Ağsu rayonu, Abasxanlı kənd sakini Məmmədzadə Cavid Ağarza oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, 4 ildən çoxdur Məşğulluq Agentliyində qeydiyyatda olsa da, işlə təmin edilmir:

“Mən, Məmmədzadə Cavid Ağarza oğlu, yazaraq bildirirəm ki, 4 ildən çoxdur işsizlikdən əziyyət çəkirəm. 4 ildir Məşğulluq Agentliyində qeydiyyatdayam.

2 azyaşlı övladım var. Yoldaşım gözündən əməliyyat olunamlıdır. Özüm ustayam. 6 ildən çox stajım var. Bu ayın 25-də Ağsu rayon Abasxanlı kənd məktəbində vakant yer olacq. Vakant yer olarsa, işlə təmin etmələrini xahiş etmişəm.

Təhsil şöbəsinin müdir müavini Natiq müəllimin qəbulunda oldum. Bildirdi ki, mən sırf həmin yer üçün söz verə bilmərəm. Ordan-ora, burdan-bura göndərildim. Allah şahiddir ki, necə çıxılmaz vəziyyətdəyəm.

Nazir Emin Əmrullayevin sabirabad rayonunda görüşü var idi. Orada məni Taleh adlı şəxs qəbul etdi. Taleh bəy orada Natiq müəllimə tapşırıq verdi ki, bu şəxsi işlə təmin edin.

Ağsu rayon icra başçısı Bağırov Rövşən Elmidar oğlu Abasxanlı kəndinə gəlmişdi. Rayonun deputatı da orada idi. Yaxınlaşıb bildirdim ki, kəndin orta məktəbində boş yer olacaq, işlə təmin olunmağıma kömək edin. Elçin Mirzəbəyli Natiq müəllimə dedi ki, Cavidi işlə təmin et, lakin hələ də mənə iş verilmir. Nə vaxt gedirəm, ya mraciət edirəm, deyirlər ki, səndən qabaq növbədə olanlar var.

Həmin məktəbdə işləyən usta təqaüdə çıxır, öyrənmişəm. Onun yerinə işə girmək istəyirəm. 4 ildir Məşğulluq Agentliyində qeydiyyatdayam, mənə heç bir iş təklif etməyiblər".

Məsələ ilə bağlı Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi ilə əlaqə saxladıq. Qurumdan bildirdilər ki, Məmmədzadə Cavid Ağarza oğlunun müraciəti araşdırılıb: "Vətəndaş "Əmək və məşğulluq" altsistemində işaxtaran kimi qeydiyyatdadır. 2025-ci ilin yanvar ayında müraciəti əsasında Cavid Məmmədzadənin məşğulluq imkanları qiymətləndirilib və özünüməşğulluq proqramı fərdi məşğulluq proqramında uyğun tədbir olaraq müəyyyənləşməyib.
Daha öncə vətəndaşın özünüməşğulluq proqramına hər hansı qeydiyyatı olmayıb. Cavid Məmmədzadənin 4 ildir ki, növbədə olması ilə bağlı iddiası həqiqəti əks etdirmir. Özünüməşğulluq proqramının icrası ictimai açıq həyata keçirilir və hər kəs Agentliyin saytında proqrama müraciət edən, qeydiyyata alınınan və növbədə gözləyən vətəndaşların məlumatları ilə tanış ola bilir. Bu səbəbdən heç bir əsas olmadan proqrama müraciət edən vətəndaşların növbədən kənarlaşdırılması mümkün deyildir. Cavid Məmmədzadə digər məşğulluq tədbirlərindən yararlanmaq istəyərsə aidiyyəti üzrə Məşğulluq filialına müraciət edə bilər".