26 dekabrda saytımızda “Hüquq müdafiəçilərindən birinə icazə verilir, o birinə yox..” başlıqlı məqalə dərc olunmuşdu. Məqalə 14 saylı Cəzaçəkmə Müəssisəsində ( CM ) ölmüş məhkum Elşad Babayevin bacısı Simuzər Babayevanın “Yeni Müsavat” qəzetinə verdiyi açıqlamadan bəhs edirdi. Məhkumun bacısı bildirirdi ki: “Dekabrın 22-də axşam 7-8 radələrində telefonuma zəng gəldi. Kimliyi haqda məlumat verməyən şəxs dedi ki, qardaşın Elşadın meyiti Lökbatanda morqdadır. Ondan onun ölümünün səbəbini soruşdum. Dedi ki, heç bir məlumat verə bilmərik. Dediyi ünvana getdim. Meyitxanada qardaşımın meyitinə baxdım. Onun qollarında, ayaqlarının altında, boynunda, belində, üzündə xəsarətlər, işgəncə izləri vardı. Ayaqlarının altı şişmişdi. Morqdan bir sənəd verdilər. Orada qardaşımın ölümünün səbəbi göstərilməmişdi. Bu gün də bunu bizə deməyiblər. Mən morqda qardaşımın meyidinin şəkillərini çəkmişəm”.
S.Babayeva dekabrın 22-də 14 saylı cəzaçəkmə müəssisəsinə gedərək qardaşının ölümünün səbəbini öyrənməyə çalışıb: “Gecə 12-də müəssisədə oldum. Orada iclas idi. Dedilər ki, generallar gəlib. Mən müəssisəsinin içinə girib generallardan birindən qardaşımın ölümünün səbəbini soruşdum. Çox etinasız şəkildə, gülərək dedi ki, bu haqda məlumatı yoxdur. Mən etiraz etdim. Sonradan dedilər ki, müstəntiq buradadır. Oradan sənədləri aparırdılar. Müəssisəsinin həyətində çoxlu maşınlar vardı. Müstəntiqdən soruşdum ki, qardaşımı məhbuslar öldürüb, yoxsa müəssisə məmurları? İntihar edib etmədiyini də xəbər aldım. Müstəntiq dedi ki, qardaşın idmançı adam olub, intihar nədir? Məhbusların orda nə işi var? Müstəntiq dedi ki, qardaşın məhbus əlində öləcək adam deyil, onu işçilər döyüb”.
İşgəncələr Əleyhinə Azərbaycan Komitəsinin sədri Elçin Behbudov isə “Turan”a bildirib ki, məhkumun işgəncə verilərək öldürülməsinə görə məsuliyyəti Penitensiar Xidmətin rəhbərliyi daşıyır.
Elçin Behbudov onu da bildirib ki, məhkumun bədənində çoxsaylı işgəncənin izləri var, bu mərhumun bacısının təqdim elədiyi fotolardan açıq-aşkar sezilir…
Hüquq müdafiəçisinin dediklərindən məlum olub ki, onu obyektiv mövqeyinə görə CM-ə buraxmırlar.
5 yanvarda qafqaznews.org saytı Elşad Babayevin bacısı Simuzər Babayeva ilə əlaqə saxlayıb. Mərhumun bacısı bildirib ki: “ Bir neçə gün əvvəl ədliyyə nazirinin müavini, Penitensiar Xidmətin rəisi Mədət Quliyevlə görüşdüm. O, bildirdi ki, Elşad Babayev özbaşına CM-nin sanitar hissəsinə keçmək istəyib. Guya qardaşım müalicə olunan dostu üçün çay gətirmək istəyib. Və Elşad nəzarətçilərə tabe olmadığı üçün cəzalandırılıb”.
Simuzər Babayeva Mədət Quliyevə bildirib ki, qardaşımın bədənində işgəncə izləri var idi..belə cəza olur?
Nazir müavini isə cavabında bildirib ki, belə hallarda qanun məhkumu dubinka ilə cəzalandırmağa icazə verir.
Mən Mədət Quliyevdən “ Qardaşımın bədənində salamat yer qalmamışdı…siz onun şəkillərini görmüsünüzmü” soruşanda o, belə cavab verdi: “ Mən sizin qardaşınızla bağlı kifayət qədər informasiyaya malikəm. Əsl həqiqət qardaşınızın cəsədinin tibbi ekspertizasından sonra məlum olacaq”.
Mən isə PX-nin rəisinə bildirdim ki, günahkarların haqlı cəza alması üçün mən hətta qardaşımın cəsədinin eksqumasiya olunmasına da razıyam.
Nazir müavini isə əvəzində bildirib ki, hazırda Qaradağ rayon prokurorluğu istintaq aparır, mən özüm də xüsusi araşdırma aparıram, yəqin ki, yanvarın 15-dək ortada obyektiv nəticə olacaq.
Simuzər Babayeva isə qafqaznews.org-a bildirib ki, mən nazir müavinin dediklərinə inanmıram, güman ki onlar işi bağlamaq istəyirlər.
Həqiqətənmi, Mədət Quliyevin dediyi kimi məhkumu dubinka ilə cəzalandırmaq olarmı?
seide 1 Məhkumun ölümündə şahid olanlara təzyiq edilir? FOTOBu suala hüquq müdafiəçisi Səidə Qocamanlı belə cavab verdi: “ Mədət Quliyev düz demir. Nəzarətçilərin məhkuma qarşı dubinka tətbiq etmək hüququ yoxdur”.
Səidə Qocamanlı onu da bildirib ki, Ədliyyə Nazirliyinin nəzdindəki İctimai Komitə bu məsələ ilə bağlı xüsusi araşdırma aparmalıdır. İctimai Komitənin digər üzvü Səadət Bənənyarlı isə qafqaznews.org –a bildirib ki:“ Mən özüm araşdırma aparmışam. Və məlum olub ki, məhkum nəzarətçilərlə deyil, digər məhkumlarla dalaşıb, nəticədə karserə düşüb və orada ölüb. Mərhumun yaxınları narazıdırsa, İctimai Komitəyə müraciət eləsinlər”Onun fikrincə əsl həqiqət ancaq tibbi ekspertizadan sonra məlum ola bilər.
Hüquq müdafiəçisi İradə Cavadova isə qafqaznews.org-a bildirib ki, Mədət Quliyevin dediklərinə məəttəl qalıb: “ PX-nin əsasnaməsində yazılıb ki, ancaq qiyam vaxtı dubinka tətbiq edilə bilər”.
İradə Cavadova Səadət Bənənyarlının dedikləri ilə razılaşmayıb: “ Azərbaycanda hələ heç bir tibb ekspertiza güc strukturlarının verdiyi işgəncəni təsdiq eləməyib”.
Elçin Behbudov da İradə Cavadovanın dediklərini təsdiq elədi: “ Mövcud qanunvericiliyə görə, ancaq qiyam vaxtı dubinka tətbiq edilə bilər”.
Elçin Behbudov qafqaznews.org-a onu da bildirib ki, bugünlərdə 14 saylı CM-dəki 5 məhkumun qohumları ona müraciət edib: “ Onlar Elşad Babayevlə bağlı hadisənin şahidləri olublar. Araz Quliyev, İlham Hətəmov, Ramil Vəliyev, Anar Qasımlı və Rza Ağalı. Onları susmağa məcbur edirlər. Mən bu barədə ədliyyə naziri Fikrət Məmmədova məlumat vermişəm”.
Elşad Babayevin ölümü ilə bağlı iş Qaradağ rayon prokurorluğunun müstəntiqi Eyyub Bəşirova həvalə olunub.
Biz yuxarıda adları çəkilən 5 məhbusa təzyiqlərlə bağlı müstəntiqə müraciət elədik.
Təəssüf ki, Eyyub Bəşirov sualımıza cavab verməkdən imtina elədi.
