Qeyd edək ki, Avropa Oyunları zamanı Hovsan qəsəbəsindən şəhərə işləyən 175 saylı avtobusun hərəkət trayektoriyası dəyişdirilərək son dayanacaq kimi “Xətai” metrostansiyasının yanı müəyyənləşmişdi. Amma müvafiq qurumlar hərəkət istiqamətində dəyişikliyin müvəqqəti olduğunu və Oyunlar bitdikdən sonra avtobusun son dayanacağının əvvəlki qaydaya qaytarılacağını vəd etmişdilər. Əvvəllər həmin avtobusun son dayanacağı “28 May” metrostansiyasının, konkret olaraq Səməd Vurğun bağının yaxınlığı idi.
Hərəkət trayektoriyasının dəyişdirilməsindən iki il keçib. Amma problem hələ də qalır. Bununla bağlı narazılıqların sayı isə günbəgün artmaqda davam edir. Sərnişinlər haqlı olaraq həmin istiqamətə hərəkətin intensivliyini və çoxluğu əsas gətirərək 175 saylı avtobusun əvvəlki istiqamətə qaytarılmasını tələb edirlər. Bununla bağlı dəfələrlə redaksiyamıza çoxsaylı şikayətlər gəlib. Zaman-zaman mətbuatda və cavabdeh qurumlar qarşısında məsələ gündəmə gətirilsə də sərnişinlərin etirazları nəzərə alınmır. Bu gün isə o problemlər daha köklü şəkil alıb. Sakinlər iki ildir ki, bu məsələnin həllinə, yaxud o istiqamətdə alternativ marşrut xəttinin açılmasına ümidlənirlər. Amma bu baş vermır. Adıçəkilən avtobusun son dayanacağının əvvəlki istiqamətə qaytarılmasına və ya bu xətt üzrə yeni marşrutun açılmasına ümidlənən Hövsan sərnişinləri məsələni yenidən gündəmə gətiriblər. Bununla bağlı “Cümhuriyət” qəzetinə müraciət edən qəsəbə sakinləri əvvəllər “28 May”-Hövsan istiqamətində hərəkət edən avtobusun yenidən əvvəlki xətt üzrə bərpa olunmasını tələb edirlər. Sakinlərin dediyinə görə hazırda qəsəbədən şəhər istiqamətində yalnız taksilər fəaliyyət göstərir. Hər gün taksi ilə həmin istiqamətə hərəkət etmək isə sərnişinlərin büdcəsinə uyğun deyil. Taksilər adambaşına xidmət haqqı üçün 1.50 -2 manat tələb edirlər. Bu isə ay ərzində kifayət qədər əlavə xərc deməkdir. Qeyd edək ki, 175 saylı avtobusun gediş qiyməti 30 qəpikdir. Sakinlər əvvəlki illərdə olduğu kimi birbaşa şəhərə getmək üçün həmin avtobusdan yararlanmaq istəyirlər. “Belə olarsa, həm gediş-gəlişin rahatlığının təminatı, həm də yol xərci baxımından daha sərfəli olar” deyir sakinlər..
Bir neçə sakinlə söhbət zamanı məlum oldu ki, əslində bu problem çoxdandır ki, onların yaralı yeridir. Hövsan sakini Nərminə Hüseynovanın sözlərinə görə, hər gün şəhərə gəlmək üçün taksidən istifadə edir. Aldığı əməkhaqqının yarısını yollarda xərclədiyini deyən şikayətçi problemin indiyədək həll edilməməsindən gileylənib: “Bu məgər çox ağır problemdir? Xətai metrosuna kim gedir axı? Hövsanın yarısından çoxu şəhərə gedir. Birbaşa şəhərə isə marşrut xətti yoxdur. Hansı zəmanədir? Vaxt var idi ki, bununla yanaşı “Gənclik” metrostansiyasının yanına da avtobus işləyirdi. Ümumiyyətlə, bizim qəsəbədən şəhərin müxtəlif istiqamətlərinə işləyən marşrutlar bərbad haldadır. Bu avtobusların köhnə olmasından, interval problemindən, nədən danışaq axı? Biz nə vaxt insan kimi yaşayacağıq?”.
Sakinlərdən Vilayət Muxtar deyib ki, bu gün 175 nömrəli marşrut sözün əsl mənasında Hövsan əhalisinin probleminə çevrilib: “Avropa Oyunları zamanı hərəkət istiqamətində dəyişiklik edildi, amma sonradan söz verildiyi kimi bərpa olunmadı. Qeyd edim ki, 175 nömrəli marşrut hərəkət istiqaməti dəyişdirilmədən öncə kənd Hövsandan “28 May” metrosuna qədər gedirdi. Hazırda isə Xətai metrosuna qədər gedir. Yəni, artıq 2 ildir ki, Hövsandan “28 May”a gedən marşrut xətti yoxdur. Bu istiqamətdə yalnız taksilər fəaliyyət göstərir ki, bu da gündəlik olaraq işə gəlib-getmək üçün problemlər yaradır. Digər tərəfdən maliyyə baxımından da gündəlik taksi xidmətindən istifadə etmək sərfəli deyi. Məsələnin digər tərəfi isə 175 nömrəli marşrutun demək olar ki, işləməməsidir. Belə ki, 45 dəqiqəlik intervalla işləyən 175 nömrəli marşrut Hövsandan “Xətai” metrosuna qədər 1 saat 25 dəqiqəyə gedir. Sürücülər bu gecikməni avtobusların texniki cəhətdən nasaz olması ilə əlaqələndirirlər. Ümumiyyətlə, bu gün Hövsan əhalisi üçün ciddi problemə çevrilən bu kimi halların aradan qaldırılması zəruridir. Hesab edirəm ki, aidiyyəti qurumlar bu məsələyə tezliklə əncam çəkməlidirlər”.
Hövsan sakini Ramilə Hüseynova deyir ki, 175 nömrəli avtobusun əvvəlki xətti çox rahat idi: “Uzun illər idi ki, o xəttə alışmışdıq. Dəyişməklə nə edirlər, anlamıram. Pulumuzu taksilərə tökməkdən müflis olmuşuq. Hələ qış aylarında, əsasən də qarlı havalarda taksi adamın birini 3 manatdan aparır. Bu il cəmi bir gün qar yağdı. Həmin günü taksi adamın birini mənzilbaşına 10 manata apardı. Halbuki o xətdə avtobus işləsəydi, 30 qəpik xərc çıxacaqdı. Nəyisə danışmaqla bitmir, gərək iş görülsün. Əslində “Xətai” metrostansiyasına girmək də sərfəli deyil. Qatarı gözləmək üçün nə qədər vaxt itirirsən. Hər halda səsimizə səs versinlər və tələbimiz 175 nömrəli avtobusu geri qaytarsınlar”.
Məsələ ilə bağlı Bakı Nəqliyyat Agentliyinin ictimaiyyətlə əlaqələr şöbəsinin sektor müdiri Mais Ağayev “Cümhuriyət” qəzetinə bildirib ki, hazırda optimallaşdırma işləri çərçivəsində təhlillər aparılır: “O cümlədən, Hövsan qəsəbəsi istiqamətindəki marşrut xətləri də nəzərdən keçirilir”.
