Dövlət Təhlükəsizliyi Xidməti Mədəniyyət Nazirliyində əməliyyat keçirib. Əməliyyat zamanı mədəniyyət nazirinin birinci müavini Elnur Əliyev, nazirliyin Təchizat və əmlak şöbəsinin müdiri İlkin Nəsibov, Protokol şöbəsinin rəisi Kamil Rzayev və digər vəzifəli şəxslər saxlanılaraq istintaqa cəlb ediliblər. DİA.AZ bildirir ki, DTX-nin keçirdiyi əməliyyatın detalları açıqlanmasa da, nazirliyin yüksək vəzifəli əməkdaşlarının korrupsiya və vəzifə səlahiyyətlərindən sui-istifadə hallarına görə saxlanıldıqları bildirilir. O da məlum olub ki, əməliyyat keçirilən gün nazir Anar Kərimov işdə olmayıb. Mətbuatda yer alan məlumata görə, Hesablama Palatası Mədəniyyət Nazirliyində yoxlama aparıb, Anar Kərimovun vəzifədə olduğu dövr təftiş edilib. Yoxlamaların nəticələrinə gəlincə, nazirlikdə külli miqdarda yeyinti faktının üzə çıxdığı iddia olunur.
Lakin hələlik bununla bağlı rəsmi məlumat dərc olunmayıb. Qəribə görünsə də, DTX 2020-ci ilin mayında Mədəniyyət Nazirliyində əməliyyat keçirmiş və həmin vaxt nazir müavini Rafiq Bayramov saxlanılmışdı. Korrupsiya olayında adı hallanan Əbülfəs Qarayev 2020-ci ilin mayın 21-də vəzifəsindən azad edilmiş, bir müddət sonra onun yerinə Anar Kərimov gətirilmişdi. İlk baxışda yeni nazirdən gözləntilər müsbət olsa da, cəmi bir ildən sonra belə neqativ halların üzə çıxması təəssüf doğurur. İddialara əsasən, Anar Kərimovun əvvəlki rəhbərliyin yol verdiyi səhvləri təkrarlaması onun tezliklə vəzifəsini itirməsinə səbəb ola bilər.
Nazirlikdəki əməliyyat barədə danışan Milli Məclisin deputatı Vahid Əhmədov bildirib ki, ortada korrupsiya faktı varsa, ciddi araşdırılmalı və qanunauyğun şəkildə addım atılmalıdır: “Bir nazirlikdə iki dəfə eyni hadisə baş verirsə, deməli, hamı məsuliyyət daşıyır. Korrupsiya və rüşvətlə bağlı daha ciddi tədbirlərin görülməsinə ehtiyac var. Dövlət başçısı dəfələrlə korrupsiya ilə bağlı xəbərdarlıq edib.
Bundan sonra dərhal müəyyən tədbirlər həyata keçirilir, yoxlamalar aparılır. Ancaq yenə də fikir verirsən ki, korrupsiya hallarına yol verirlər. Açığı, mən düşünürdüm ki, 44 günlük Vətən müharibəsindən sonra korrupsiya ilə bağlı məsələlər bir balaca öz həllini tapar. Təəssüflər olsun ki, mən hazırda onun əksini gördüm. Bu, bizim millətimiz və dövlətimizin təhlükəsizliyi üçün ciddi problemdir. Mənimsəmə halları ciddi araşdırılmalı, dövlət büdcəsi üzrə nəzarət mexanizmi gücləndirilməlidir. Hesablama Palatası daha ciddi yoxlamalar aparmalıdır. Yoxlamanın nəticələri ciddi müzakirə obyektinə çevrilməlidir. Şəffaflıq təmin olunmalıdır.
Qeyri-hökumət təşkilatları yoxlamalara çağırılmalıdır”. V.Əhmədov xüsusilə vurğulayıb ki, korrupsiya şübhəsi ilə saxlanan məmurlar ağır cəzaya məhkum edilməlidirlər: “İşğaldan azad olunmuş ərazilərdə quruculuq işləri gedir. Bura böyük vəsaitlər xərclənməlidir. İri layihələr həyata keçiriləcək. Yəni bu, ciddi məsələdir. Cinayətə bulaşmış insanlar sözün əsl mənasında cəzalarını almalıdırlar. Yoxsa görürsən ki, adam bir-iki il həbsdə yatır, çıxdıqda yenə öz kefi ilə hərəkət edir”. Anar Kərimovun işdən çıxarılması ehtimalına gəlincə, deputat araşdırmanın nəticəsindən sonra hər şeyin bəlli olacağını vurğulayıb: “Nazirin vəzifədən kənarlaşdırılması Prezidentin səlahiyyətində olan məsələdir. Doğrudur, nazir müavini, digər vəzifəli şəxslər saxlanılıblar. Ancaq saxlanılma səbəbi ilə bağlı dəqiq fakt yoxdur. Nəyə görə saxlanıldıqları ilə bağlı məlumat verildikdən sonra hansısa qərar veriləcək. Bu, daha doğrudur. Nazir hələ təzədir, araşdırmalardan sonra hər şey bilinəcək”.
Anar Kərimov 2021-ci ildən mədəniyyət naziri vəzifəsində çalışır. O, daha öncə Azərbaycanın UNESCO yanında daimi nümayəndəsi olub. Mədəniyyət Nazirliyində aşkarlanan yeyinti halları həqiqətən də heyrət doğurur. Bu, yeyinti, korrupsiyanın daha çox yollarda olduğu qənaətini də sarsıdır. Demək ki, mədəniyyətimizdə də oğrular varmış.
Məlum hadisə ilə bağlı “Şərq”ə danışan D.Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu mədəniyyət sahəsindəki yeyintinin, oğurluğun bağışlanmaz olduğunu bildirdi:
- Hər bir korrupsiya faktı millətdən, dövlətdən oğurluqdur, bu, birmənalıdır. Hər bir belə fakt, korrupsiya halı üzə çıxdıqda da məsuliyyət daşıyan şəxslər həbs edilir, vəzifəsindən kənarlaşdırılır. Mədəniyyət sahəsi niyə önəmlidir, çünki burada məsələ xalqın milli sərvətindən gedir. Başqa hansısa sahədə baş vermiş korrupsiya halını müəyyən qədər aradan qaldırmaq mümkündür. Məsələ maliyyədirsə, hansısa dərəcədə əvəz ediləcək, yerini tutacaq. Amma xalqın milli sərvətlərinə qarşı oğurluq edilirsə, onun yerini doldurmaq olmur.
Korrupsiya bir bəladır, onun kökü həm aşağıdan, həm də yuxarıdan kəsilməlidir. Amma bu gün mədəniyyətimizdə oğurluq varsa, deməli, oğurlanan bir millət olaraq hamımızın sərvətidir. Deməli, millətdən oğurluq edilib. Bu, xalqa, millətə və dövlətə qarşı ən ağır cinayətdir. Korrupsiya nədən yaranır? Vəzifəli şəxsin acgözlüyündən və dövləti, milləti sevməməkdən. Məmur əgər xalqını, dövlətini sevən olsa, korrupsiyaya yol verməz, dövlətin, xalqın malının oğurlanmasına razı olmaz. Korrupsiyanın kökü milləti, dövləti sevməklə kəsilər.
N.Cəfəroğlu vəzifələrə təyinat zamanı əsas meyarın savad, xarici ölkələrdə ali təhsillə deyil, dövlətə bağlılıq, xalqa sevgi olmasının vacibliyini önə çəkdi:
- Vəzifələrə milləti, dövləti sevən insanlar təyin edilməlidir. O insanlar ki, artıq dövlətə bağlılıqlarını, xalqa sevgilərini isbat ediblər. Belə insanlarımız var. Savadlı, həyat təcrübəsi olan insanlardır. Ən əsası isə uzun illər, hətta müxalif cəbhədə olmaqlarına, tənqidlərlə çıxış etmələrinə baxmayaraq dövləti və milləti sevən insanlar təyin edilməlidir.
Dövlətini sevən ondan oğurluq etməz, milləti, xalqı sevən onun milli sərvətlərinə xor baxmaz, qədrini bilər bu sərvətin. Vəzifələrə təyinatda məhz bu meyar əsas götürülməlidir.
