Bakı Slavyan Universitetinin korrupsiya cinayətlərində təqsirli bilinərək azadlıqdan məhrum edilmiş sabiq şöbə müdiri Dürdanə Əliyevanın barəsindəki qərardan verilən kassasiya şikayəti üzrə məhkəmə iclasının vaxtı məlum olub.
Pravda.az-ın əldə etdiyi məlumata görə, Ali Məhkəmənin hakimi İlqar Cəfərovun sədrliyi ilə keçiriləcək proses avqustun 29-na təyin edilib.
Eks-şöbə müdiri barəsində bəraət hökmünün çıxarılmasını istəyir.
Qeyd: D.Əliyeva Baş Prokuror yanında Korrupsiyaya qarşı Mübarizə Baş İdarəsi tərəfindən cinayət məsuliyyətinə cəlb edilib. İttihama görə, o, BSU-nun Əlavə və qiyabi təhsil şöbəsinin müdiri olduğu 2018-2021-ci illərdə mənimsəmə və rüşvət alma yolu ilə 226 min manat ələ keçirib.
D.Əliyeva özünü təqsirli bilməyib. Məhkəmədə tələbələrdən alınan pulları sabiq rektor Nurlana Əliyevaya verdiyini deyib. Sabiq rektor isə şahid qismində verdiyi ifadəsində təqsirləndirilən şəxsin dediklərini təkzib edib. Bakı Ağır Cinayətlər Məhkəməsinin hökmü ilə Əliyeva 6 il azadlıqdan məhrum edilərək məhkəmə zalında həbs edilib. Bakı Apellyasiya Məhkəməsi onun şikayətini təmin etməyib. Ali Məhkəmədə də D.Əliyevanın şikayətini təmin etməyib.
