Zərdabda Mərdan Camalovun xeyir-duası ilə yol təmirini və şəhərin abadlaşdırılmasını heç bir texnikası və işçisi olmayan şirkət həyata keçirəcək…
Heç kimə sirr deyil ki, məmurlar dövlət büdcəsini müxtəlif tenderlər vasitəsi ilə “soyub soğan qabığına çevrirlər”. Son bir neçə ildə isə Azərbaycan mətbuatında tender biabırçılıqları haqqında elə məlumatlar dərc olunur ki, orda söz doğrudan bitir və deməyə heç nə qalmır. Xüsusən satınalma haqqında qanun elə açıq şəkildə tapdanılır ki… Buna baxmayaraq “tender mafiyası” öz işini görür və heç kim onlara “gözün üstə qaşın var” demir, ya da deyə bilmir. Tender elan olunandan sonra yaranan MMC-lərin qalib elan olunması praktikası isə son günlərə qədər davam edib.
İşin maraqlı tərəflərindən biri də odur ki, yüz minlərlə manatlıq, hətta milyonluq tenderləri “ udan” “10 manatlıq” MMC-lər heç bir maddi və texniki bazası, ofisi, təsisçidən başqa işçisi və təcrübəsi “olmayan” şirkətlərdir və bu şirkətlərin hüquqi unvanı isə ev ünvanları göstərilir. Bəs bu qondarma şirkətlər milyonluq tenderləri necə qazanır? Bunu kim təşkil edir?
Ən əsası milyonlarla dövlət vəsaitini öz hesabına keçirən bu qondarma MMC-lər hər il dövlətdən nə qədər vergi yayındırırlar? İqtisadiyyat Nazirliyi yanında Vergi Xidməti bu sualın cavabını bilirmi?
Bir daha qeyd edək ki, Azərbaycanda son illər icra hakimiyyətlərinin əsas qazanc mənbələri olan Dövlət satınalmalarında şübhəli tenderlərin artması barədə mətbuatda davamlı olaraq çoxsaylı məlumatlar dərc edilsə də, hələ də bu sahədə ciddi problemlər qalmaqda davam edir və əlaqədar qurumlar, xüsusən Maliyyə Nazirliyi və Vergi Xidməti bütün yazılanları görməməzlikdən və duymamazlıqdan gəlir.
Ayrı-ayrı dövlət qurumlarının keçirdiyi tenderlərdə eyni şirkətlərin davamlı olaraq qalib gəlməsi bu sahədə şəffaflıq məsələsini ciddi şəkildə aktuallaşdırır. PİA.-ın araştırmasına görə demək olar ki, Satınalmalar üzrə Dövlət Agentliyinin rəsmi saytında yer alan tenderlərin 80-90%-i şübhəli tenderlərdir. Belə şübhəli tenderlərdən biri də biri də Zərdab rayon İcra Hakimiyyəti tərəfindən həyata keçirilmişdir. Belə ki, Satınalmalar üzrə Dövlət Agentliyinin rəsmi saytına görə 2020-ci ildə Zərdab şəhərinin abadlaşdırılması və yolların təmiri üçün keçirilən tenderin qalibi “İnşaat Servis-2” MMC olub. Zərdab rayon İcra Hakimiyyəti ilə hər iki tenderin qalibi olan şirkətlə üst-üstə 1 milyon 169 min 975 manat müqavilə bağlanılıb. (Şəhərin abadlaşdırılması üçün 549 min 998 manat, yolların təmiri üçün 619 min 975 manat).
Bizim üçün maraqlı olan Zərdabda bu iki böyük tenderi udan, yol çəkən və inşaat işləri ilə məşğul olan şirkətin mərkəzi ofisinin harda yerləşməsi və kimə məxsus olması idi. Araşdırmamız zamanı məlum oldu ki, 1 milyon 169 min 975 manatlıq tenderin qalibi olan “İnşaat Servis-2” MMC-nin ümumiyyətlə ofisi yoxdur. MMC-nin kimə məxsusluğunu araşdırarkən isə qarşımıza çox tanış bir ad çıxdı. Vüqar Aslanov… Bu həmin Vüqar Aslanovdur ki, “Veteks-2017” MMC şirkəti ilə uzun illər boyu Beyləqanda və Zərdabda böyük məbləğlərdə müxtəlif tenderləri udub. Beyləqanda və Zərdabda gördüyü işlərin bəziləri isə artıq dağlıb.
Görünür ki, “Veteks-2017 MMC” mətbuatın dilində çox hallandığı üçün Vüqar Aslanov bu dəfə “İnşaat Servis-2” MMC-ni dövriyyəyə salıb. Bəs Zərdab yollarını təmir edəcək şirkət bu işi görmək üçün hansı texnika və mütəxəssis bazasına sahibdir? Əgər sizə desək ki, “İnşaat Servis-2” MMC-nin yol çəkmək, ya da təmir etmək üçün heç bir texnikası və işçisi yoxdur, onda nə deyərsiniz? Bu ağlasızmazdır, gülməlidir və tükürpədicidir…
Görəsən Zərdab rayon icra hakimiyyəti 619 min 975 manatlıq yol təmiri layihəsini “İnşaat Servis-2” MMC-yə verərkən bu şirkətlə heç maraqlanmayıb? Maraqlanıbsa, onda “İnşaat Servis-2” MMC ilə müqaviləni necə bağlayıb və o yollar necə təmir olunacaq? Bəlkə bu müqavilə Mərdan Camalovla Vüqar Aslanov arasında şəxsi müqavilədir?
Bizə məlum olduğuna görə Vüqar Aslanov müxtəlif rayonlarda abadlıq işlərini kənardan briqada cəlb etməklə və qanunsuz insan çalışdırmaqla həyata keçirir.
Məlumata görə keçmişdə də Zərdabda yoların təmiri, abadlaşdırma işlərinin qalibi və binaların təmiri işi ilə Vüqar Aslanova mənsub olan “Veteks-2017” MMC şirkəti məşğul olub. Bu şirkət eyni vaxtda, həm də Beyləqan rayonunda yolların təmiri, tikinti işləri və sair tenderlərin qalibi olub.
Bəs heç bir işçisi və texnikası olmayan Vüqar Aslanov bu işləri necə görüb? Bu sualın cavabını onunla əməkdaşlıq edən icra hakimiyyətləri bilir. Bizdə olan məlumata görə icra hakimiyyətləri müxtəlif dövlət və qeyri-dövlət qurumlarını bu işlərə cəlb edirlər. Ya da tenderi udan şirkət subpodratçılarla çalışır.
Xatırladaq ki, “Veteks-2017” MMC son dəfə ölkə mətbautının gündəminə Beyləqan rayonunda Mənzil istismar Sahəsinin binalarının bərbad təmir qalmaqalı ilə gəlib. Aldığımız məlumata görə isə “İnşaat Servis-2” MMC şirkətinin Zərdabda həyata keçirdiyi işlər həddindən artıq yarıtmaz vəziyyətdədir… //pia.az//
