DİA.AZ: - Xaçmaz rayonunun idarə olunmasında öz istisna rolu olan Xaçmaz rayon Torpaq Şöbəsinin müdiri Adgözəl Tağıyev özünün “torpaq sürüşdürmə əməliyyatları” ilə əhalini bezdirib.
Rayondakı qaynaqlardan DİA.AZ-a daxil olan məlumatda deyilir ki, Xaçmaz şəhəri Xudu Məmmədov küçəsi ev 10-da yaşayan sahibkar qadın və müəllimə Əliyeva Şərqiyyə Mehdi qızı 2006-cı ildə müracət edərək rayonun Seyidli kənd bələdiyyəsinin ərazisindən Əhmədova (Cəfərova) Fərqanə Yavər qızının adına rəsmiləşdirərək kod -30221038 JN-309A nömrəsi ilə dövlət kadastrında qeyd olunmuş 6 sot torpaq sahəsi alır. Həmin torpaq sahəsinin bir hissəsinə uzunluğu 20 metr, hündürlüyü 2m 20 sm olan hasar çəkdirərək yaşayış üçün ev tikintisinə başlayır.
23.08.2012-ci il tarixdə ona 050-504-98-32 nömrəli mobil telefonuna zəng gələrək özünü Samir kimi təqdim edən şəxs əmr edərək hasarı sökməsini və bu torpağın Xaçmaz rayon Torpaq Şöbəsinin müdiri Adıgözəl Tağıyev tərəfindən özünə satıldığını bildirir. Sahibkar da təəccüblənərək yerin onun qızına aid olduğunu bildirir.
27.08.2012-ci il tarixdə öz natamam tikilmiş evinə və həyətinə nəzarət etmək üçün adıçəkilən ünvana gələndə Şərqiyyə Əliyeva hasarının 80 sm-ə yaxın hündürlüyündə olan hissəsinin söküldüyünü görür. Dərhal Daxili İşlər Nazirliyinin 102 xidmətinə zəng vuraraq hadisə barədə xəbər verən sahibkar sonradan Xudat Şəhər Polis Bölməsinə ərizə ilə müraciət edir. Səhərisi gün Polis Bölməsinə gələndə yolda İcra Başçısı Şəmsəddin Xanbabayevi görən müəllimə ona şikayətlənərək Adgözəl Tağıyevin əməllərindən gileylənir. Ancaq maraqlıdır ki, sonradan 04.09.2012-ci il tarixdə yenidən torpaq sahəsinə nəzarət etmək üçün gələndə isə görür ki, hasar bütövlükdə traktorla sökülərək, 10-15 metr içəriyə doğru sürüdülüb. Bu barədə yenidən Xudat Polis Bölməsinə müraciət edir.
Maraqlıdır ki, sahibkar müəllimənin etdiyi şikayət bu gün də öz həllini tapmayıb.Şikayətçinin öz ərizəsinin aqibəti barədə isə heç bir məlumatı yoxdur. Qeyri-qanuni olaraq hasarı sökülən müəllimə isə başına gələn situasiya ilə bağlı daha yuxarı instansiyalara müraciət etmək qərarına gəlib.
Onu da qeyd edək ki, Xaçmaz DT və XK-nin rəhbəri Adıgözəl Tağıyevin əhaliyə aid olan torpaq sahələrini “öz xəritəsində sürüşdürərək” satması və bu satınalmalar ucbatından onlarla vətəndaşın məhkəmələrin yollarında qalması ilə bağlı ilk fakt deyil.
