ABŞ-ın vasitəçiliyi ilə Ermənistan və Azərbaycan arasında imzalanan sülh sazişi beynəlxalq miqyasda diplomatik irəliləyiş kimi qiymətləndirilsə də, İrəvan üçün daxildə ciddi siyasi nəticələrə səbəb olub.

Musavat.com xəbər verir ki, bu barədə “The Loot” portalında yazı dərc olunub.

Saytın yazdığına görə, baş nazir Nikol Paşinyanın Qərbə yönəlik xarici siyasət kursu Ermənistanı onun ənənəvi dayaqlarından biri – Erməni Apostol Kilsəsi ilə açıq qarşıdurmaya gətirib.

Ekspertlərin fikrincə, Qarabağın 2023-cü ildə itirilməsindən sonra kilsə hökumətə qarşı sərt mövqe tutub, güzəştlərə qarşı çıxaraq müxalifətlə birləşib. Katolikos II Qareginin rəhbərliyi ilə kilsə həm ölkə daxilində, həm də diasporada Paşinyanın siyasətinə etirazların əsas mərkəzinə çevrilib.

Məqalədə vurğulanır ki, Ermənistanın ən mühüm yumşaq güc alətlərindən biri məhz Apostol Kilsəsi və onun vasitəsilə ölkə ilə bağlı qalan geniş diaspora şəbəkəsidir. Dövlətlə kilsə arasındakı körpünün dağılması Ermənistanı beynəlxalq dəstəkdən məhrum edə bilər.

Ekspert Logan Liut hesab edir ki, Paşinyan Rusiyadan asılılığı azaltmaq və Qərbə inteqrasiya yolunu seçsə də, kilsə ilə qarşıdurma onun siyasi legitimliyini zəiflədir:

“Əgər hökumət kilsə ilə barışıq yolu tapmasa, yeni sülh dövrü Ermənistan üçün sabitlik və təhlükəsizlikdən çox təcrid və zəiflik gətirə bilər”.