AzVision.az xəbər verir ki, avropalı tədqiqatçı-jurnalistlər 2022-ci ilin may ayında “First Diamond Company (FDC)” şirkətinin yaradıldığını müəyyənləşdiriblər. Onun “Alrosa” ilə əlaqəsi çox da ört-basdır edilmirdi. FDC-nin sahibi “Alrosa”nın satış şöbəsinin keçmiş əməkdaşı Regina Sobol, baş direktoru isə əvvəllər “Alrosa Diamonds” şirkətinin Moskva filialında işləmiş Yevgeni Tsıbukov idi.

Ermənistana almaz ixracına başlayan FDC təkcə 2023-cü ilin yanvarından 2024-cü ilin martına qədər Rusiyadan təxminən 300 milyon dollar dəyərində qiymətli daş çıxarıb.
Ukraynada müharibə başlamazdan əvvəl rus almazlarının əsas alıcılarından və “Alrosa”nın tərəfdaşlarından biri Hindistanın “KGK Group” zərgərlik korporasiyası olub. Lakin tədqiqatçıların sözlərinə görə, hindlilər daha sonra ruslarla əməkdaşlıq haqqında qeydləri sildilər.

FDC isə “Imperial Diamond” şirkəti ilə işləməyə başlayıb. Onu isə, öz növbəsində, Birləşmiş Ərərb Əmirliklərindən (BƏƏ) olan şirkət və Rusiya pasportu daşıyan Hindistan əsilli iş adamı – “KGK Group” ilə əlaqəli Ramani Vithalbhay Vallabhbhay təsis edib. Maraqlıdır ki, “Imperial Diamond” şirkətinin rəhbəri vəzifəsi əvvəllər “Alrosa”nın aktivlərini idarə edən Pavel Vinixinə həvalə olunub.

- “Imperial Diamond” emal üçün almazları FDC və Ermənistanın “ADM Diamonds and Fancy Jewelry” şirkətindən alır və emaldan sonra onları eyni şirkətlərə qaytarır. Nəticə etibarı ilə bunlar artıq sanksiyalar altında olan Rusiyanın qiymətli daşları deyil və onlar satış üçün Aİ-yə və ABŞ-yə göndərilə bilər”, - jurnalistlərin araşdırmasında vuröulanır.

FDC-nin digər tərəfdaşları - “Gloria Gems Trading” və “Mohit Diamonds” Hindistan şirkətlərinin də, “KGK Group” və “Alrosa” ilə əlaqələri var. “First Diamond Company” şirkətinin əsas vasitəçi korporasiyalarla ümumi dövriyyəsinin həcmi 270 milyard rubldan (təxminən 3 milyard 321 milyon ABŞ dolları) çoxdur.

Araşdırma materiallarında “Alrosa”nın sanksiyalardan yayınmaq üçün yaratdığı daha iki şirkətin adını çəkir: “Alrosa” nın keçmiş işçilərinin rəhbərlik etdiyi “Trading Horizons” və “Alrosa”nın vahid satış şirkətinin əməkdaşı Yelena Smirnova tərəfindən təsis olunmuş “Diamond Trading House”.

Tədqiqatın nəticələrindən aydın olur ki, Rusiya almazalarına qaoyulan məhdudiyyətlərdən yan keçmək üçün əlahiddə fəndlərə ehtiyaca da duyulmayıb. Bu isə, ondan xəbər verir ki, sanksiyaların tətbiq edilməsi ilə parallel olaraq, onlara riayət olunması üzrə effektiv nəzarət mexanizmləri yaradılmalıdır.

Ən əsası isə, sanksiyalardan yan keçməyə şərait yaradan ölkələrə münasibətdə selektiv yanaşma sərgilənməməlidir. Bu baxımdan, Rusiya-Ermənistan arasında ötən ildə ticarət dövriyyəsinin 14 milyard ABŞ dollarını keçməsi bir çox pərdəarxası məqamlardan xəbər verir. Amma nədənsə, bu məsələ ilə bağlı digər ölkələrin gözündə hətta görünməyən “tükü” belə seçən Qərb, Ermənistanın gözündəki “tiri” görmür.