin törətdiyi əməllər Qala qəsəbəsində gərginliyin yaranmasına səbəb olub. Məzahir Hüseynovun yerli bələdiyyə rəhbərliyi ilə əlbir şəkildə bəzi torpaq işləri həyata keçirir. Qalada böyük səlahiyyətlərə sahib olan icra nümayəndəsinin razılığı olmadan qəsəbədə bircə qarış belə olsun torpaq alqı-satqısı həyata keçirilə bilməz. Yerli sakinlər pay torpaqların alınması zamanı çox ciddi çətinliklərlə üzləşdikləri halda, kənar şəxslərin bu ərazilərdə torpaq sahələri alması heç bir problemlə müşayiət olunmur. Təbii ki, tələb olunan məbləği ödəmək şərti ilə". Göründüyü kimi, Gülağa İslamovun imza atdığı qeyri-qanuni işlər Xəzər rayon sakinlərinin səbr kasasını daşdırıb. Digər tərəfdən, icra başçısı artıq xeyli müddətdir vəzifədədir və onun tutduğu postdan kənarlaşdırılmasının vaxtı çoxdan çatıb. 19 il ərzində vətəndaşların etimadını qazana bilməyən məmurun bundan sonra hansısa müsbət işlərə imza atacağına inanmaq bir qədər sadəlövhlük olardı. İnanmaq istərdik ki, rəsmi dairələr yaxın vaxtlarda vəzifəsinin öhdəsindən lazımi səviyyədə gələ bilməyən icra başçısı haqqında zəruri tədbirlər həyata keçirəcəklər. Gələn saylarımızda icra hakiminin biznesi ilə bağlı şok detalları açıqlayacağıq. \\ gundelik-baku.com \\
Məsələ ilə bağlı qarşı tərəflərin də mövqeyini işıqlandırmağa hazırıq.
