Türkiyənin müdafiə sənayesi üzrə son nailiyyət və yenilikləri bütün dünyada heyrətlə izlənilir. Müasir silah texnologiyaları, xüsusilə pilotsuz uçuş aparatları (PUA) dünyanın ən öndəgedən silahları ilə müqayisə olunur.
Tanınmış türkiyəli tarixçi, professor Ərhan Afyoncu da açıqlamasasında 500 ildən sonra Türkiyə və islam dünyasının silah sənayesində yenidən üstün mövqe qazandığını vurğulayıb. Afyoncunun fikrincə, bu nailiyyətlər təkcə Türkiyənin deyil, ümumilikdə islam dünyasının hərbi-sənaye gücünün artması baxımından xüsusi önəm daşıyır.
Globalinfo.az-a danışan politoloq Turab Rzayev bildirib ki, pilotsuz uçuş aparatları və onların istehsalı texnologiyası hərb tarixində nisbətən yeni istiqamətdir:
“Müasir müharibələrin taleyini bir çox hallarda məhz belə texnologiyalar müəyyən edir. Sevindirici haldır ki, Türkiyə bu sahədə ən çox inkişaf etmiş ölkələrdən biridir. Dünyanın güclü hərb sənayesi olan dövlətləri belə Türkiyədən bu tip silahlar sifariş edirlər. İspaniya, Britaniya və Almaniya Türkiyənin pilotsuz hərbi texnologiyalarına maraq göstərən ölkələr arasındadır. Faktiki olaraq Xorvatiyadan tutmuş İndoneziyaya qədər geniş coğrafiyada türk silahlarının gücünü gördük. Həmin silahlar Suriya, Liviya, Qarabağ və Ukraynada uğurla tətbiq olunub. Sudan kimi ölkələr də Türkiyənin hərbi sənayesinə müraciət edib. Bu, çox müsbət göstəricidir”.
Politoloq deyib ki, bununla yanaşı, ənənəvi silahların da xüsusi əhəmiyyəti qalır:
“Müəyyən texnoloji çətinliyi olan hərbi avadanlıqlar mövcuddur. Türkiyənin ən zəif tərəfi hələ də mühərrik istehsalı ilə bağlıdır. Təyyarə mühərriklərinin yığılması və tam yerli istehsalın təmin edilməsində problemlər mövcuddur. Müasir təyyarələrin, tankların və gəmilərin mühərriklərinin istehsalı da bu çətinliyə nümunədir. Türkiyənin sözügedən istiqamətdə hələ xeyli yol irəliləməsi lazımdır.
Eyni zamanda Ankara kiçik ölçülü uçuş aparatlarında yüksək mövqe nümayiş etdirir. Bir sıra hallarda hətta liderliyi müşahidə olunur. Çinlə Türkiyə arasında bu sahədə rəqabət faktiki olaraq özünü göstərir. Çin daha iri və dağıdıcı dronlar istehsal edir, amma Türkiyə onları sıradan çıxara bilir. Nəticədə həmin dronların Misirdə yerləşdirilməsi məcburiyyəti yaranıb ki, Türkiyə oraya hücum etməyəcək”.
