Xəbər verdiyimiz kimi, ölkənin tanınmış nəşriyyat və kitab şəbəkələri olan “Qanun” nəşriyyatı və “Əli və Nino” kitab evləri bu il keçirilən XI Bakı Beynəlxalq Kitab Sərgisində iştirak etmədiklərini açıqlayıblar.

Səbəb kimi onlara əvvəlcədən ayrılmış yerlərin son anda başqa təşkilatlara verilməsi göstərilib. Məsələ ilə bağlı yayılan birgə bəyanatda qeyd olunurdu ki, hər iki quruma sərgi salonunun sonunda yer ayrıldığı bildirilsə də, bu yerlər son anda dəyişdirilərək başqa iştirakçılara verilib.

“Qanun” nəşriyyatının direktoru Şahbaz Xuduoğlu məsələ ilə bağlı bir neçə gün ərzində Mədəniyyət Nazirliyinin məsul şəxsləri ilə dəfələrlə əlaqə saxladıqlarını, onlara əvvəlki yerlərinin bərpa olunacağı vədi verilsə də, bu vədin yerinə yetirilmədiyini bildirib. Bəyanatda bildirilib ki, bu münasibət yalnız “Qanun” və “Əli və Nino”ya qarşı deyil, ümumilikdə müstəqil nəşriyyatlara, müəlliflərə və oxuculara qarşı mənfi yanaşmanın göstəricisidir.

Daha sonra Şahbaz Xuduğlu “Facebook” hesabında “Qanun” nəşriyyatının sərgidə fəaliyyətini bərpa etdiyini açıqlayıb.

Sərgidə "Əli və Nino" kitab mağazaları şəbəkəsininin fəaliyyəti də bərpa olunubmu?

Mövzu ilə bağlı “Cebheinfo.az”- a açıqlama verən "Əli və Nino" kitab mağazaları şəbəkəsinin rəhbəri Nigar Köçərli bildirib ki, sərgini tərk etməyə qərar versələr də, yaranmış vəziyyətdə kompromis yolunu seçərək məhdud iştirakla kifayətləniblər:

“Biz demək olar ki, fəaliyyətimizi bərpa etməmişik. Çünki etik baxımdan çıxılmaz bir vəziyyət yaranıb. Mən qərar verdim ki, sərgi məkanını tərk edək. Nə özümə, nə 20 illik kitabçılıq fəaliyyətimizə, nə də komandama Mədəniyyət Nazirliyinin bu cür yanaşmasını yaraşdırmıram. Bizim qrup sərgini tərk etmək istəyəndə “Qanun” nəşriyyatı bizə həmrəylik göstərərək bildirdi ki, onlar da sərgidən çıxır.

Belə çıxırdı ki, mənim ədalət uğrunda etdiyim etiraz səbəbindən “Qanun” nəşriyyatının gecə-gündüz işləyən komandası və 20-yə yaxın yazıçının beş gün ərzində planlaşdırılan imza günləri ləğv olunmalı idi. Mən də çıxılmaz vəziyyətdə qaldım. Hansı daha vacibdir:

Ədalət uğrunda mübarizə aparmaq, yoxsa dayanmaq? Şahbaz bəy bir kompromis variant təklif etdi, bizim 3-4 masa “Qanun” nəşriyyatının stendinin yanına yığıldı. Öz banerimizi də açmadıq ki, bu ərazinin “Əli və Nino”ya məxsusluğuna dair heç bir işarə olmasın”.

Onun sözlərinə görə, sərgidə formal olaraq iştirak etsələr də, bu, sadəcə komandalara və yazıçılara hörmət naminə idi:

“Kitablarımızın bir qismi orada qaldı, bir qismini isə geri apardıq. Yəni 3-4 masa ilə sərgidə olduq, buna var olmaq demək olarsa... Hələ də əmin deyiləm ki, bu, düzgün qərar idi, ya yox. Yazıçılara, “Qanun” nəşriyyatının komandasına və öz komandama görə, yalnız onlara hörmət əlaməti olaraq dedim ki, tam çıxmayaq. Onlar səhər saat 6-dan ayaqüstə işləyirdilər. Amma özümü alçaldılmış hiss edirəm. Mədəniyyət Nazirliyinin bu hərəkətini nə yaraşdırıram, nə də bağışlaya bilirəm”.