Rusiya 2026-cı ildə "neokolonializm"lə mübarizə aparmağı və rusdilli insanları "harada olursa olsunlar" qorumağı planlaşdırır, xarici işlər nazirinin müavini Sergey Ryabkov bildirib. Onun sözlərinə görə, ölkənin xarici siyasətinin əsas məqsədi "hər mənada" təhlükəsizliyini gücləndirmək olacaq. "Rusiyanı müxtəlif ölkələrdən ayıran məsafələrdən asılı olmayaraq, qonşularımızla ittifaqımızı dərinləşdirmək və ruslara və rusdilli sakinlərə qayğı göstərmək və onları qorumaq işimizin ön sıralarında olacaq. Harada olursa olsunlar, Vətən tərəfindən qorunduqlarını hiss etməlidirlər", - deyə Sergey Ryabkov bildirib.
Politoloq Oqtay Qasımov Bizimyol.info xəbər portalına açıqlamasında bildirib ki, Sergey Ryabkovun “Rusiya neokolonializmə qarşı mübarizə aparacaq” ifadəsi kifayət qədər istehza doğuracaq bir fikirdir, çünki məhz dünya tarixində son 400-500 ildə Rusiyaya qədər kolonialist siyasət yürüdən və əraziləri işğal edən dövlətlərin varlığına son qoyan və işğal etdiyi ərazilərdə assimilyasiya, diskriminasiya prosesi həyata keçirən dövlətlər çox azdır.
Politoloqun fikrincə, Rusiya eyni siyasəti bu gün də davam etdirməkdədir və bu gün də öz soyundan öz dinindən və öz irqindən olan bir dövlətə, millətə qarşı Rusiya savaş aparır.
Rusların harada yaşamasından asılı olmayaraq Rusiya tərəfindən müdafiə olunacaq fikri ilə bağlı Oqtay Qasımov qeyd edib ki, bu da Rusiya imperializminin yürütdüyü siyasətin tərkib hissəsidir və məhz, bu adla Rusiya qonşu dövlətləri təzyiq altında saxlamağı və onların daxili işlərinə müdaxilə etməyi hesablayır: “Bu ifadələr Rusiyanın mövcud hakimiyyətinin tətbiq etdiyi siyasətin təzahürüdür və hər iki element qeyd etdiyimiz kimi, Rusiyanın qonşu dövlətlərin daxili işlərinə müdaxilə üçün istifadə etdiyi alətlərdən biridir. Yəni Ryabkovun sözlərindən gəlinən nəticə bundan ibarətdir ki, Rusiya bundan sonra da siyasətini dəyişməyəcək və onun neoimperiyaçılıq ambissiyaları davam edəcək və keçmiş postsovet məkanı ölkələrinə başqa adlarla mümkün olmadığı halda rusdilli əhalinin hüquqları ilə bağlı məsələni bəhanə edərək, müdaxilə etməyə çalışacaq”.
