Azərbaycan Vətən müharibəsi aparır. Ordumuz Qarabağı işğaldan azad etmək üçün səfərbər olunub. Oktyabrın 10-da isə humanitar atəşkəs bəyan olunsa da, savaş genişlənir, düşmən tərəf razılaşmaya əməl etmir.
Bu azmış kimi, Ermənistan yeni təcavüzkar və terrorçu siyasətini həyata keçirir. İşğalçı qüvvələr Gəncəni vurmaqla, dinc əhalini qətlə yetirməklə sübut etdilər ki, öz terrorçu mahiyyətindən əl çəkmək istəmirlər.
İcra başçısı kabinetdən çıxmır
Xalqımıza açılan atəşə, ölkənin ikinci şəhəri olan Gəncəyə raket atılmasına, günahsız sivillərin öldürülməsinə müxtəlif rəsmi və beynəlxalq reaksiyalar olsa da, qonşuluqdakı Goranboy şəhərinin rəhbərliyindən səs belə çıxmır.
GundemXeber.Az yazır ki, məntiqlə və mənəvi baxımdan irəli gələrək Goranboy Rayon İcra Hakimiyyəti (RİH) başçısı Məhərrəm Quliyev dərhal Gəncəyə getməli, həmkarı Niyazi Bayramovun və zərər çəkənlərin yanında olmalı, dəstəyini bildirməliydi.
Ölkənin hər yerindən insanlar Gəncəyə axışdı, xüsusən prezidentin köməkçisi Hikmət Hacıyev doğma şəhərinə gedərək insanların arasında oldu, amma düşmənlə sərhəd olan, yaşayış məntəqələri atəşə tutulan Goranboyun icra başçısı Məhərrəm Quliyev “tükünü tərpətmədi”.
Hətta əldə edilən xəbərlərə görə, Goranboy döyüş bölgəsi və cəbhə xətti olmasına baxmayaraq, icra başçısı heç rayonun mərkəzindən bir addım kənara çıxmayıb.
Təsəvvür edirsiniz, İH rəhbəri kabinetindən çıxmır, başçılıq etdiyi rayonda el arasında görünmür, bizsə ondan terrorla üzləşən Gəncəyə getməsini gözləyirik.
Gələn məlumatlarda iddia olunur ki, atəşə məruz qalan Goranboy kəndlərindən bixəbər qalan Məhərrəm Quliyev yerli sakinlərə təskinlik verməkdən belə çəkinir.
Yəni, heç olmasa atəş altında olan bir kəndə baş çək, bu qəhrəman yerlərin insanları ilə görüş, hansısa kəndlinin evində çay iç, dəstək ol, üstəlik, şəkil çəkdir, özünü reklam elə, camaat da görsün ki, rayon rəhbəri onlara həyandır.
Amma Məhərrəm Quliyev xidməti avtomobilindən düşüb İH-dəki otağına gedir, nahar vaxtı rayondakı restorana yollanır, sonra işə qayıdır, axşam da qaldığı evinə dönür.
Halbuki, bütün ölkə müharibəyə köklənib, ordumuz rəşadətlə döyüşür, düşmənə layiqli cavab verir, artilleriya atəşinə, raket hücumlarına məruz qalan cəbhə bölgələrinin mərd və dinc sakinləri düşməndən qorxmadan doğma yurd-yuvalarında yaşamağa davam edirlər, amma belə ağır günlərdə mənəvi ehtiyaca olan insanlara icra başçısı heç bir dəstəyini nümayiş etdirmədi.
Oktyabrın 12-də də, yəni humanitar atəşkəs dövründə belə ermənilər Goranboyda evləri atəşə tutdular, amma Məhərrəm Quliyev ən azı bir açıqlama vermədi.
Goranboyun 4 sabiq başçısı ön cəbhədə, Quliyev isə...
GundemXeber.Az xatırladır ki, 1990-ildən bəri ermənilərlə müharibə vəziyyətində yaşayırıq.
Bu illər ərzində Goranboy rayonuna rəhbərlik etmiş icra başçıları ermənilərlə silahlı atışma zamanında döyüş gedən kəndlərin ön cəbhəsində iştirak ediblər.
Hətta əvvəlki icra başçıları hərbi səhra geyimində, hərbiçilərlə bir cəbhədə erməni təcavüzkarları ilə üz-üzə gəliblər.
Buna misal olaraq, müstəqilliyimizi əldə etdikdən sonra, Goranboy rayonunda icra başçısı vəzifəsini daşımış İrşad Əliyev, Maşallah Abdullayev, Ağa Əkbərov və Nizaməddin Quliyevi göstərmək olar.
Adlarını sadaladığımız hər 4 sabiq icra başçısı ön cəbhədə və cəbhə xəttində olan döyüşçülərin yanında olublar.
Yuxarıdakı adları ona görə qeyd etdik ki, müəyyən zamanlarda şiddətli atışma və hücum əməliyyatları, bu şəxslərin rayona rəhbərlik etdikləri dövrlərdə baş verib.
Ancaq heç zaman İrşad Əliyev, Maşallah Abdullayev, Ağa Əkbərov və Nizaməddin Quliyev hərbçilərimizi, cəbhə xəttinə yaxın kəndlərdə yaşayan sakinləri tək qoymayıblar, dəstəklərini əsirgəməyiblər.
Qeyd edək ki, adlarını çəkdiyimiz icra başçıları vətən uğrunda gedən döyüşlərdə canlarından keçməyə hazır olublar.
Eyni zamanda bu gün düşmən tərəfindən evləri atəşə tutulan Ağdam sakinlərinin mərdanəliyini, onlara dəstək olan icra başçısı Vaqif Həsənovun fəaliyyətini qeyd etmək yerinə düşər.
Ağdamın icra başçısı hər an sakinlərin yanındadır, heç yerə getmir, vətəndaşlarla həmahəng, yumruq kimi olduğunu nümayiş etdirir.
V.Həsənov da cəbhə bölgəsinin bir icra başçısı kimi nümunəvi addımlar atmaqdadır, amma M.Quliyev heç kəsdən ibrət götürmək istəmir.
Goranboyun hazırki icra başçısı döyüşlərin getməsinə baxmayaraq, rayonun mərkəzindən bir addım belə kənara çıxmır.
Görənlərin dediyinə görə, Məhərrəm Quliyev başının dəstəsi ilə rayonun mərkəzi küçələrində o başa, bu başa şütəməkdən başqa bir iş görmür.
Yerli sakinlərin bildirdiyinə görə, M.Quliyev gərginlik yaransa, artilleriya qurğularının mərmiləri Safıkürd və rayona yaxın kəndlərə düşsə, icra başçısını tapmaq çətin olacaq.
Bu laqeydliyinin, biganəliyinin, Goranboylulara münasibətin səbəbini izah etmək mümkün deyil. Axı döyüş gedən bir rayonun rəhbəri cəbhə xəttindəki kənd sakinləri ilə görüşüb onlara ürək-dirək verə bilmirsə, həmin ərazidə panikanın tez yayılma ehtimalı çoxalır.
Əslində hökumət rəsmiləri bu məsələləri diqqətdə saxlamalıdır. Gəncəli balası olan prezident köməkçisi Hikmət Hacıyev gecə-gündüz xalqın içindədir, kəndləri atəşə tutulan Goranboyun icra başçısı isə yaxasını kənara çəkib.
İki Quliyevin iki Vətən savaşında böyük fərqi
GundemXeber.Az bildirir ki, M.Quliyev ən azı ondan əvvəlki icra başçısından bu mənada nümunə götürməliydi.
Erməni postları ilə üz-üzə qalan Tap Qaraqoyunlu kəndində doğulub, boya-başa çatmış, hazırda həbsdə olan sabiq icra başçısı Nizaməddin Quliyev 2016-cı ilin Aprel döyüşlərində fədakarlıq edirdi.
Onun həbsinin motivi tamamilə başqadır, amma faktiki, N.Quliyev rayonun rəhbəri olarkən aprel müharibəsində Goranboyun düşmənlə üz-üzə qalan kəndlərini qarış-qarış gəzir, insanlara ürək-dirək verir və camaatı zəruri ehtiyaclardan, qida tələbatından korluq çəkməyə qoymurdu.
Baxmayaraq ki, hər ikisi Quliyev soyadını daşıyırlar, hər ikisi Vətən müharibəsi görüblər, lakin eks-başçı indikindən ciddi şəkildə fərqlənir.
Unutmaq olmaz ki, bir rayonun başçısı həm də oranın baş komandanı statusu daşıyır.
Amma Ali Baş Komandan İlham Əliyevdən dərs götürməyən Məhərrəm Quliyev atəşə tutulan kəndləri ziyarət etmir. Nə deyəsən...
Əldə etdiyimiz xəbərlərdə o da iddia edilir ki, hazırda yerli sakinlər ordumuza lazım olan qida məhsulları daşıyır, dəstək olur, icra başçısı Məhərrəm Quliyev isə vətənpərvər insanlara sadəcə, tamaşa edir.
Bu məqamda yada düşür ki, M.Quliyevin Azərbaycan üçün əlini ağdan qaraya vurmamaq nə üçün içindən gəlmir.
Xatırlayırsınızsa, icra başçısının atasının vaxtilə separatçı Əlikram Hümbətova dəstək olduğu barədə mətbuatda iddia və ittihamlar səslənmişdi.
Amma müəmmalı və qaranlıq bir işdir ki, M.Quliyev bu ittihamları susqunluqla qarşılamış, nə təkzib etmiş, nə mövqe bildirmiş, nə Goranboy İH adından açıqlama yayılmışdı.
İcra başçısı separatçı Əlikram Hümbətova vaxtilə simpatiya bəslədiyi iddia edilən atasının haqqında ittihamlara cavab verməkdənsə, bunun üstünə Ordumuzun Vətən müharibəsi apardığı, Goranboyda dinc sakinlərin düşmən tərəfindən atəşə tutulduğu günlərdə ən azı reputasiyasını düzəltmək üçün bir fəallıq göstərmir.
Məlumatlara görə, M.Quliyevin fəaliyyətindən ciddi şəkildə narazılıq edən yerli sakinlər Prezident Admnistrasiyasına müraciət etməyə hazırlaşır.
Bu müraciət üçün münasib bir zamanı gözləyən, döyüşlərin davam etdiyi dövrdə yerinə düşmədiyini söyləyən sakinlər dövlətin və rəhbərliyinin mühüm işlərə başının qarışdığını anlayışla qarşılayırlar.
Lakin Goranboydan bir qrup ziyalının, o cümlədən cəbhəyə yaxın kəndlərin sakinlərinin adından PA-na Nizaməddin Quliyevin azadlığa buraxılmasına görə məktub ünvanlanıb.
Xəbərlərə görə, həm M.Quliyevin fəaliyyətindən, ögey münasibətindən şikayət ediləcək, həm də sabiq icra başçısı, əslən Tap Qaraqoyunlu kəndindən olan Nizaməddin Quliyevin azad edilməsi üçün dövlət başçısına və digər müvafiq qurumlara müraciət göndəriləcək.
Məlumata görə, 1000 nəfər yerli sakinlərin imzaları toplanaraq Prezident Administrasiyasına çatdırılıb.
Yerli sakinlər arasında aparılan araşdırmalardan məlum olub ki, Nizaməddin Quliyevin rəhbərliyi dövründə abadlaşan Goranboyun indi hansı günə düşdüyü, hazırkı icra başçısı tərəfindən heç bir iş görülmədiyi vurğulanıb.
İddialara görə, Məhərrəm Quliyev yerli sahibkarları və idarə rəhbərlərini də boğaza yığıb. Belə bir məmur həm dövlətə, həm prezidentin siyasi kursuna, həm goranboyluların istəklərinə uyğun deyil.
Bununla belə yuxarıda qeyd olunan nüanslar, ittihamlar, sakinlərin narazılığı, müharibə şəraitində göstərdiyi münasibətlə bağlı icra başçısının mövqeyini dinləyib dərc etməyə hazırıq.
GundemXeber.Az
