“Yayış binasına aid qarajlar tikinti şirkəti tərəfindən kənar şəxsə satılıbsa, sakinlər ümumi yığıncaq keçirə bilirlərsə, yəni əlli faizdən çox sahə mülkiyyətçilərini toplaya bilirlərsə, problemin ən sadə yolu yığıncağı keçirib, idarəetmə üsulunun özləri tərəfindən müəyyən olunmasıdır. Təcrübə göstərir ki, binada qanunsuz idarəçi varsa, ümumi yığıncaq keçirmək çox çətin olur. Bunun bir sıra səbəbləri var. İdarəçi imkan vermir ki, elan dərc olunsun, yığıncaq keçirilsin. Dolayısı ilə prosesə maneə olur, sakinlərə təzyiq edirlər. Problemlərdən biri də budur ki, sakinlərin çoxu bir-birini tanımır. Bəziləri isə heç binada yaşamır, mənzilini kiməsə kirayə verib gedib. Bu səbəblərdən çox zaman yığıncaq keçirmək olmur”.

Bu sözləri Pravda.az-a açıqlamasında hüquqşünas Əkrəm Həsənov deyib.

Onun sözlərinə görə, hətta bir sakin belə tikinti şirkətini məhkəməyə verib, onun çıxarılmasını tələb edə bilər: “Şirkət orada qanunsuzdur, çünki ümumi yığıncaq tərəfindən seçilməyib. Hətta bu olmadıqda da binada qarajların satılmasını məhkəmə qaydasında mübahisələndirmək olar. Adətən qarajları necə satırlar? Dövlət Şəhərsalma və Arxitektura Komitəsi, Daşınmaz Əmlakın Dövlət Kadastrı və Reyestri Publik Hüquqi Şəxsi - hamısı əlbir olurlar, həmin qarajlara çıxarış verirlər. Bunun əsasında da alqı-satqı edirlər. Bunu mübahisələndirmək elə də asan məsələ deyil. Bütün sənədlərin etibarsız hesab edilməsini tələb etmək lazımdır. Mənzil Məcəlləsinə əsasən, ümumi kommunikasiyaların keçdiyi zirzəmi binanın ümumi mülkiyyətidir. Buna görə də heç kimə satıla bilməz. Lakin təcrübədə indi bu problem geniş yayılıb”.