Səhiyyə Nazirliyinə tabeli müəssisələrin təmirinə, tibbi avadanlaıqların və digər bir çox malların alınmasına, xidmətlərin göstərilməsinə hər il kifayət qədər dövlət vəsaitinin ayrıldığı hamıya məlumdur. Amma məlum olmayan odur ki, bu qədər vəsaitlərin ayrılmasına baxmayaraq tibb müəssisələrinin əksəriyyəti nə üçün baxımsız, bərbad haldadır. Ayrılan bu qədər dövlət vəsaitləri hara xərclənir? Qeyd edək ki, bu vəsaitlərdən tibb müəssisələrinin hərəsi bir formada qazanc götürür. Biri təmir adı ilə, biri,avadanlaq adı ilə, biri, təsərrüfat malları adı ilə, bir çoxu dərman pereparatları adı ilə, bəziləri də içməli su adı ilə dövlət vəsaitlərini istədikləri istiqamətə yönəldirlər. Bunu da ancaq satınalmalar yolu ilə həyata keçirmək mümkündür. Səhiyyə Nazirliyinə tabeli 5 Saylı Uşaq Vərəm Sanatoriyasının hər il etdiyi kimi.
Qeyd edək ki, 5 Saylı Uşaq Vərəm Sanatoriyası tərəfindən içməli suyun alınması ilə bağlı 2022-ci ildə 2 kotirovka sorğusu keçirilib. Dövlət satınalmalarının vahid internet portalına yerləşdirilmiş məlumatlarda 16.02.2022-ci ildə başlanılmış kotirovka sorğusunda “ENRIKE” Məhdud Məsuliyyətli Cəmiyyəti qalib olub və 15.03.2022-ci il tarixdə 38 570 manat məbləğində satınalma müqaviləsinin bağlanıldığı göstərilir.
Uşaq Vərəm Sanatoriyası içməli suyun alınması üzrə ikinci kotirovka sorğusuna isə 26.03.2022-ci ildə başlamış və “KRİPTON LTD” Məhdud Məsuliyyətli Cəmiyyəti ilə 15.04.2022-ci ildə 35 910 manat məbləğində satınalma müqaviləsinin bağlanıldığı elan etmişdir.
Qeyd edək ki, 5 Saylı Uşaq Vərəm Sanatoriyası hər iki kotirovka sorğusunda 13300 ton (bunlar hələ bilmir ki, su tonla deyil, kubmetrlə ölçülür) içməli suyun daşınması və su anbarına tökülməsini nəzərdə tutub. Amma nədənsə bir ay ərzində kotirovka sorğusunun birinə 35 910, digərinə isə 38 570 manat vəsait ayırıb. Hansı ki, ikincidə içməli suyun bir kubu sanatoriyaya 2.96 manata, birincidə isə 2,76 manata başa gəlib.
5 Saylı Uşaq Vərəm Sanatoriyası tərəfindən çirkab mayelərin daşınması ilə bağlı da 2022-ci ildə 2 kotirovka sorğusu keçirilib. Dövlət satınalmalarının vahid internet portalına yerləşdirilmiş məlumatlarda 01.04.2022-ci ildə başlanılmış kotirovka sorğusunda “BUTTON-21” Məhdud Məsuliyyətli Cəmiyyəti qalib olub və 18.04.2022-ci il tarixdə 13 000 manat məbləğində satınalma müqaviləsinin bağlanıldığı göstərilir.
Uşaq Vərəm Sanatoriyası çirkab mayelərin daşınması üzrə ikinci kotirovka sorğusuna isə 26.04.2022-ci ildə başlamış və “BUTTON-21” Məhdud Məsuliyyətli Cəmiyyəti ilə 13.05.2022-ci ildə 10 530 manat məbləğində satınalma müqaviləsinin bağlanıldığı elan etmişdir.
Qeyd edək ki, 5 Saylı Uşaq Vərəm Sanatoriyası içməli suyun alınması üzrə keçirdiyi kotirovka sorğusunda olduğu kimi, çirkab mayelərin daşınması üzrə keçirilmiş hər iki kotirovka sorğusunda, 1300 ton çirkab mayelərin daşınmasnı nəzərdə tutub. Burada da nədənsə kotirovka sorğusunun birinə 10 530, digərinə isə 13 000 manat vəsait ayırıb. Hansı ki, birincidə çirkab mayelərin bir kubunun daşınması sanatoriyaya 8.1 manata, ikincidə isə 10 manata başa gəlib.
Burada qəribə bir mənzərə yaranır. Necə olur ki, Uşaq Vərəm Sanatoriyası ümumi olaraq 26 000 kubmetr su alıb, cəmi 2600 kubmetr çirkab maye axıdır? Burada suyun qalan hissəsi hara buxarlanır görəsən?
Qeyd edək ki, Sanatoriyanın içməli suyun satınalması ilə bağlı 2021-ci ildə elan etdiyi müsabiqənin qalibi isə “GEMİ İNŞAAT 2017” MMC olub. Tərəflər arasında 11.03.2021 bağlanan müqaviləyə görə 5 Saylı Uşaq Vərəm Sanatoriyası içməli suyun satın alınmasına “GEMİ İNŞAAT 2017” MMC-yə 30 000 manat ödəyib. Bu kotirovka sorğusunda isə alınacaq içməli suyun miqdarı göstərilmir.Sanatoriya 2021-ci ildə çirkab mayelərin daşınmasına isə cəmi 6375 manat xərcləyib. Müqavilə isə “POLIDORA İNŞAAT” Məhdud Məsuliyyətli Cəmiyyəti ilə 27.04.2021-ci il tarixində bağlanılıb.
Qeyd edək ki, 5 saylı Uşaq Vərəm Sanatoriyası tərəfindən içməli suyun satın alması və çirkab mayelərin daşınması ilə bağlı keçirdiyi kotirovka sorğusunda ayrılan vəsaitlərin məbləği tez-tez oynayır. Belə ki, Sanatoriyanın içməli suyun satınalması ilə bağlı 2020-ci ildə elan etdiyi müsabiqənin qalibi isə “FATİMƏ R” MMC olub. Burada da sanatoriya tərəfindən alınacaq içməli suyun miqdarı göstərilmir. Amma müqaviləyə görə sanatoriya MMC-yə 14 991.6 manat vəsait ödəyib. 2020-ci ildə çirkab mayelərin daşınması üzrə də “FATİMƏ R” MMC qalib olub və sanatoriyadan bu xidmət üçün 10 000 manat alıb.
Dövlət satınalmalarının vahid internet portalına yerləşdirilmiş məlumatlardan da göründüyü kimi 5 saylı Uşaq Vərəm Sanatoriyası son üç il ərzində içməli suyun satın alması və çirkab mayelərin daşınması ilə bağlı keçirdiyi kotirovka sorğularında ayrılan vəsaitlərin məbləği müxtəlif formada dəyişir. Yəni Sanatoriyada hər il nə qədər içməli su sərf olunur və çirkab maye daşınır konkret olaraq bəlli olmur. Bu isə bir çox şübhələr yaratmaya bilmir.
Bir şübhəli məqam da 5 saylı Uşaq Vərəm Sanatoriyasının istekyönümlü xidmətlər üzrə keçirdiyi kotirovka sorğusunda üzə çıxır. Belə ki, 25.04.2022-ci ildə başlanması barədə elan verilmiş kotirovka sörğusuna 12.05.2022-ci il tarixdə yekun vurulub və qalib olan “ARBİNO CO” Məhdud Məsuliyyətli Cəmiyyəti ilə 25 888 manat məbləğində satınalma müqaviləsi bağlanıb. Şərtlər toplusunda bayramlarda müxtəlif tədbirlərin keçirilməsi üçün lazım olan malların alınması nəzərdə tututlur.
Amma burada da bir müəmma çıxır. Müəmma ondan ibarətdir ki, 5 saylı Uşaq Vərəm Sanatoriyası illik satınalma planlarında mart-dekabr 2022-ci ildə istehlakyönlü müxtəlif xidmətlər (tədbirin keçirilməsi) üzrə 8 tədbirin keçirilməsini planlayıb. Lakin dövlət satınalmalarının vahid internet portalında istekyönümlü xidmətlər üzrə 2022-ci ildə keçirilməsi nəzərdə tutulan 3 kotirovka sorğusu elanı verib. Onlardan da yalnız birinin, yuxarıda diqqətinizə çatdırdığımızın nəticəsini açıqlayıb ki, hər tədbirin keçirilməsinə orta hesabla 3236 manat düşür. Bu kotirovka sorğusu 8 tədbirin keçirilməsi üçündürsə, onda ayrı-ayrı vaxtlarda elan olunmuş kotirovka sorğuları nə üçündür?
Birincinin başlanma tarixi 01.03.2022-ci il, zərflərin açılış tarixi isə 17.03.2022-ci il göstərilib. İkinci elan yenilənib və müsabiqənin başlama tarixi 03.03.2022-ci il, zərflərin açılış tarixi isə 28.03.2022ci il göstərilib. Üçüncü elan isə 07.04.2022-ci ildə başlanıldığı, 21.04.2022-ci ildə isə zərflərin açılış tarixi qeyd edilib.
Göründüyü kimi 5 saylı Uşaq Vərəm Sanatoriyasının Tender Komissiyası təkcə isməli suyun alınması adı altında hər il dövlətin ayırdığı külli miqdarda vəsaiti sərf edir. Lakin burada əsaslı şübhələrin yaratdığı çoxsaylı suallar meydana çıxır. Sanatoriyaya il ərzində nə qədər uşaq qəbul olunur? Nədən 2020-ci ildə içməli susyun alınmasına 15 min, 2021-ci ildə 30 min, 2022-ci ildə isə birdən birə 74 min manat ayrılıb. Burada yə əvvəlki illərdə ayrılan vəsaitlər tam açıqlanmayıb, ya da 2022-ci ildə qiymətlər süni şəkildə şişirdilib. Bunu həm əvvəlki illərlə müqayisə etdikdə, həm də 2022-ci ildə alınacaq suyun həcmi ilə, ayrılmış vəsaiti müqayisə etdikdə görməmək mümkün deyil. Burada ya içməli suyun çoxu buxarlanıb, ya da ayrılan pulun çoxu.
Aktualinfo.org
