ABU Tələbələrinin Hüquqlarını Müdafiə Komitəsi sədrinin məktubları dünən Fransa Konstitusiya Şurasının, Fransa Respublikası Prezidentinin, Fransanın Baş Naziri və hökumət nümayəndələrinin, Fransa Senatının, həmçinin Fransanın Milli Assambleyasının ofisinə elektron məktub vasitəsilə çatdırıldı...
Dünən “Təzadlar”a Fransa Prezidentinin İşlər İdarəsinin elektron Mərkəzindən elektron cavab gəldi...
“Təzadlar”ın ötən sayında tanınmış vəkil, ABU Tələbələrinin Hüquqlarını Müdafiə Komitəsinin sədri Ramiz Zeynalovun Fransa Respublikasının Prezidentinə müraciətini dərc etmişdik. Komitə sədri Fransa Prezidenti cənab Fransua Ollanda müraciətində keçmiş ABU rektoru, bir müddətdir Fransada məskunlaşmış Elşad Abdullayevin çoxsaylı cinayət əməllərini, xüsusən də onun minlərlə tələbələri aldadaraq onların təhsil alacağı vədi ilə külli miqdarda pullarını mənimsədiyinə, minlərlə gənc oğlan və qıza saxta diplom satdığına, E.Abdullayevin Beynəlxalq aləmdə ən ağır cinayət sayılan insan orqanlarının qansuz transplantasiyasına özünə məxsus “ABU Klinika”da şərait yaratdığına və s. görə Fransadan deportasiya olunmasını xahiş etmişdi.
Həmçinin Komitə sədri müraciətə E.Abdullayevin bu və ya digər cinayət əməllərini sübut edən və mötəbər sübutları özündə ehtiva edən sənədləri də əlavə etmişdi...
Fransa Prezidentinin İşlər İdarəsinin Elektron Mərkəzindən “Təzadlar”a cavab gəldi...
Dünən “Təzadlar” daha bir ilkə imza atdı. Belə ki, ABU Tələbələrinin Hüquqlarını Müdafiə Komitəsinin sədri Ramiz Zeynalovun Fransa Respublikasının Prezidentinə müraciətini aidiyyəti ünvana, daha dəqiq desək, bir neçə ünvana, o cümlədən Fransa Prezidenti cənab Fransua Ollandın birbaşa elektron poçtuna xüsusi qeydiyyat parolu ilə göndərdik.
Cavab özünü çox gözlətmədi və “Təzadlar”ın elektron ünvanına gələn cavabda Komitə sədri R.Zeynalovun müraciətinin qəbul edildiyi göstərilirdi. Həmçinin həmin qeyd xarakteristikasında hər hansı bir əlavə dəyişiklik edilməsi üçün şərait yaradılması da qeyd olunurdu.
**
Xatırladırıq ki, ABU Tələbələrinin Hüquqlarını Müdafiə Komitəsinin sədri Ramiz Zeynalovun Fransa Respublikasının Prezidentinə müraciəti, həmçinin dünən fransız dilinə tərcümə olunaraq Fransanın digər müvafiq dövlət qurumlarına göndərilib. Bu sırada Fransa Konstitusiya Şurası, Fransa Respublikasının Prezidenti, Fransanın Baş Naziri və hökumət nümayəndələri, Fransa Senatı, həmçinin Fransanın Milli Assambleyası vardır.
Xatırladırıq ki, Komitə sədri R.Zeynalovun Müraciətində deyilirdi:
-Çox hörmətli cənab Prezident Fransua Olland!
Bildirirəm ki, Azərbaycanda və Rusiyada uzun illər peşəkar vəkil kimi fəaliyyət göstərmişəm və hazırda Azərbaycan Vəkillər kollegiyasının üzvüyəm, dünyanın bir çox ölkələrinin Vəkillik İnstitutları ilə əmkdaşlıq şəraitində fəaliyyət göstərirəm.
Onu da nəzərinizə çatdırıram ki, bu ilin fevral ayından “Azərbaycan Beynəlxalq Universiteti” adlı özəl təhsil müəssisəsinin Tələbələrinin Hüquqlarının Müdafiəsi Komitəsinin sədriyəm. Bu Komitənin yaradılmasına səbəb isə həmin universitetin sabiq rektoru, bir müddətdir Fransada mühacir kimi yaşayan Elşad İslam oğlu Abdullayevin qanunsuz hərəkətlərinin, korrupsiya əməllərinin qurbanı olan on minlərlə tələbə və onların valideynlərinin pozulmuş hüquqlarının bərpasıdır.
Məlumat üçün bildirirəm ki, Azərbaycan Beynəlxalq Universiteti (ABU) 1997-ci ildə təsis olunmuşdur və hər dəfə 5 illik müddətinə fəaliyyəti üçün Azərbaycan Təhsil Nazirliyindən lisenziya almışdır. Lakin fəaliyyəti dövründə adı çəkilən təhsil müəssisəsindəki qanunsuz fəaliyyət barədə yuxarı dövlət orqanlarına dəfələrlə şikayətlər edilmiş, Təhsil Nazirliyi tərəfindən bir neçə dəfə ABU-nun rəhbəri Elşad İslam oğlu Abdullayevə xəbərdarlıq edilmişdir. Bu xəbərdarlıqlara səbəb isə ABU-ya qanunsuz tələbə qəbulu, kütləvi surətdə saxta diplom satışı, tələbələrdən semestrlərdə (imtahanlarda) kütləvi pul yığılıb rüşvət alınması, nəhayət, saxta yolla hazır diplomların satışı olmuşdur. Vəziyyət o dərəcədə acınacaqlı olmuşdur ki, qanunsuz əməllərindən çəkinmək əvəzinə, Elşad İslam oğlu Abdullayev ABU-da qohum-əqrabadan ibarət mütəşəkkil cinayətkar dəstə yaratmış, özünün qardaşlarını, bacı uşaqlarını, qayınatasını, qayınlarını, digər qohumlarını bu prosesə cəlb etmişdir.
Bununla kifayətlənməyən ABU rektoru hətta, paralel olaraq Rusiyada qanunsuz olaraq ABU-nun Moskva, Dağıstan, Dubay filiallarını yaratmış, Azərbaycandakı cinayətkar fəaliyyətini orada da davam etdirmişdir. Nəhayət, vəziyyətin kritik olduğunu, minlərlə valideyn və tələbələrdən kütləvi şikayətlərin olmasını əsas tutan Azərbaycan Təhsil Nazirliyi, Azərbaycan Hökuməti 2010-cu ildə ABU-nun fəaliyyətini dayandırmış, lisenziyasını ləğv etmişdir.
Bundan əlavə, 2011-ci ildə Ukrayna DİN-dən Azərbaycan Baş Prokurorluğuna daxil olmuş istintaq sənədlərindən bəlli olmuşdur ki, Elşad İslam oğlu Abdullayev uzun illər ərzində özünə məxsus “ABU Klinika”da qanunsuz olaraq insan orqanlarının transplantasiyası ilə də məşğul olmuş, burada mütəşəkkil cinayətkar dəstə fəaliyyət göstərmişdir. Bu fakt üzrə Azərbaycan Baş Prokurorluğunda E.Abdullayevə qarşı cinayət işi başlanmışdır. Lakin bundan duyuq düşən Elşad İslam oğlu Abdullayev dərhal Fransaya qaçmış, orada özünü dövlət tərəfindən təqib olunmuş kimi təqdim edərək mühacir kimi yaşamağa başlamışdır. Halbuki E.Abdullayev özü uzun müddət Dövləti vəzifələrdə çalışmış, hakim Yeni Azərbaycan Partiyasının ən fəal üzvlərindən biri, Azərbaycan Prezidenti yanında Ali Attestasiya Komissiyasının hüquq sektorunun müdiri, Heydər Əliyev İrsini Öyrənmə Mərkəzinin direktoru olmuşdur və s. Yəni, hakimiyyətin himayəsində və təminatında olmuş, hakim partiyanın fəallarından olub Siyasi Şurasında təmsil olunmuş bir şəxsə qarşı hakimiyyətin siyasi təzyiq və ya təqibi mümkünsüzdür. O, sadəcə, bu yolla Fransa hökumətini aldatmağa çalışmış və təəssüflər olsun ki, buna qismən də nail ola bilmişdir.
Bundan əlavə, E.Abdullayevin barəsində hazırda rüşvət verməyə cəhd cinayəti üzrə də cinayət işi istintaq olunur. E.Abdullayevin Fransanın tanınmış alimi Gi Brebanın “Fransanın inzibati hüququ”, Rusiyann tanınmış professoru A.N.Kozırinin “Beynəlxalq inzibati hüquq” adlı elmi əsərlərini oğurlayıb öz adına çıxması barədə də Azərbaycanda və Rusiyada böyük qalmaqal yaranmış, hətta Rusiyalı alim Kozırin özünün son illərdə nəşr etdirdiyi dərs kitabında bu barədə qəzəblə açıqlama yazmış, Rusiya TN-nə şikayət vermişdir. E.Abdullayevin bu plagiat hərəkətləri onun doktorluq elmi işində də baş vermişdir. Bununla bağlı Azərbaycanda bir tanınmış müstəqil jurnalistin araşdırması nəticəsində toplanmış materiallar Rusiya TN-ə göndərilmişdir və bununla bağlı nazirlikdə yaradılmış Xüsusi İşçi Qrup 2011-ci ilin dekabrın 21-də həmin doktorluq işini ləğv etmişdir. Bu barədə bütün rəsmi sənədləri Sizə təqdim edirəm.
Çox hörmətli cənab Prezident!
Azərbaycanda hər kəsə məlumdur ki, Fransa Avropada demokratik dəyərlərə xüsusi önəm verən, insan azadlıqları və hüquqlarının pozulmasına qarşı çıxan, ədalətin və haqqın bərqərar olunması üçün səy göstərən bir dövlətdir. Lakin Elşad İslam oğlu Abdullayev kimi bir korrupsionerin və cinayətkarın Fransa kimi bir demokratik dəyərlər beşiyi olan ölkədə cəzasız yaşaması Azərbaycan ictimaiyyətində təəssüf hissi ilə qarşılanır və Fransa hökumətinə, Fransa dövlətinin demokratik dəyərlərinə, qanunlara hörmət imicinə olan inamını heçə endirir.
Odur ki, bir vəkil və hüquqşünas, Komitə sədri olaraq, xahiş eldirəm:
-Müraciətimə həssas yanaşılaraq, Elşad İslam oğlu Abdullayevin Fransada cəzasız yaşayıb-fəaliyyət göstərməsinə imkan verilməsinin qarşısı alınsın və o, deportasiya olunaraq Azərbaycanın hüquq mühafizə orqanlarına təhvil verilsin.
Dərin hörmət və inamla:
Ramiz Zeynalov,
Azərbaycan, Bakı şəhəri
Elekt. Ünvan: a_ramzey@rambler.ru
***
Bir daha xatırladırıq ki, adı çəkilən müraciət Fransa Konstitusiya Şurasına (www.conseil-constitutionnel.fr), Fransa Respublikasının Prezidentinə (www.elysee.fr), Fransanın Baş Nazir və hökumətinə (www.premier-ministre.gouv.fr), Fransa Senatına (www.senat.fr), Fransa Milli Assambleyasına (www.assemblee-nationale.fr), 3 səviyyəli hüquqpozuntularına baxan Cinayət məhkəmələri (www.justice.gouv.fr, www.conseil-etat.fr) göndərilib.
Bizi izləyin!
“Təzadlar”ın Araşdırma Qrupu
