“Aztelekom” şirkətinin əməkdaşı kabel çəkilişi zamanı söyüd ağacını da kəsib. Buna görə cinayət məsuliyyətinə cəlb edilib.
Musavat.com xəbər verir ki, hadisə Gədəbəy rayonu, Böyük Qaramurad kəndi ərazisində baş verib.
Kabel çəkilişi zamanı ərazidə olan ağaclar budanılan zaman bir ədəd söyüd ağacı kəsilərək məhv edilib. Həmin ağac Qaraməmmədli Bələdiyyəsinin balansında olub.
Söyüd ağacı Ekologiya və Təbii Sərvətlər Nazirliyinə müraciət edilmədən kəsildiyi üçün cinayət işi açılıb. Ağacı kəsən “Aztelekom” əməkdaşı Nazim İbrahimov cinayət məsuliyyətinə cəlb edilib.
Dəymiş zərər 1600 manat olaraq müəyyən edilib. Məlum olub ki, Nazim İbrahimov dəymiş ziyanı ödəyib buna görə də onun barəsindəki cinayət işinə xitam verilib.
Nazim İbrahimovun ifadəsindən məlum olub ki, gündəlik 20 manata işlədiyi “Aztelekom”dakı işindən ayrılıb. Buna səbəb maaşını ala bilməməsi olub.
